Read Iban John 17 Bible Online

John 17 - Iban bible

John 17

¹ Lebuh Jesus udah nyebut nya, Iya engkadah ke langit, lalu bejaku, “Apai, maya udah datai. Muliaka Anak Nuan, ngambika Anak ngemuliaka Nuan,

²laban Nuan udah meri Iya kuasa atas semua mensia, ngambika Iya ulih meri pengidup ti meruan belama iya ngagai semua orang ke udah diberi Nuan ngagai Iya.

³ Tu pengidup ti meruan belama iya, ngambika sida ngelala Nuan, Allah Taala ti bendar, enggau Jesus Kristus, ke dikirumka Nuan.

⁴Aku udah ngemuliaka Nuan di dunya tu, laban Aku udah nembuka pengawa ti diasuh Nuan kereja Aku.

⁵ Nya alai diatu, Apai, muliaka Aku di mua Nuan Empu ngena mulia ti dikemisi Aku di mua Nuan sebedau dunya digaga.

⁶“Aku udah madahka nama Nuan ngagai orang ke udah diberi Nuan ngagai Aku ari dunya tu. Sida endang enggi Nuan, lalu Nuan udah meri sida ngagai Aku, lalu sida udah ngasika jaku Nuan.

⁷Diatu sida nemu, semua utai ti udah diberi Nuan ngagai Aku endang ari Nuan magang,

⁸laban jaku ti diberi Nuan ngagai Aku, udah diberi Aku ngagai sida, lalu sida udah nerima jaku nya, lalu nemu enggau bendar Aku amat datai ari Nuan, lalu sida udah arapka Nuan udah ngirumka Aku.

⁹ Aku besampika sida. Aku ukai besampika dunya, tang ke sida ke udah diberi Nuan ngagai Aku, laban sida endang enggi Nuan.

¹⁰Semua utai Aku endang enggi Nuan magang, lalu semua utai Nuan endang enggi Aku magang, lalu Aku udah dimuliaka dalam sida.

¹¹ Lalu diatu Aku nadai agi di dunya, tang sida agi mengkang di dunya, lalu Aku mupuk ngagai Nuan. Apai ti Kudus, jaga sida ngena kuasa nama Nuan, nama ti udah diberi Nuan ngagai Aku, ngambika sida nyadi siku, baka Tua ke endang siku.

¹² Lebuh Aku agi enggau sida, Aku udah nyaga sida ngena kuasa nama Nuan, nama ti udah diberi Nuan ngagai Aku. Aku udah nyaga sida, lalu nadai siku sida lenyau, kelimpah ari siku ke endang diletak deka lenyau, ngambika Bup Kudus dikamatka.

¹³Tang diatu Aku deka datai ngagai Nuan, lalu Aku nyebut utai tu di dunya tu, ngambika pengaga Aku nyadi pemadu chukup dalam sida.

¹⁴ Aku udah meri pesan Nuan ngagai sida, lalu dunya udah begedika sida, laban sida ukai enggi dunya, baka Aku ke ukai enggi dunya.

¹⁵Aku ukai minta Nuan ngambi sida ari dunya, tang minta Nuan nyaga sida ari iya ti jai.[117]

¹⁶Sida ukai enggi dunya, baka Aku ke ukai enggi dunya.

¹⁷Kuduska sida dalam pemendar. Jaku Nuan nya pemendar.

¹⁸Baka Nuan ke udah ngirumka Aku ngagai dunya, baka nya mega Aku ngirumka sida ngagai dunya.

¹⁹Lalu ketegal sida, Aku nguduska Diri Empu, ngambika sida mega dikuduska dalam pemendar.

²⁰“Aku ukai semina besampika sida aja, tang mega besampi ke orang ke arapka Aku ulih pesan ti dibai sida,

²¹ngambika semua sida nyadi siku. Baka Nuan, Apai, ke dalam Aku, lalu Aku dalam Nuan, awakka sida mega dalam Tua, ngambika dunya arapka Nuan udah ngirumka Aku.

²²Mulia ti udah diberi Nuan ngagai Aku, udah diberi Aku ngagai sida, ngambika sida nyadi siku, baka Tua ke endang siku,

²³Aku dalam sida, lalu Nuan dalam Aku, ngambika sida nyadi siku, ngambika dunya nemu Nuan udah ngirumka Aku, lalu udah rinduka sida, baka Nuan ke udah rinduka Aku.

²⁴ Apai, Aku mega dekaka sida ke udah diberi Nuan ngagai Aku, begulai enggau Aku ba endur alai Aku diau, ngambika sida meda mulia Aku ti udah diberi Nuan ngagai Aku laban Nuan udah rinduka Aku kenyau ari sebedau dunya digaga.

²⁵Apai ti lurus! Dunya enda ngelala Nuan, tang Aku ngelala Nuan, lalu sida nemu Nuan udah ngirumka Aku.

²⁶Aku udah madahka nama Nuan ngagai sida, lalu Aku deka majak ngasuh sida nemu nama Nuan, ngambika pengerindu Nuan ke Aku bisi dalam sida, lalu Aku dalam sida.”