Read Iban John 6 Bible Online

John 6 - Iban bible

John 6

¹Udah bekau nya Jesus lalu ngelayang ke seberai Danau Galili (mega dikumbai Tasik Tiberias).

²Mayuh amat orang majak nitihka Iya, laban sida udah meda kereja ajih ti dikereja Iya ba orang ke sakit.

³Jesus niki ngagai bukit sigi, lalu duduk enggau sida murid Iya.

⁴Nyadi Gawai Paska, iya nya gawai orang Judah, nyau semak.

⁵ Lebuh Iya malik lalu tepedaka mayuh amat orang mansang ngagai Iya, Iya lalu bejaku ngagai Philip, “Dini alai kitai meli pemakai chukup ke semua orang tu?”

⁶Iya nyebut nya kena Iya nguji Philip, laban Iya nemu utai ti deka dikereja Diri.

⁷Philip lalu nyaut Iya, “Gaji enam bulan[31] pen enda meh chukup kena meli roti ke sida tu datai ke semua sida ampit mimit siku-siku.”

⁸ Siku ari murid Iya, Andrew, menyadi Simon Peter, lalu bejaku ngagai Iya,

⁹ “Siku nembiak ditu bisi lima iti tuku roti barli,[32] enggau dua iku ikan. Tang baka ni ku nya tau chukup ke orang ke ngemayuh tu?”

¹⁰Jesus lalu bejaku, “Asuh orang mayuh[33] duduk.” Nyadi ba endur nya mayuh rumput. Nya alai semua orang mayuh duduk. Pemayuh sida kira lima ribu iku.

¹¹Jesus lalu ngambi tuku roti nya, lalu lebuh Iya udah meri terima kasih, Iya nyadung roti nya ngagai sida ke duduk. Baka nya mega ikan, nitihka penyampau ti dikedekaka sida.

¹²Lebuh sida udah kenyang magang, Iya lalu bejaku ngagai sida murid Iya, “Gumpul semua teda pemakai nya, ngambika enda tebasau ngapa.”

¹³Nya alai sida ngumpul dua belas bakul penuh teda ari lima iti tuku roti barli ti udah diempa orang mayuh.

¹⁴ Lebuh orang mayuh meda kereja ajih ti udah dikereja Jesus, sida lalu belabuh bejaku, “Orang tu amat nabi[34] ke dianti datai ngagai dunya!”

¹⁵ Lebuh Jesus nemu sida baru deka datai lalu mejalka Iya nyadi raja, Iya niki ngagai bukit baru, keDiri Iya aja.

¹⁶Lebuh hari nyau lemai, sida murid Iya lalu nurun ngagai danau,

¹⁷nepan sebuah perau, lalu ngelayang ke seberai ngagai Kapernaum. Hari nyau udah petang, lalu Jesus mengkang apin datai ngagai sida.

¹⁸Tasik lalu begelumbang, laban ribut balat amat nyadi.

¹⁹Lebuh sida udah bedayung kira tiga tauka empat batu, sida tepedaka Jesus bejalai ba atas ai, mansang semak ngagai perau sida. Sida lalu balat amat takut.

²⁰Tang ku Iya bejaku ngagai sida, “Aku tu. Anang takut.”

²¹Sida lalu deka mai Iya nepan perau. Tekala nya perau nya lalu sangkai ba tebing ti digagai sida.

²²Hari siti, bala orang ke tinggal di seberai danau nya, meda semina sebuah aja perau bisi dia. Sida mega nemu Jesus enda nepan perau nya enggau sida murid Iya, tang sida udah mupuk kediri.

²³Udah nya perau ari Tiberias datai semak endur alai sida ke makai roti udah bekau Tuhan ke meri terima kasih.[35]

²⁴Nya alai lebuh orang mayuh nemu Jesus enggau bala murid Iya sama nadai dia, sida lalu nepan perau, lalu mupuk ngagai Kapernaum, ngiga Jesus.

