Read Iban John 18 Bible Online

John 18 - Iban bible

John 18

¹ Lebuh Jesus udah badu besampi, Iya enggau sida murid Iya lalu meraka Lebak Kidron, ngagai siti endur ti bisi sebidang kebun. Jesus enggau murid Iya lalu tama ngagai kebun nya.

²Nyadi Judas, ke udah nyual Iya, mega nemu endur nya, laban Jesus udah suah begempuru dia enggau sida murid Iya.

³ Nya alai Judas mai seraban soldadu, enggau bala polis ari sida tuai imam enggau orang Parisi, lalu sida datai dia bebaika lampu, sempun enggau senyata.

⁴ Udah nya Jesus, ke nemu semua utai ti deka nyadi ba Iya, mansang ke mua lalu nanya sida, “Sapa orang ke digiga kita?”

⁵Sida lalu nyaut, “Jesus orang Nasaret.”[118] Jesus lalu nyaut, “Aku meh tu.” Judas, ke nyual Iya, bisi bediri dia enggau sida.

⁶Lebuh Jesus nyebut ngagai sida, “Aku meh tu,” sida nyurutka diri lalu rebah ke tanah.

⁷Iya lalu nanya sida baru, “Sapa orang ke digiga kita?” Sida lalu nyaut Iya, “Jesus orang Nasaret.”[119]

⁸Jesus lalu nyaut sida, “Aku udah madahka Diri ngagai kita. Nya alai, enti kita ngiga Aku, lepaska sida tu.”

⁹Tu ngamatka jaku ti udah disebut Iya, “Nadai siku sida ke udah diberi Nuan ngagai Aku, lenyau.”

¹⁰Simon Peter, ke bisi mai pedang, lalu nyintak pedang iya, lalu mantap ulun imam besai, mutuska pending kanan iya. Nama ulun nya Malkus.

¹¹ Jesus lalu bejaku ngagai Peter, “Selitka pedang nuan! Kati Aku enda tau ngirup mangkuk ti udah diberi Apai ngagai Aku?”

¹² Bala soldadu enggau kepala sida, enggau bala polis orang Judah nangkap Jesus, lalu nanchang Iya.

¹³Terubah, sida mai Iya ngagai Anas, mentua lelaki Kaiapas ke nyadi imam besai ke taun nya.

¹⁴ Kaiapas nya meh orang ke udah meri jaku lalau ngagai orang Judah, madahka manah agi enti siku orang mati ngarika semua orang mayuh.

¹⁵Simon Peter enggau siku murid ti bukai nitihka Jesus. Laban murid ke siku nya dikelala imam besai, iya tama enggau Jesus ngagai tengah laman rumah imam besai,

¹⁶tang Peter bediri di luar, ba mua pintu. Nya alai murid ke siku nya, ke dikelala imam besai, pansut lalu bejaku enggau indu ke nyaga mua pintu, lalu mai Peter tama.

¹⁷ Indu ke nyaga mua pintu nya lalu bejaku ngagai Peter, “Nuan tu siku ari murid orang nya, ukai enda?” “Ukai,” ku Peter nyaut.

¹⁸Nyadi bala orang gaji enggau orang polis udah nungkun api, laban hari chelap, lalu sida bediri bekindu ngelingi api nya. Peter mega bediri bekindu enggau sida.

¹⁹Imam besai lalu nanya Jesus pasal sida murid Iya, enggau pasal ajar Iya.

²⁰Disaut Jesus, “Aku udah bejaku enggau terang di mua semua orang. Aku udah seruran ngajar dalam balai gempuru enggau dalam Rumah Sembiang, alai orang Judah ke begempuru. Aku nadai kala belalai bejaku.

²¹Nama kebuah nuan nanya Aku? Tanya orang ke udah ninga Aku pasal jaku ti disebut Aku ngagai sida. Sida nemu utai ti udah disebut Aku.”

²²Lebuh Jesus udah nyebut nya, siku polis lalu nampar mua Iya, ku polis nya bejaku, “Kati nya jalai Nuan nyaut imam besai?”

²³ Jesus lalu nyaut iya, “Enti Aku udah salah jaku, padahka penyalah nya ngagai Aku. Tang enti Aku nadai udah salah jaku, nama kebuah nuan nampar Aku?”

²⁴ Anas lalu ngasuh orang mai Jesus, ke mengkang ditanchang, ngagai Imam Besai Kaiapas.

²⁵Nyadi Peter benung bediri bekindu. Sida lalu nanya iya, “Nuan tu siku ari murid orang nya, ukai enda?” Peter lalu besangkal. “Ukai.”

²⁶Siku ulun imam besai, kaban belayan orang ke udah putus pending dipantap Peter, lalu nanya, “Ukai enda nuan tu ke dipeda aku dalam kebun nya tadi?”

²⁷Peter lalu besangkal baru. Lebuh maya nya manuk lalu mengkukuk.

²⁸Sida lalu mai Jesus ari rumah Kaiapas, ngagai istana gabenor.[120] Hari lebuh maya nya agi tumu pagi. Sida enda tama ngagai istana,[121] enggai ke sida enda tuchi lalu enda ulih makai pemakai Gawai Paska.

²⁹ Nya alai Pilate pansut ke luar ngagai sida, lalu nanya, “Nama dawa kena kita ngelaban orang tu?”

³⁰Disaut sida. “Enti orang tu nadai udah ngereja penyalah, kami tentu enda nyerahka Iya kitu ngagai nuan.”

³¹Pilate lalu bejaku ngagai sida, “Bai Iya ari tu ulih kita, lalu akim Iya nitihka adat kita empu.” Sida orang Judah lalu nyaut, “Kami enda tau munuh orang.” (

³² Tu ngamatka jaku Jesus Empu, lebuh Iya madahka gaya pemati ti deka ditatka Iya.)

³³Pilate lalu pulai baru ke dalam istana,[122] ngangauka Jesus, lalu nanya Iya, “Kati Nuan Raja orang Judah?”

³⁴Disaut Jesus, “Kati nuan nyebut nya ari ati nuan empu, tauka orang bukai bisi udah madah ngagai nuan pasal Aku?”

³⁵Pilate lalu nyaut, “Kati aku tu orang Judah? Bansa Nuan Empu enggau sida tuai imam udah nyerahka Nuan ngagai aku. Nama utai ti udah dikereja Nuan?”

³⁶ Disaut Jesus, “Perintah Aku ukai ari dunya tu. Enti perintah Aku ari dunya tu, bala orang ke nitihka Aku tentu deka ngelaban ngambika Aku enda diserahka ngagai orang Judah. Tang perintah Aku ukai ari dunya tu.”

³⁷ Pilate lalu nanya Iya, “Reti nya Nuan tu Raja?” Disaut Jesus, “Nuan ngumbai Aku Raja. Nya meh kebuah Aku ada, lalu ketegal nya meh Aku udah datai ngagai dunya, ngambika Aku besaksika pasal pemendar. Semua nembiak pemendar mendingka nyawa Aku.”

³⁸ Pilate lalu nanya Iya, “Nama utai ti dikumbai pemendar?” Lebuh Pilate udah nyebut nya, iya pansut baru ke luar ngagai orang Judah, lalu madah ngagai sida, “Aku nadai nemu penyalah Iya.

³⁹Tang kita bisi siti adat asal ti ngasuh aku ngelepaska siku orang tutup ke kita lebuh Gawai Paska. Kati kita dekaka Aku ngelepaska Raja orang Judah tu ke kita?”

⁴⁰Sida lalu manjung nyaut iya, “Ukai Iya, tang Barabas!” Nyadi Barabas nya siku perumpak.