Read Iban John 14 Bible Online

John 14 - Iban bible

John 14

¹“Anang tusah ati. Arapka[90] Allah Taala, lalu arap mega ke Aku.

² Dalam rumah Apai Aku mayuh bilik. Enti iya enda baka nya, Aku enda madah ngagai kita Aku deka kin lalu nyendiaka endur ke kita.

³Lalu enti Aku mupuk lalu nyendiaka endur ke kita, Aku deka pulai kitu baru,[91] lalu mai kita ngagai Aku Empu, ngambika dia endur alai Aku, dia mega endur alai kita.

⁴Kita nemu jalai ngagai endur ti deka digagai Aku.”[92]

⁵ Thomas lalu bejaku ngagai Iya, “Tuhan, kami enda nemu kini ke Nuan deka mupuk. Baka ni ku kami nemu jalai kin?”

⁶ Jesus lalu bejaku ngagai iya, “Aku tu meh jalai, pemendar, enggau pengidup. Nadai orang ulih datai ngagai Apai enti enda nengah[93] Aku.

⁷Enti kita ngelala Aku, kita deka mega ngelala Apai Aku. Berengkah ari diatu kita ngelala Iya, lalu udah meda Iya.”

⁸Philip lalu bejaku ngagai Iya, “Tuhan, pandangka Apai ngagai kami, ngambika kami puas ati.”

⁹ Jesus lalu bejaku ngagai iya, “Aku lama udah begulai enggau kita, Philip, lalu nuan mengkang enda ngelala Aku? Barang sapa udah meda Aku, udah meda Apai. Nya alai nama kebuah nuan nyebut, ‘Pandangka Apai ngagai kami’?

¹⁰Kati nuan enda arapka Aku dalam Apai, lalu Apai dalam Aku? Jaku ti disebut Aku ngagai kita ukai disebut Aku ari peneka Aku Empu, tang Apai ke dalam Aku ti ngereja pengawa Iya.

¹¹ Arapka Aku lebuh Aku madahka Diri dalam Apai, lalu Apai dalam Aku. Tang enti kita enda arapka nya, kita patut arapka Aku ketegal utai[94] ti udah dikereja Aku.

¹²Enggau bendar Aku madah ngagai kita, orang ke arapka Aku, deka mega ngereja pengawa ti dikereja Aku. Indah pengawa ti besai agi ari nya deh deka dikereja sida, laban Aku mupuk ngagai Apai.

¹³ Aku deka ngereja sebarang utai ti dipinta kita dalam nama Aku, ngambika Apai dimuliaka dalam Anak.

¹⁴Enti kita minta sebarang utai dalam nama Aku, Aku deka ngereja nya.

¹⁵ “Enti kita rinduka Aku, kita deka ngasika pesan Aku,[95]

¹⁶ Lalu Aku deka minta ari Apai, lalu Iya deka meri kita siku Penyaup, ke deka diau enggau kita belama iya.

¹⁷Iya nya Roh pemendar, ke enda ulih diterima dunya, laban dunya enda meda tauka ngelala Iya. Kita ngelala Iya, laban Iya diau enggau kita, lalu deka meruan dalam[96] kita.

¹⁸“Aku enda ninggalka kita baka anak patu; Aku deka datai ngagai kita.

¹⁹ Enda lama da agi, dunya nadai agi meda Aku, tang kita deka meda Aku. Laban Aku idup, kita deka mega idup.

²⁰Lebuh maya nya ila, kita deka nemu Aku endang dalam Apai, lalu kita dalam Aku, lalu Aku dalam kita.

²¹ “Orang ke nerima lalu ngasika pesan Aku, nya meh orang ke rinduka Aku. Lalu orang ke rinduka Aku deka dikerinduka Apai Aku, lalu Aku deka rinduka sida, lalu mandangka Diri ngagai sida.”

²² Judas, (ukai Judas Iskariot) lalu bejaku ngagai Iya, “Tuhan, nama kebuah Nuan deka mandangka Diri ngagai kami, lalu enda ngagai dunya?”

²³ Ku Jesus nyaut iya, “Orang ke rinduka Aku deka ngasika pesan Aku, lalu Apai Aku deka rinduka iya, lalu kami duai Apai deka datai ngagai iya, lalu diau enggau iya.[97]

²⁴Barang sapa enda rinduka Aku, enggai ngasika jaku [98] Aku. Lalu jaku ti didinga kita nya ukai jaku Aku, tang jaku Apai ke ngirumka Aku.

²⁵“Aku udah nyebut utai tu lebuh Aku agi enggau kita.

²⁶Tang Penyaup, iya nya Roh Kudus, ke deka dikirumka Apai dalam nama Aku, deka ngajar kita semua utai, lalu ngasuh kita ingatka semua utai ti udah disebut Aku ngagai kita.

²⁷ “Aku ninggalka pemaik ba kita. Pemaik Aku diberi Aku ngagai kita. Aku ukai meri ngena chara dunya. Anang tusah ati, lalu anang takut.

²⁸Kita udah ninga Aku nyebut ngagai kita, ‘Aku deka mupuk, lalu Aku deka datai baru ngagai kita.’ Enti kita rinduka Aku, kita deka gaga ati ninga Aku deka mupuk ngagai Apai, laban Apai besai agi ari Aku.

²⁹ Diatu Aku udah madahka tu ngagai kita sebedau iya nyadi, ngambika lebuh iya nyadi, kita deka arap.

³⁰ Aku enda bejaku lama agi enggau kita, laban pemerintah dunya tu deka datai. Iya nadai kuasa atas Aku,

³¹ tang Aku ngereja utai ti diasuh Apai, ngambika dunya nemu Aku rinduka Apai. Angkat. Aram kitai mupuk.”