Read Iban John 13 Bible Online

John 13 - Iban bible

John 13

¹ Sebedau Gawai Paska berengkah, Jesus nemu maya endang udah datai alai Iya deka ninggalka dunya tu, lalu mupuk ngagai Apai. Iya endang seruran rinduka nembiak Iya ke di dunya tu, lalu Iya rinduka sida datai ke ujung.

² Sebedau sida makai lemai, Sitan endang udah nepu ke dalam ati Judas anak Iskariot runding ti deka nyual Jesus.

³Jesus nemu Apai udah meri semua kuasa ngagai Iya. Iya mega nemu Diri endang datai ari Allah Taala, lalu deka pulai[84] ngagai Allah Taala.

⁴Iya angkat ari mija, muka serayung Iya, lalu nanchangka kain mandi ba punggung Iya.

⁵ Udah nya Iya nuang ai ke dalam bisin, lalu belabuh masu kaki sida murid, lalu ngendas kaki sida ngena kain mandi ti udah ditanchangka Iya ba punggung Iya.

⁶Iya datai ngagai Simon Peter. Peter lalu bejaku enggau Iya, “Tuhan, kati Nuan deka masu kaki aku?”

⁷Jesus lalu bejaku ngagai iya, “Diatu Nuan enda nemu utai ti dikereja Aku, tang ila baru nuan nemu.”

⁸ Peter lalu bejaku ngagai Iya, “Nuan enda tau sekali-kali masu kaki Aku!” Jesus lalu nyaut iya, “Enti Aku enda masu nuan, nuan nadai ungkup ba Aku.”

⁹Simon Peter lalu bejaku, “Tuhan, enti pia, anang semina masu kaki aku! Basu mega jari enggau pala aku!”

¹⁰Ku Jesus bejaku ngagai iya, “Orang ke udah mandi, enda ibuh masu diri, kelimpah ari masu kaki iya.[85] Lalu kita tu tuchi, tang ukai semua kita tuchi.”

¹¹ Laban Iya nemu sapa ke deka nyual Iya. Nya kebuah Iya nyebut, “Ukai semua kita tuchi.”

¹² Lebuh Iya udah masu kaki sida, lalu udah ngerasukka serayung Iya baru, lalu pulai baru ngagai endur Iya ba mija nya, Iya lalu bejaku ngagai sida, “Kati kita nemu utai ti udah dikereja Aku ngagai kita?

¹³Kita ngumbai Aku Pengajar enggau Tuhan. Nya endang amat, laban Aku endang amat Pengajar enggau Tuhan.

¹⁴Nya alai, enti Aku ti Tuhan enggau Pengajar kita udah masu kaki kita, kita patut mega masu kaki pangan diri.

¹⁵ Laban Aku udah meri kita siti teladan, ngambika kita mega ngereja utai ti udah dikereja Aku ngagai kita.

¹⁶ Enggau bendar Aku madah ngagai kita, ulun nadai kala besai agi ari tuan sida, lalu orang ke dikirumka nadai kala besai agi ari orang ke ngirumka sida.

¹⁷ Enti kita nemu utai tu, kita bulih berekat enti kita ngereja sida.

¹⁸ Aku ukai bejakuka pasal semua kita. Aku nemu sapa ke udah dipilih Aku. Tang tu kena ngamatka Bup Kudus, ‘Orang ke makai roti Aku, udah ngangkatka tumbit iya deka ngelaban Aku.’

¹⁹ Aku madahka tu ngagai kita diatu, sebedau utai nya nyadi, ngambika, lebuh iya nyadi ila, kita deka arapka ‘Aku tu meh Iya.’

²⁰ Enggau bendar Aku madah ngagai kita: barang sapa nerima orang ke dikirumka Aku, nerima Aku, lalu barang sapa nerima Aku, nerima Iya ke ngirumka Aku.”

²¹Lebuh Jesus udah nyebut nya, ati Iya balat tusah, lalu ku Iya bejaku, “Enggau bendar Aku madah ngagai kita, siku ari bala kita deka nyual Aku.”

²²Sida murid lalu beperening ngagai pangan diri, enda nemu sapa ti ku Iya.

²³ Siku ari sida murid, iya ke dikerinduka Jesus, bisi duduk ngimbai Jesus.

²⁴Simon Peter lalu ngepaika jari ngagai murid nya, minta iya nanya ngagai Jesus sapa ti ku Iya.

²⁵Murid nya lalu nyingitka diri ngagai Jesus, lalu nanya Iya, “Tuhan, sapa orang nya?”

²⁶ Jesus lalu nyaut, “Orang ke deka diberi Aku roti tu, lebuh Aku udah nyepuhka roti tu ke dalam mangkuk.” Lebuh Iya udah nyepuhka roti nya, Iya lalu meri roti nya ngagai Judas anak Simon Iskariot.[86]

²⁷Lebuh Judas udah nerima roti nya, Sitan lalu tama ngagai iya. Ku Jesus bejaku ngagai Judas, “Kereja jampat utai ti deka dikereja nuan!”

²⁸Nadai siku sida ke ba mija nya nemu kebuah Jesus nyebut nya ngagai Judas.

²⁹ Sekeda sida ngumbai Jesus ngasuh Judas meli roti kena ngintu gawai, tauka meri duit ngagai orang ke seranta, laban Judas ngemataka sarang duit sida.

³⁰ Nya alai lebuh Judas udah nerima roti nya, iya lalu pansut tekala nya. Hari endang udah malam.

³¹ Lebuh Judas udah mupuk, Jesus lalu bejaku, “Diatu Anak Mensia udah dimuliaka,[87] lalu Allah Taala udah dimuliaka[88] dalam Iya.

³²Enti Allah Taala dimuliaka dalam Iya,[89] Allah Taala deka mega ngemuliaka Iya dalam Iya Empu, lalu ngemuliaka Iya diatu.

³³ Anak, Aku semina enda lama aja agi enggau kita. Kita deka ngiga Aku. Lalu munyi ti udah dipadahka Aku ngagai orang Judah, baka nya mega Aku madah ngagai kita, ‘Kita enda ulih datai ngagai endur ti deka digagai Aku.’

³⁴ Aku meri kita pesan ti baru: rinduka pangan diri. Baka Aku ke udah rinduka kita, baka nya meh kita patut rinduka pangan diri.

³⁵Enti kita rinduka pangan diri, nya baru semua orang deka nemu kita murid Aku.”

³⁶ Simon Peter lalu bejaku ngagai Iya, “Tuhan, ka kini ke Nuan?” Jesus lalu nyaut, “Diatu nuan enda ulih nitihka Aku ngagai endur ti deka digagai Aku, tang ila baru nuan nitihka Aku.”

³⁷ Peter lalu bejaku ngagai Iya, “Tuhan, nama kebuah aku enda ulih nitihka Nuan diatu? Aku sedia deka nyerahka nyawa aku ketegal Nuan!”

³⁸Disaut Jesus, “Kati nuan amat sedia deka nyerahka nyawa diri ketegal Aku? Enggau bendar Aku madah ngagai nuan, sebedau manuk mengkukuk nuan udah besangkalka Aku tiga kali.”