Read Iban John 21 Bible Online

John 21 - Iban bible

John 21

¹Udah nya, Jesus mandangka Diri baru ngagai sida murid Iya ba tebing Tasik Tiberias. Baka tu ku jalai Iya mandangka Diri.

² Nyadi Simon Peter, Thomas (ke dikumbai Besapit),[129] Natanel (ke datai ari nengeri Kana di Galili), anak Sebedi ke dua iku, enggau dua iku murid ti bukai, begempuru.

³ Simon Peter lalu bejaku ngagai sida, “Aku deka berikan.” Sida lalu nyebut, “Kami pen ka meh enggau nuan.” Sida mupuk lalu nepan sebuah perau, tang malam nya sida nadai bulih utai.

⁴ Lebuh mata panas baru tumbuh, Jesus bediri ba tebing, tang sida murid enda ngelala orang nya Jesus.

⁵ Jesus lalu bejaku ngagai sida, “Anak, bisi bulih utai?” Sida lalu nyaut, “Nadai.”

⁶ Iya lalu bejaku ngagai sida, “Tibarka jala kita ari tisi kanan perau. Nya baru kita deka bulih ikan.” Sida lalu nibarka jala sida, lalu sida enda ulih narit jala nya, empa pemayuh ikan.

⁷ Murid ke dikerinduka Jesus lalu bejaku ngagai Peter, “Tuhan nya!” Lebuh Simon Peter ninga orang nya Tuhan, iya lalu ngerasukka serayung iya (laban iya udah muka serayung iya) lalu terejun ke ai.

⁸Tang sida murid ti bukai mansang ke tebing ngena perau nya, narit jala ti penuh laban ikan, laban sida enda jauh ari tebing, semina kira seratus meter aja.

⁹Lebuh sida udah niki ke tebing, sida meda api endang udah menyadi lalu ikan enggau roti benung dipanggang ba api nya.

¹⁰Jesus lalu bejaku ngagai sida, “Bai kitu sekeda ikan ti baru udah ulih kita nya.”

¹¹Simon Peter lalu nepan ngagai perau nya, lalu narit jala nya ke tebing, penuh laban ikan ti besai, seratus lima puluh tiga iku semua ikan nya. Tang taja pen ikan nya mayuh, jala nya enda charik.

¹²Ku Jesus bejaku ngagai sida, “Aram makai.” Siku pen nadai ga sida murid berani nanya Iya, “Sapa Nuan tu?” laban sida nemu Iya endang amat Tuhan.

¹³Jesus mansang ngagai sida, ngambi roti, lalu nyuaka roti nya ngagai sida. Iya mega nyuaka ikan ngagai sida.

¹⁴ Tu ketiga kali Jesus udah mandangka Diri ngagai sida murid udah bekau Iya ke diangkatka ari mati.

¹⁵ Lebuh sida udah badu makai, Jesus lalu bejaku ngagai Simon Peter, “Simon anak John, kati nuan rinduka Aku lebih ari sida ti bukai tu rinduka Aku?” Disaut Peter, “Sigi amat, Tuhan. Nuan nemu aku rinduka Nuan.” Lalu ku Jesus bejaku ngagai iya, “Beri anak domba Aku makai.”

¹⁶ Jesus lalu nanya iya kedua kali, “Simon anak John, kati nuan rinduka Aku?” Peter lalu nyaut Iya, “Sigi amat, Tuhan. Nuan nemu aku rinduka Nuan.” Jesus lalu bejaku ngagai iya, “Ibun bedus Aku.”

¹⁷Jesus lalu nanya iya ketiga kali, “Simon anak John, kati nuan rinduka Aku?” Peter lalu tusah ati laban Jesus nanya iya ketiga kali, “Kati nuan rinduka Aku?” Nya alai ku iya bejaku ngagai Jesus, “Tuhan, Nuan nemu semua utai. Nuan nemu aku rinduka Nuan!” Jesus lalu bejaku ngagai iya, “Beri bedus Aku makai.

¹⁸Enggau bendar Aku madah ngagai nuan, lebuh nuan agi biak, nuan nanchangka belulang ke diri empu, lalu nuan bejalai ngagai sebarang endur nuan deka. Tang lebuh nuan nyau tuai, nuan deka ngunjurka jari nuan, lalu orang bukai deka nanchangka belulang ba nuan, lalu mai nuan ngagai endur ti enggai digusung nuan.”

¹⁹(Jesus nyebut nya kena Iya madahka gaya pemati Peter kena Peter ngemuliaka Allah Taala.) Udah nya Jesus lalu bejaku ngagai iya, “Titihka Aku!”

²⁰ Peter nguing, lalu tepedaka murid ke dikerinduka Jesus, nitihka seduai iya. Nya meh murid ke udah duduk semak Jesus lebuh sida makai, lalu udah nanya, “Tuhan, sapa orang ke deka nyual Nuan?”

²¹Lebuh Peter meda murid nya, iya lalu bejaku ngagai Jesus, “Tuhan, kati ku baka iya?”

²² Jesus lalu nyebut ngagai Peter, “Enti ari peneka Aku iya mengkang idup nyentuk ngagai maya Aku datai, baka ni ku nya tau ngawa nuan? Titihka Aku!”

²³Nya alai berita pasal nya lalu ngelekai ba bala orang ke nitihka Jesus, madahka murid nya enda nemu mati. Tang Jesus nadai madahka murid nya enda nemu mati. Utai ti ku Jesus nya, “Enti ari peneka Aku iya mengkang idup nyentuk ngagai maya Aku datai, baka ni ku nya tau ngawa nuan?”

²⁴ Iya nya meh murid ke besaksi lalu udah nuliska utai tu, lalu kami nemu, saksi iya amat magang.

²⁵ Tang mayuh mega utai bukai udah dikereja Jesus. Enti sema semua utai nya dituliska magang, jangka aku, dunya tu pen enda meh umbas alai nyimpan semua bup ti deka ditulis nya.