Read Iban John 11 Bible Online

John 11 - Iban bible

John 11

¹ Siku orang ke benama Lasarus sakit di Betani, genturung pendiau ti alai Maria enggau menyadi indu iya Marta diau. (

² Maria nya meh indu ke udah nata Tuhan ngena minyak wangi lalu ngendas kaki Tuhan ngena buk iya. Menyadi lelaki iya ke benama Lasarus sakit.)

³Nya alai Maria seduai Marta mesanka Jesus. Ku seduai iya, “Tuhan, iya ke dikesayauka Nuan, sakit.”

⁴ Tang lebuh Jesus nerima pesan nya, Iya bejaku, “Penyakit tu enda ngujung ngagai pemati. Utai tu nyadi kena ngemuliaka Allah Taala, ngambika Anak Allah Taala dimuliaka ulih nya.”

⁵Nya alai, taja pen Jesus rinduka Marta, Maria enggau Lasarus,

⁶lebuh Iya ninga Lasarus sakit, Iya mengkang diau dua hari da agi ba endur ti alai Iya diau.

⁷Udah lepas nya Iya lalu bejaku ngagai sida murid, “Aram kitai pulai baru ngagai Judea.”

⁸ Ku sida murid bejaku enggau Iya, “Pengajar,[73] baru apin lama tu ti udah orang Judah deka nuku Nuan ngena batu, lalu Nuan deka kin ke baru?”

⁹ Disaut Jesus, “Kitai semina bisi dua belas jam aja hari siang, ukai enda? Orang ke bejalai lebuh siang hari, enda tesangkut, laban sida meda penampak dunya tu.

¹⁰Tang orang ke bejalai lebuh malam hari tesangkut, laban penampak nadai dalam sida.”

¹¹ Lebuh Iya udah nyebut nya Iya lalu madah ngagai sida, “Pangan kitai Lasarus udah tinduk, tang Aku deka kin lalu ngerak iya.”

¹²Ku sida murid bejaku ngagai Iya, “Tuhan, enti iya tinduk, iya deka gerai.”

¹³Tang Jesus bejakuka pasal pemati Lasarus, tang sida ngumbai Iya madahka Lasarus tinduk.

¹⁴Jesus lalu bejaku enggau terang ngagai sida, “Lasarus udah mati.

¹⁵Aku gaga ke Diri nadai dia enggau iya, ngambika kita arap, ke penguntung kita. Tang aram kitai mupuk ngagai iya.”

¹⁶ Thomas, ke digelar Besapit,[74] lalu bejaku ngagai murid ti bukai, “Aram kitai mupuk, ngambika kitai mati sama enggau iya.”

¹⁷Lebuh Jesus datai, Iya nemu Lasarus empat hari udah dikuburka.

¹⁸Nyadi Betani nya kira tiga kilometer ari Jerusalem,

¹⁹lalu mayuh orang Judah udah nemuai ngagai Marta seduai Maria, deka merindang seduai iya ketegal pemati menyadi lelaki seduai iya.

²⁰Lebuh Marta ninga Jesus baru deka datai, iya lalu ngambat Jesus, tang Maria tinggal di rumah.

²¹Marta lalu bejaku ngagai Jesus, “Tuhan, enti Nuan bisi ditu lebuh maya nya, menyadi aku tentu enda mati!

²²Tang indah diatu deh aku nemu Allah Taala deka meri Nuan sebarang utai ti dipinta Nuan ari Iya.”

²³Jesus lalu bejaku ngagai iya, “Menyadi nuan deka angkat idup baru.”

²⁴ Ku Marta bejaku ngagai Iya, “Aku nemu iya deka angkat idup baru lebuh pengangkat orang ari mati ba pengujung dunya.”

²⁵ Jesus lalu bejaku ngagai iya, “Aku tu meh pengangkat enggau pengidup. [75] Orang ke arapka Aku, deka idup taja pen sida mati,

²⁶ lalu semua orang ke idup lalu arapka Aku, enda mati. Kati nuan arapka nya?”

²⁷ Maria lalu nyaut Iya, “Aku arap, Tuhan! Aku arapka Nuan tu Kristus,[76] Anak Allah Taala, ke datai ngagai dunya.”

²⁸Lebuh Marta udah nyebut nya, iya pulai ke rumah, lalu betelai enggau menyadi iya Maria. Ku iya, “Pengajar bisi ditu, lalu Iya ngangauka nuan.”

²⁹Lebuh Maria ninga nya, iya lalu beguai-guai angkat lalu mansang ngagai Jesus.

³⁰Nyadi lebuh maya nya Jesus apin datai ba genturung pendiau nya, tang agi ba endur alai Marta ke betemu enggau Iya.

