Read Iban John 16 Bible Online

John 16 - Iban bible

John 16

¹“Aku udah madahka tu ngagai kita, ngambika kita enda ngelengkaka pengarap kita.[108]

² Sida deka muai kita ari balai gempuru. Iya ti bendar, maya deka datai alai orang ke munuh kita deka ngumbai diri ngereja nya ke Allah Taala.

³Lalu sida deka ngereja nya laban sida enda ngelala Apai tauka Aku.

⁴Tang Aku udah madahka tu ngagai kita, ngambika lebuh maya nya datai, kita ingatka utai ti dipadahka Aku ngagai kita pasal sida. Aku enda madahka utai tu ngagai kita ba pun iya suba, laban Aku bisi enggau kita.

⁵ Tang diatu Aku deka mupuk ngagai Iya ke udah ngirumka Aku. Tang taja pia, nadai siku kita nanya Aku, ‘Ka kini ke Nuan?’

⁶Tang laban Aku udah madahka nya ngagai kita, ati kita balat tusah.

⁷ Tang enggau bendar Aku madah ngagai kita: kita untung enti aku mupuk, laban enti Aku enda mupuk, Penyaup enda datai ngagai kita. Tang enti Aku mupuk, Aku deka ngirumka Iya ngagai kita.

⁸Lalu lebuh Iya datai, Iya deka ngayanka dunya amat salah ba pasal dosa, ba pasal pengelurus, enggau ba pasal ukum:

⁹ ba pasal dosa, laban sida enda arapka Aku;

¹⁰ ba pasal pengelurus, laban Aku deka mupuk ngagai Apai, lalu kita nadai meda Aku agi;

¹¹ ba pasal ukum, laban iya ke merintah dunya tu udah diukum.

¹²“Aku mayuh utai ti deka dipadahka ngagai kita, tang kita enda ulih nerima utai nya diatu.

¹³ Tang lebuh Roh pemendar datai, Iya deka ngiring kita ngagai semua pemendar, laban Iya ukai bejaku nitihka peneka Iya Empu, tang deka nyebut semua utai ti didinga Iya, lalu Iya deka madah ngagai kita semua utai ti deka nyadi.

¹⁴ Iya deka ngemuliaka Aku, laban Iya deka ngambi utai[109] Aku, lalu madahka utai[110] nya ngagai kita.

¹⁵Semua utai ti dikemisi Apai endang enggi Aku magang. Nya kebuah Aku madahka Roh Kudus deka ngambi utai[111] Aku, lalu madahka utai[112] nya ngagai kita.

¹⁶ “Enda lama da agi, kita nadai agi meda Aku, lalu enda lama udah nya, kita deka meda Aku.”

¹⁷Sekeda sida murid Iya lalu bejaku enggau pangan diri, “Nama reti utai ti dipadahka Iya ngagai kitai, ‘Enda lama da agi kita nadai agi meda Iya, lalu enda lama udah nya, kita deka meda Iya’? Lalu nama reti, ‘laban Aku mupuk ngagai Apai’?”

¹⁸Ku sida, “Nama reti ‘enda lama da agi’? Nadai kitai nemu utai ti ku Iya.”

¹⁹Jesus nemu sida bisi ati deka nanya Iya, nya alai Iya lalu bejaku ngagai sida, “Kati kita berandau enggau pangan diri pasal utai ti ku Aku lebuh Aku nyebut, ‘Enda lama da agi, kita nadai agi meda Aku, lalu enda lama udah nya, kita deka meda Aku’?

²⁰ Enggau bendar Aku madah ngagai kita: kita deka nyabak, sereta ngulit, tang dunya deka rami gaga ati. Ati kita deka tusah ati, tang ati kita ti tusah deka bebali nyadi pengaga.

²¹ Lebuh indu radai deka beranak, iya pedis, laban maya iya udah datai. Tang lebuh iya udah ngadaka anak iya, iya enda agi ingatka pemedis nya, laban ati iya gaga ke anak ke udah diadaka ngagai dunya.

²²Nya alai diatu ati kita tusah, tang Aku deka betemu enggau kita baru, lalu ati kita deka gaga, lalu nadai orang ulih ngerampas pengaga nya ari kita.

²³Ba hari nya, kita enda agi minta utai ari Aku.[113] Enggau bendar Aku madah ngagai kita, enti kita minta sebarang utai ari Apai dalam nama Aku, Iya deka meri utai nya ngagai kita.[114]

²⁴ Nyentuk ngagai diatu, kita nadai udah minta utai dalam nama Aku. Pinta lalu kita deka nerima, ngambika ati kita chukup gaga.[115]

²⁵ “Aku udah nyebut utai tu ngagai kita ngena jaku sempama. Tang maya deka datai alai Aku enda agi bejaku ngagai kita ngena jaku sempama, tang bejaku enggau terang pasal Apai.

²⁶Lebuh maya nya ila, kita deka minta utai dalam nama Aku. Aku ukai madahka Diri deka minta ngagai Apai ngarika kita,

²⁷laban Apai Empu rinduka kita, laban kita udah rinduka Aku lalu udah arapka Aku datai ari Allah Taala.[116]

²⁸Aku datai ari Apai, lalu Aku udah datai ngagai dunya. Lalu diatu Aku deka ninggalka dunya lalu mupuk ngagai Apai.”

²⁹Ku sida murid Iya bejaku ngagai Iya, “Diatu baru Nuan bejaku enggau terang, ukai ngena jaku sempama.

³⁰Diatu baru kami nemu Nuan nemu semua utai, lalu Nuan enda begunaka orang betanyaka utai ngagai Nuan. Ari nya kami arapka Nuan amat datai ari Allah Taala.”

³¹Ku Jesus nyaut sida, “Kati kita arap diatu?

³² Maya deka datai, lalu endang udah datai diatu, alai semua kita deka pambar, lalu genap iku kita deka pulai ngagai rumah diri empu, lalu ninggalka Aku keDiri. Tang Aku ukai keDiri, laban Apai bisi enggau Aku.

³³ Aku udah madahka tu ngagai kita, ngambika dalam Aku kita bisi pemaik. Di dunya tu kita kena perinsa. Tang anang tusah; Aku udah ngalahka dunya.”