²⁵Lebuh sida nemu Jesus di seberai danau nya, sida lalu bejaku ngagai iya, “Pengajar, kemaya Nuan datai ditu?”

²⁶Ku Jesus nyaut sida, “Enggau bendar Aku madah ngagai kita, kita ngiga Aku, ukai laban kita udah meda kereja ajih, tang laban kita udah kenyang makai roti.

²⁷ Anang bekereja ngulihka pemakai ti nemu buruk, tang bekereja ngulihka pemakai ti tan, ti meri pengidup ti meruan belama iya. Pemakai nya deka diberi Anak Mensia ngagai kita, laban Allah Taala ti Apai udah ngasuh Iya ngereja nya.”

²⁸Sida lalu nanya Iya, “Nama utai ti patut dikereja kami ngambika kami ngereja peneka Allah Taala?”

²⁹ Ku Jesus nyaut, “Tu utai ti diasuh Allah Taala kereja kita: arapka Iya ke udah dikirumka Iya.”

³⁰ Sida lalu bejaku ngagai Iya, “Enti pia, nama tanda ti deka diberi Nuan ngambika kami meda lalu arapka Nuan? Nama utai ti deka dikereja Nuan?

³¹ Aki ini kami makai mana di menua puang. Munyi ti udah ditulis, ‘Iya meri sida roti ari serega ke diempa sida.’ ”

³²Jesus lalu bejaku ngagai sida, “Enggau bendar Aku madah ngagai kita, ukai Moses ke meri kita roti ari serega, tang Apai Aku ke meri kita roti ti bendar ari serega.

³³Laban roti Allah Taala nya Iya ke nurun ari serega, lalu meri pengidup ngagai dunya.”

³⁴ Ku sida bejaku ngagai Iya, “Tuhan, beri roti nya ngagai kami berari.”

³⁵ Ku Jesus bejaku ngagai sida, “Aku tu meh roti pengidup. Barang sapa datai ngagai Aku, enda agi lapar, lalu barang sapa arapka Aku, enda agi aus.

³⁶Tang munyi ti udah disebut Aku ngagai kita, kita udah meda Aku tang agi ga kita mengkang enda arap.

³⁷ Semua utai ti diberi Apai ngagai Aku, deka datai ngagai Aku, lalu barang sapa datai ngagai Aku sigi enda ditulak Aku,

³⁸laban Aku udah datai ari serega, ukai deka ngereja peneka Aku Empu, tang ngereja peneka Iya ke ngirumka Aku.

³⁹ Lalu tu peneka Iya ke ngirumka Aku: Aku enda tau ngelenyauka indah siku ari semua orang ke udah diberi Iya ngagai Aku, tang ngangkatka iya ba hari ti penudi.

⁴⁰ Tu meh peneka Apai Aku, iya nya, semua orang ke meda Anak, lalu arapka Iya, bulih pengidup ti meruan belama iya, lalu Aku deka ngangkatka iya ba hari ti penudi.”

⁴¹Orang Judah lalu mutap pasal Iya, laban Iya udah nyebut, “Aku tu meh roti ti nurun ari serega.”

⁴² Ku sida bejaku, “Ukai enda Iya tu Jesus anak Josep, lalu kitai ngelala apai indai Iya? Baka ni ku Iya diatu nyebut, ‘Aku udah nurun ari serega’?”

⁴³Jesus lalu nyaut sida, “Anang mutap.

⁴⁴ Nadai orang ulih datai ngagai Aku enti Apai ke udah ngirumka Aku, enda ngasuh iya, lalu Aku deka ngangkatka iya ba hari ti penudi.

⁴⁵ Endang udah ditulis dalam bup sida nabi, ‘Lalu semua sida deka diajar Allah Taala.’ Genap iku orang ke udah ninga lalu belajar ari Apai, datai ngagai Aku.

⁴⁶ Ukai reti nya orang bisi udah meda Apai, kelimpah ari Iya ke datai ari Allah Taala. Semina Iya aja ke udah meda Apai.

