Read Iban John 2 Bible Online

John 2 - Iban bible

John 2

¹ Dua hari udah bekau nya, orang bisi nikah di nengeri Kana, di menua Galili, lalu indai Jesus bisi dia.

²Jesus enggau sida murid Iya udah mega diambi ngabang ngagai gawai nya.

³ Lebuh wain nyau abis, indai Jesus lalu bejaku enggau Iya, “Wain sida udah abis.”

⁴Jesus lalu bejaku ngagai iya, “Indu,[9] nya ukai pekara nuan tauka pekara Aku.[10] Maya Aku apin datai.”

⁵Indai Iya lalu bejaku ngagai bala orang gaji, “Kereja aja sebarang utai ti diasuh Iya.”

⁶ Nyadi ba endur nya bisi enam igi benda alai nyimpan ai kena orang Judah nuchi diri. Sigi-sigi benda nya ulih ngundan kira 100 liter ai.

⁷Jesus lalu bejaku ngagai sida, “Isi semua benda nya enggau ai.” Sida lalu ngisi semua benda nya penuh enggau ai.

⁸Ku Iya bejaku ngagai sida, “Kauk ai nya, lalu bai ngagai tuai gawai.” Sida lalu mai ai nya ngagai tuai gawai.

⁹Lebuh tuai gawai nyepi ai nya, ti udah bebali nyadi wain, lalu enda nemu ari ni penatai wain nya (taja pen orang gaji ke ngauk ai nya nemu), tuai gawai nya lalu ngangauka lelaki ke benung ditikah,

¹⁰lalu bejaku ngagai iya, “Semua orang mantaika wain ti manah dulu, udah nya baru mantaika wain ti kurang agi nyamai, lebuh bala pengabang udah mabuk. Tang nuan udah naruh wain ti nyamai datai ke diatu!”

¹¹ Jesus ngereja kereja ajih ti keterubah nya di Kana, di menua Galili, alai Iya ke mandangka mulia Iya. Sida murid Iya lalu arapka Iya.

¹² Udah bekau nya, Iya enggau indai Iya, sida menyadi lelaki Iya, enggau sida murid Iya mupuk ngagai Kapernaum, lalu diau dia dua tiga hari.

¹³ Hari Gawai Paska orang Judah pen nyau semak, lalu Jesus mupuk ngagai Jerusalem.

¹⁴ Dalam Rumah Sembiang Iya tetemuka orang ke bejualka sapi, bedus, burung achang, enggau orang penukar wang duduk ba mija sida.

¹⁵Iya lalu ngaga siti penyipat ari tali, lalu muru semua sida, enggau jelu bedus enggau jelu sapi ari Rumah Sembiang. Iya mubuhka duit sida penukar wang, lalu nungkupka mija sida.

¹⁶ Lalu ku Iya bejaku enggau orang ke nyual burung achang, “Bai utai tu ke luar! Badu agi ngaga rumah Apai Aku nyadi rumah kedai!”

¹⁷ Sida murid Iya lalu ingatka utai ti udah ditulis, “Pengangkun Aku ke rumah Nuan, deka mau baka api dalam ati Aku.”

¹⁸ Bala tuai orang Judah lalu bejaku ngagai Iya, “Nama kereja ajih ti deka dikereja Nuan, kena nunjukka Nuan bisi hak ngereja utai tu?”

¹⁹ Disaut Jesus, “Rubuh Rumah Sembiang tu, lalu dalam tiga hari Aku deka nirika iya baru.”

²⁰Orang Judah lalu bejaku ngagai Iya, “Empat puluh taun orang ngaga Rumah Sembiang tu, lalu Nuan deka nirika iya baru dalam tiga hari?”

²¹ Tang Rumah Sembiang ti ku Jesus nya tubuh Iya Empu.

²² Nya alai, lebuh Iya diangkatka ari mati, sida murid Iya ingatka Iya ke udah nyebut nya. Sida lalu arapka Bup Kudus, sereta arapka jaku ti udah disebut Jesus.

²³Lebuh Jesus benung di Jerusalem lebuh Gawai Paska, mayuh orang arapka Iya[11] lebuh sida meda kereja ajih ti dikereja Iya.

²⁴Tang Jesus enda arapka sida, laban Iya nemu semua mensia,

²⁵ lalu Iya enda begunaka orang besaksika pasal mensia, laban Iya Empu nemu utai ti dalam ati semua mensia.