Read Iban John 12 Bible Online

John 12 - Iban bible

John 12

¹Enam hari sebedau Gawai Paska, Jesus datai di Betani, endur alai Lasarus diau, orang ke udah diangkatka Jesus ari mati.

²Dia sida nyendiaka makai lemai ke Jesus. Marta mela pemakai, lalu Lasarus bisi enggau orang ba mija nya enggau Jesus.

³ Maria lalu ngambi sebutul minyak wangi ti berega, ti digaga ari narwasti ti tulin, nata kaki Jesus, lalu ngendas kaki Jesus ngena buk iya. Bau rengut minyak nya nyau bealun-alun dalam rumah nya.

⁴ Tang Judas Iskariot, siku ari murid Iya, ke deka nyual Iya, bejaku,

⁵“Nama kebuah minyak wangi nya enda dijual ngena rega tiga ratus singkap duit pirak[78] lalu duit nya diberi ngagai orang ke seranta?”

⁶ (Iya nyebut nya, ukai laban iya ibuhka orang ke seranta, tang laban iya penchuri. Iya nyaga sarang duit sida, lalu iya selalu ngenchuri duit ari sarang duit nya.)

⁷ Jesus lalu bejaku, “Anang ngachau iya! Iya meli minyak nya ngambika iya nyimpan minyak nya kena nyendiaka Aku dikubur.

⁸ Kita seruran bisi orang ke seranta enggau kita, tang Aku enda seruran enggau kita.”

⁹Lebuh bala orang Judah ninga Jesus bisi dia, sida lalu mansang kia, ukai semina ketegal Jesus, tang laban sida deka meda Lasarus, ke udah diangkatka Iya ari mati.

¹⁰ Nya alai bala tuai imam mega ngiga jalai munuh Lasarus,

¹¹laban ketegal iya mayuh orang Judah ninggalka sida, lalu arapka Jesus.

¹² Hari siti, bala orang mayuh ke udah datai ngagai Gawai nya, ninga Jesus deka datai di Jerusalem.

¹³ Nya alai sida lalu ngambi dan kayu engkerema, lalu mansang ngambat Iya enggau panjung, “Hosanna![79] Beberekat meh Iya ke datai dalam nama Tuhan, ke Raja orang Israel!”

¹⁴Jesus tetemuka siku keledai lalu nepan jelu nya. Munyi ti udah ditulis:

¹⁵ “Anang takut, kita anak indu Sion! Peda kita, Raja kita datai, nepan anak keledai!”

¹⁶ Sida murid Iya enda meretika utai nya lebuh maya nya, tang lebuh Jesus udah dimuliaka, nya baru sida ingatka utai tu udah ditulis pasal Iya, enggau utai ti udah dikereja ngagai Iya.

¹⁷Nya alai bala orang ke udah enggau Jesus lebuh Iya ngangauka Lasarus pansut ari kubur lalu ngangkatka Lasarus ari mati, majak besaksika pasal nya.

¹⁸Orang mayuh betemu enggau Jesus laban sida ninga Iya udah ngereja kereja ajih nya.

¹⁹Orang Parisi lalu bejaku enggau pangan diri, “Kitai enda ulih ngereja utai. Peda kita, semua dunya bela nitihka Iya!”

²⁰ Sekeda orang Gerika bisi mega datai enggau nyembah Allah Taala lebuh gawai nya.

²¹ Sida datai ngagai Philip, ke berasal ari Betsaida di menua Galili, lalu bejaku ngagai iya, “Tuan, kami keran deka betemu enggau Jesus.”

²²Philip lalu madah ngagai Andrew. Seduai iya lalu madah ngagai Jesus.

²³ Jesus lalu nyaut seduai iya, “Maya udah datai alai Anak Mensia deka dimuliaka.

²⁴ Enggau bendar Aku madah ngagai seduai, enti leka gandum enda labuh ke tanah lalu mati, iya deka mengkang semina leka aja. Tang enti iya mati, iya deka bebuah lebat.

²⁵ Orang ke sayauka nyawa diri, deka ngelenyauka iya, lalu orang ke begedika nyawa diri di dunya tu, deka bulih pengidup ti meruan belama iya.

²⁶Barang sapa deka betuaika Aku, enda tau enda nitihka Aku, lalu dia alai Aku, dia meh endur alai orang ke betuaika Aku. Apai deka ngemesaika orang ke betuaika Aku.