⁴⁷Enggau bendar Aku madah ngagai kita, barang sapa arap deka bulih pengidup ti meruan belama iya.

⁴⁸Aku tu meh roti pengidup.

⁴⁹Aki ini kita makai mana di menua puang, tang sida mati.

⁵⁰Tu roti ti nurun ari serega, ngambika orang makai iya lalu enda mati.

⁵¹Aku tu roti ti idup, ke nurun ari serega. Barang sapa makai roti tu deka idup belama iya, lalu roti ti deka diberi Aku kena ngidupka dunya nya tubuh Aku Empu.”

⁵² Orang Judah lalu bekelikuh enggau pangan diri. Ku sida, “Baka ni ku orang tu ulih meri isi Diri ke diempa kitai?”

⁵³Jesus lalu bejaku ngagai sida, “Enggau bendar Aku madah ngagai kita, enti kita enda makai tubuh[36] Anak Mensia, lalu enda ngirup darah Iya, kita nadai pengidup dalam kita.

⁵⁴Orang ke makai tubuh Aku, lalu ngirup darah Aku, bisi pengidup ti meruan belama iya, lalu Aku deka ngangkatka sida ba hari ti penudi,

⁵⁵laban tubuh Aku nya pemakai ti bendar, lalu darah Aku nya ai irup ti bendar.

⁵⁶ Orang ke makai tubuh Aku, lalu ngirup darah Aku, meruan dalam Aku, lalu Aku meruan dalam sida.

⁵⁷Baka Apai ti idup udah ngirumka Aku, lalu Aku idup laban Apai, baka nya mega orang ke makai Aku deka idup laban Aku.

⁵⁸ Tu meh roti ti nurun ari serega, ukai baka roti ti diempa aki ini kita, tang sida mati. Tang orang ke makai roti tu deka idup belama iya.”

⁵⁹ Iya nyebut nya lebuh Iya ngajar dalam balai gempuru di Kapernaum.

⁶⁰Lebuh mayuh ari bala sida murid Iya ninga nya, sida lalu bejaku, “Ajar tu kelalu mar. Sapa ulih nerima ajar tu?”

⁶¹ Tang Jesus nemu sida murid Iya mutapka ajar nya, lalu ku Iya bejaku ngagai sida, “Kati kita enda nyamai ati ninga jaku nya?

⁶² Enti pia, kati enti kita meda Anak Mensia niki ngagai endur Iya ti suba?

⁶³ Roh aja ke meri pengidup; kuasa mensia enda ulih ngereja utai. Jaku ti udah disebut Aku ngagai kita, nya Roh enggau pengidup.[37]

⁶⁴ Tang sekeda kita enda arap.” Laban Jesus nemu kenyau ari pun, sapa ke enda arap, lalu sapa ke deka nyual Iya.

⁶⁵ Lalu ku Iya bejaku, “Nya meh kebuah Aku udah madah ngagai kita, nadai orang ulih datai ngagai Aku, enti Apai enda ngeletak iya.”

⁶⁶Ketegal nya, mayuh murid Jesus ninggalka Iya, lalu enggai agi bejalai enggau Iya.

⁶⁷Nya alai Iya lalu bejaku ngagai sida ke dua belas, “Kati kita deka mega ninggalka Aku?”

⁶⁸ Simon Peter lalu nyaut Iya, “Tuhan, sapa patut digagai kami? Nuan ngembuan jaku ti meri pengidup ti meruan belama iya.

⁶⁹Kami udah arap lalu nemu, Nuan tu meh Anak Allah Taala ti kudus.”[38]

⁷⁰ Ku Jesus nyaut sida, “Aku udah milih kita ke dua belas, ukai enda? Tang taja pia, siku ari kita nya sitan?”

⁷¹ Iya bejakuka pasal Judas anak Simon Iskariot,[39] laban Judas, siku ari sida ke dua belas, deka nyual Iya.