Read Iban John 20 Bible Online

John 20 - Iban bible

John 20

¹Tumu pagi hari Minggu, lebuh hari agi petang, Maria Magdalin mansang ngagai kubur, lalu meda batu nya endang udah dibaringka ari mua kubur nya.

²Iya lalu belanda mansang ngagai Simon Peter, enggau ngagai siku murid ke dikerinduka Jesus, lalu madah ngagai seduai iya, “Sida udah ngambi Tuhan ari kubur, lalu kami enda nemu endur alai sida udah ngengkahka Iya!”

³ Peter enggau murid nya mupuk lalu mansang ngagai kubur.

⁴Seduai iya sama belanda, tang murid ti siku nya laju agi ari Peter, lalu dulu agi datai ba kubur.

⁵Iya engkenduk lalu nilik ke dalam kubur, lalu tepedaka kain linin ti dikena mungkus Jesus, tang iya enda tama.

⁶Udah nya Peter, ke datai dudi ari iya, tama ke dalam kubur nya, lalu tepedaka kain linin nya dia,

⁷enggau kain ti udah dikena mungkus pala Jesus. Kain nya digulungka kediri, enda digulungka sama enggau kain linin.

⁸Udah nya murid ti siku nya, ke dulu agi datai ba kubur nya, mega tama. Iya meda, lalu arap,

⁹ laban nyentuk ngagai maya nya, seduai iya apin meretika Bup Kudus ti madahka Jesus enda tau enda angkat ari mati.

¹⁰Udah nya murid ke dua iku nya lalu pulai.

¹¹Tang Maria bediri nyabak di luar kubur. Lebuh iya nyabak, iya engkenduk lalu nilik ke dalam kubur.

¹² Iya lalu tepedaka dua iku melikat ke ngena gari burak, duduk ba endur alai bangkai Jesus udah digalika, siku muak ari pala, lalu siku muak ari kaki.

¹³ Ku seduai iya bejaku ngagai Maria, “Indu, nama kebuah nuan nyabak?” Maria lalu bejaku ngagai seduai iya, “Sida udah ngambi Tuhan aku, lalu aku enda nemu dini alai sida udah engkah Iya!”

¹⁴ Lebuh Maria udah nyebut nya, iya nguing, lalu tepedaka Jesus bediri dia, tang iya enda ngelala orang nya Jesus.

¹⁵Jesus lalu bejaku ngagai iya, “Indu, nama kebuah nuan nyabak? Sapa digiga nuan?” Maria ngumbai orang nya tukang kebun, nya alai ku iya bejaku, “Tuan, enti nuan udah mai Iya kebukai, padahka ngagai aku endur alai nuan udah ngengkahka Iya, ngambika aku ngambi Iya.”

¹⁶Jesus lalu bejaku ngagai iya, “Maria!” Maria nguing lalu bejaku ngagai Iya ngena jaku orang Hebrew, “Rabbouni!”[124] (Reti nya “Pengajar.”)

¹⁷ Ku Jesus bejaku ngagai iya, “Anang megai Aku, laban Aku apin niki ngagai Apai. Tang mupuk nuan ngagai sida menyadi Aku, lalu padahka ngagai sida, Aku niki ngagai Apai Aku enggau Apai kita, ngagai Allah Taala Aku enggau Allah Taala kita.”

¹⁸ Maria Magdalin mupuk lalu madah ngagai sida murid, “Aku udah meda Tuhan.” Iya lalu madah ngagai sida utai ti udah disebut Tuhan ngagai iya.

¹⁹Lemai hari Minggu nya, lebuh pintu udah ditutup ba endur alai sida murid begempuru laban sida takutka orang Judah, Jesus datai, lalu bediri ba tengah-tengah sida, lalu bejaku ngagai sida, “Awakka pemaik meruan enggau kita.”

²⁰Lebuh Iya udah nyebut nya, Iya mandangka jari enggau rusuk Iya ngagai sida. Sida murid lalu gaga ati meda Tuhan.

²¹ Jesus lalu bejaku baru ngagai sida, “Awakka pemaik meruan enggau kita. Baka Apai ke udah ngirumka Aku, baka nya mega Aku ngirumka kita.”

²² Lebuh Iya udah nyebut nya, Iya ngesuhka seput ngagai sida, lalu bejaku enggau sida “Terima meh Roh Kudus.

²³ Enti kita ngampun dosa orang, orang nya diampun ari dosa sida. Enti kita enda ngampun dosa orang, sida enda diampun.”

²⁴ Tang Thomas (ke dikumbai Besapit),[125] siku ari sida ke dua belas, nadai enggau sida lebuh Jesus datai.

²⁵Nya alai sida murid ti bukai madah ngagai iya, “Kami udah meda Tuhan!” Tang ku Thomas bejaku ngagai sida, “Enti aku enda meda abi paku lawang ba jari Iya, lalu ngachukka tunjuk aku ngagai abi paku lawang nya, lalu ngengkahka jari aku ba rusuk Iya, aku enggai arap.”

²⁶Seminggu udah bekau nya, sida murid Iya begempuru baru ba rumah nya, lalu Thomas bisi enggau sida. Taja pen pintu udah ditutup, tang Jesus datai lalu bediri ba tengah-tengah sida, lalu bejaku, “Awakka pemaik meruan enggau kita.”

²⁷ Iya lalu bejaku ngagai Thomas, “Engkahka tunjuk nuan ditu, lalu peda jari Aku. Unjur lalu engkahka jari nuan ba rusuk Aku. Anang kakang ati, tang arap!”

²⁸Thomas lalu nyaut Iya, “Tuhan aku, Allah Taala aku!”

²⁹ Jesus lalu nyebut ngagai iya, “Kati nuan arap laban nuan udah meda Aku? Beberekat meh orang ke arap, taja pen sida enda meda Aku!”

³⁰ Jesus ngereja mayuh kereja ajih ti bukai di mua sida murid Iya, ti enda dituliska dalam bup tu.

³¹ Tang utai tu ditulis ngambika kita arapka[126] Jesus nya Kristus,[127] Anak Allah Taala, lalu ulih pengarap kita ke Iya, kita tau bulih pengidup dalam nama Iya. [128]