Read Iban John 15 Bible Online

John 15 - Iban bible

John 15

¹ “Aku tu pun anggur ti bendar, lalu Apai Aku tukang kebun.

²Iya muai ari Aku genap iti dan ti enda bebuah. Genap iti dan ti bebuah, dijarau[99] Iya, ngambika dan nya bebuah lebat agi.

³ Kita udah dituchi[100] ulih jaku ti disebut Aku ngagai kita.

⁴ Meruan dalam Aku, lalu Aku deka meruan dalam kita. Dan enda ulih bebuah ngatika diri enti iya enda meruan begempung enggau pun. Baka nya mega kita; kita enda ulih bebuah enti kita enda meruan dalam Aku.

⁵Aku tu pun anggur, kita nya dan. Orang ke meruan dalam Aku, lalu Aku meruan dalam sida, deka bebuah lebat, laban enti nadai Aku, kita enda ulih ngereja sebarang utai.

⁶Barang sapa enda meruan dalam Aku, deka dibuai baka dan lalu layu. Dan ti baka nya deka digumpul, ditikauka ngagai api, lalu ditunu.

⁷ Enti kita meruan dalam Aku, lalu jaku Aku meruan dalam kita, pinta sebarang utai ti dikedekaka kita, lalu utai nya deka dikereja ke kita.

⁸Apai Aku dimuliaka, enti kita bebuah lebat lalu nyadi murid Aku.

⁹Baka Apai ke udah rinduka Aku, baka nya mega Aku udah rinduka kita. Meruan dalam pengerindu Aku.

¹⁰ Enti kita ngasika pesan Aku, kita deka meruan dalam pengerindu Aku, baka Aku ke udah ngasika pesan Apai, lalu meruan dalam pengerindu Iya.

¹¹Aku udah madahka utai tu ngagai kita, ngambika pengaga Aku bisi dalam kita, ngambika ati kita chukup gaga.[101]

¹² Tu pesan Aku: rinduka pangan diri, baka Aku ke udah rinduka kita.

¹³ Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya.

¹⁴ Kita pangan Aku enti kita ngasika pesan Aku.

¹⁵Aku enda agi ngumbai kita ulun, laban ulun enda nemu utai ti dikereja tuan iya. Tang Aku udah ngumbai kita pangan, laban Aku udah madah ngagai kita semua utai ti didinga Aku ari Apai.

¹⁶ Ukai kita ke milih Aku, tang Aku ke milih kita, lalu ngasuh kita bejalai lalu bebuah lebat,[102] buah ti tan. Nya baru Apai deka[103] meri ngagai kita sebarang utai ti dipinta kita ari Iya dalam nama Aku.[104]

¹⁷Tu pesan ti diberi Aku ngagai kita: rinduka pangan diri.[105]

¹⁸ “Enti dunya begedika kita, ingat, iya endang udah dulu begedika Aku sebedau iya begedika kita.

¹⁹Enti kita enggi dunya, dunya deka rinduka kita nyadika enggi iya empu. Tang laban kita ukai enggi dunya, laban[106] Aku udah milih kita ari dunya, nya alai dunya begedika kita.

²⁰ Kingatka jaku ti udah disebut Aku ngagai kita, ‘Ulun enda besai agi ari tuan iya.’ Enti sida merinsaka Aku, sida deka mega merinsaka kita. Enti sida ngasika jaku Aku, sida deka mega ngasika jaku kita.

²¹Tang sida deka ngereja semua utai tu ngagai kita ketegal nama Aku, laban sida enda ngelala Iya ke ngirumka Aku.

²² Enti Aku nadai udah datai lalu bejaku ngagai sida, sida tentu enda bedosa. Tang diatu sida nadai kebuah bedosa.

²³Barang sapa begedika Aku, begedi mega ke Apai Aku.

²⁴Enti Aku nadai udah ngereja ba bala sida kereja ti nadai udah kala dikereja orang bukai, sida tentu enda bedosa. Tang diatu sida udah meda kereja ajih ti dikereja Aku,[107] lalu sida begedika Kami Duai Apai.

²⁵ Tu ngamatka jaku ti ditulis dalam Adat sida, ‘Sida begedika Aku enggau nadai kebuah.’

²⁶ Lebuh Penyaup datai, ke deka dikirumka Aku ngagai kita ari Apai, iya nya Roh pemendar, ke datai ari Apai, Iya deka besaksika pasal Aku.

²⁷ Lalu kita mega enda tau enda besaksika, laban kita udah enggau Aku kenyau ari pun.