³¹Lebuh orang Judah ke merindang Maria di rumah meda iya beguai-guai angkat lalu pansut, sida lalu nitihka iya, laban sida ngumbai iya deka mansang ngagai kubur lalu nyabak dia.

³² Lebuh Maria datai ba endur alai Jesus, lalu meda Iya, iya lalu nyungkurka diri di kaki Jesus, lalu bejaku ngagai Iya, “Tuhan, enti Nuan bisi ditu lebuh maya nya, menyadi aku tentu enda mati!”

³³Lebuh Jesus meda Maria nyabak, lalu meda orang Judah ke enggau iya mega nyabak, ati Iya balat sinu sereta tusah.

³⁴Lalu ku Iya nanya sida, “Dini alai kita nguburka iya?” Sida lalu nyaut Iya, “Tuhan, aram kitai meda.”

³⁵ Jesus nyabak.[77]

³⁶Orang Judah lalu bejaku, “Peda pemalat Iya rinduka iya!”

³⁷ Tang ku sekeda bala sida bejaku, “Kati Iya ke ulih ngeraika orang ke buta, enda ulih nagang orang tu mati?”

³⁸ Jesus balat amat sinu ati baru, lalu datai ba kubur. Nyadi kubur nya lubang gua, ti ditutup ngena sigi batu.

³⁹Jesus lalu bejaku, “Baringka batu nya ke tisi!” Marta, menyadi orang ke mati nya, lalu bejaku, “Tuhan, iya tentu udah bau but, laban iya empat hari udah mati!”

⁴⁰Jesus lalu bejaku ngagai Marta, “Kati Aku nadai udah madah ngagai nuan, enti nuan arap, nuan deka meda mulia Allah Taala?”

⁴¹ Nya alai sida lalu maringka batu nya ke tisi. Jesus engkadah lalu bejaku, “Apai, Aku meri terima kasih ngagai Nuan, laban Nuan udah ninga Aku.

⁴² Aku nemu Nuan endang seruran ninga Aku, tang Aku udah nyebut tu ke penguntung sida ke bediri ditu, ngambika sida nemu arapka Nuan udah ngirumka Aku.”

⁴³Lebuh Iya udah nyebut nya, Iya lalu ngangau enggau nyawa ti inggar, “Lasarus, pansut nuan!”

⁴⁴ Orang ke mati nya lalu pansut. Kaki jari iya ditanchang ngena urik kain, lalu mua iya dibalut ngena kain. Jesus lalu bejaku ngagai sida, “Buka kain nya ari iya, ngambika iya ulih bejalai.”

⁴⁵Naya alai, mayuh orang Judah ke udah datai enggau Maria, lalu udah meda utai ti dikereja Jesus, arapka Iya.

⁴⁶Tang sekeda sida mansang ngagai orang Parisi, lalu madahka utai ti udah dikereja Iya.

⁴⁷Nya alai sida tuai imam enggau orang Parisi lalu mai raban Kunsil baum, lalu bejaku, “Nama utai ti patut dikereja kitai? Orang tu ngereja mayuh kereja ajih.

⁴⁸Enti kitai nejuka Iya majak ngereja nya, semua orang deka arapka Iya, lalu orang Rome deka datai lalu ngerusak Rumah Sembiang enggau bansa kitai.”

⁴⁹ Tang siku ari bala sida, ke benama Kaiapas, ke nyadi imam besai taun nya, lalu bejaku ngagai sida, “Kita nadai nemu utai!

⁵⁰Kita enda nemu, manah agi enti siku orang mati ngarika orang mayuh, ari ke nejuka semua bansa kitai dirusak.”

⁵¹Kaiapas ukai nyebut nya ari peneka iya empu, tang laban iya nyadi imam besai taun nya, iya benabi madahka Jesus deka mati ngarika bansa orang Judah,

⁵² lalu ukai semina ke bansa orang Judah aja, tang kena ngempuruka semua nembiak Allah Taala ke ngachir pendiau.

⁵³Nya alai berengkah ari nya, sida lalu bekira deka munuh Iya.

⁵⁴Nya alai Jesus enda agi ngayanka Diri begulai enggau orang Judah, tang mupuk ari nya ngagai nengeri Epraim ba menua ti semak menua puang, lalu diau dia enggau sida murid Iya.

⁵⁵ Nyadi Gawai Paska nyau semak, lalu mayuh orang datai ari menua pesisir ngagai Jerusalem, deka nuchi diri sebedau Gawai Paska.

⁵⁶ Sida begigaka Jesus, lalu bejaku enggau pangan diri lebuh sida bediri dalam Rumah Sembiang, “Nama pikir kita? Kati Iya deka datai ngagai Gawai tu?”

⁵⁷Nyadi sida tuai imam enggau orang Parisi udah meri atur: barang sapa nemu endur alai Jesus, patut madah ngagai sida, ngambika sida nangkap Iya.