²⁷ “Diatu ati Aku balat tusah. Kati Aku patut nyebut -- ‘Apai, lepaska Aku ari maya tu’? Enda patut, laban nya meh kebuah Aku udah datai ngagai maya tu.

²⁸ Apai, muliaka nama Nuan!” Nyawa lalu bejaku ari serega, “Aku udah ngemuliaka iya, lalu Aku deka ngemuliaka iya baru.”

²⁹Bala orang ke bediri dia bisi ninga munyi nyawa nya, lalu ngumbai nya guntur. Ku sida ti bukai bejaku, “Siku melikat udah bejaku ngagai Iya!”

³⁰Jesus lalu nyaut, “Nyawa nya bejaku ke penguntung kita, ukai ke penguntung Aku.

³¹ Tu meh maya dunya deka diakim. Diatu iya ke merintah dunya tu deka diburu.

³² Lalu lebuh Aku diangkatka ari dunya, Aku deka ngaul semua orang[80] ngagai Aku Empu.”

³³Iya nyebut nya kena Iya nunjukka gaya chara Iya deka mati.

³⁴ Orang mayuh lalu nyaut Iya, “Kami udah ninga ari Adat, madahka Kristus[81] deka idup belama iya. Nya alai, kati ku Nuan madahka Anak Mensia enda tau enda diangkatka? Sapa Anak Mensia nya?”

³⁵ Disaut Jesus, “Penampak deka begulai enggau kita semina enda lama da agi. Bejalai meh kita kala lebuh kita agi bisi penampak, ngambika pemetang enda ulih nitihka kita. Enti kita bejalai dalam petang, kita enda nemu tunga kita deka bejalai.

³⁶ Arapka penampak, kala lebuh kita agi bisi penampak, ngambika kita nyadi anak penampak.” Lebuh Jesus udah nyebut nya, Iya mupuk lalu belalai ari sida.

³⁷Taja pen Iya udah ngereja mayuh macham kereja ajih di mua sida, sida mengkang enda arapka Iya.

³⁸ Tu kena ngamatka jaku ti udah disebut nabi Isaiah: “Tuhan, sapa udah arapka pesan ti ditusui kami, lalu ngagai sapa kuasa Tuhan udah dipandangka?”

³⁹Nya alai, sida enda ulih arap, laban Isaiah mega nyebut,

⁴⁰ “Iya udah ngasuh mata sida buta lalu ngasuh ati sida kieh, ngambika sida enda ulih meda ngena mata sida, lalu enda ulih mereti ngena ati sida lalu nguing -- lalu Aku ngeraika sida.”

⁴¹ Isaiah nyebut nya laban[82] iya meda mulia Jesus, lalu bejakuka pasal Jesus.

⁴² Taja pia, mayuh tuai orang Judah arapka Jesus. Tang sida enda ngaku nya laban sida takutka orang Parisi, laban sida takutka diri dibuai ari balai gempuru,

⁴³laban sida rindu agi dipuji mensia, ari ke dipuji Allah Taala.

⁴⁴ Jesus lalu bejaku enggau nyawa ti inggar, “Barang sapa arapka Aku, ukai arapka Aku, tang arapka Iya ke ngirumka Aku.

⁴⁵ Lalu barang sapa meda Aku, meda Iya ke ngirumka Aku.

⁴⁶ Aku udah datai nyadika penampak dunya, ngambika semua orang ke arapka Aku enda agi diau dalam pemetang.

⁴⁷ Aku enda ngakim orang ke ningaka pesan Aku, lalu enda ngasika pesan nya, laban Aku ukai datai ngakim dunya, tang nyelamatka dunya.

⁴⁸ Orang ke nulak Aku, lalu enda nerima pesan Aku, bisi siku hakim. Ba pengujung dunya, jaku ti udah disebut Aku deka nyadi hakim sida,

⁴⁹laban Aku ukai bejaku ari peneka Aku Empu,[83] tang Apai ke ngirumka Aku udah meri Aku pesan pasal utai ti enda tau enda disebut Aku.

⁵⁰Lalu Aku nemu, pesan Iya meri pengidup ti meruan belama iya. Nya alai, Aku semina nyebut utai ti diasuh Apai.”