Read Iban John 7 Bible Online

John 7 - Iban bible

John 7

¹Udah bekau nya Jesus bejalai ba sebelah menua Galili. Iya enggai[40] bejalai di menua Judea, laban bala tuai orang Judah dia ngiga peluang deka munuh Iya.

² Gawai Belangkau nyau deka nyadi.

³ Nya alai sida menyadi Iya lalu bejaku ngagai Iya, “Angkat ari tu lalu mansang ngagai menua Judea, ngambika sida murid Nuan mega meda pengawa ti dikereja Nuan;

⁴laban nadai orang ngelalaika pengawa diri, enti iya deka minta diri ditemu orang. Enti Nuan ngereja utai nya, pandangka Diri ngagai dunya!” (

⁵Indah sida menyadi Iya deh enda arapka Iya.)

⁶ Ku lalu bejaku ngagai sida, “Maya Aku apin datai. Tang maya kita endang seruran bisi.

⁷ Dunya enda ulih begedika kita, tang iya begedika Aku, laban Aku besaksi ngelaban iya, madahka pengawa iya jai.

⁸Awakka kita aja meh mupuk ngagai gawai nya; Aku enda [41], laban maya Aku apin datai.”

⁹Lebuh Iya udah nyebut nya, Iya lalu ninggalka Diri di Galili.

¹⁰Tang lebuh sida menyadi lelaki Iya udah mupuk ngagai gawai nya, nya baru Iya Empu mupuk, ukai ngayanka Diri, tang belalai.

¹¹Bala tuai orang Judah begigaka Iya ba gawai nya. Ku sida, “Dini alai Iya?”

¹² Mayuh orang mut-mut bejakuka pasal Iya. Tang ku sekeda sida, “Iya orang ke badas.” Kenu ku sekeda sida ti bukai, “Ukai. Iya nipu orang mayuh.”

¹³ Tang nadai siku orang berani bejaku inggar pasal Iya, laban sida takutka tuai orang Judah.

¹⁴Kira ba setengan gawai nya, Jesus mansang ngagai Rumah Sembiang lalu belabuh ngajar.

¹⁵Bala tuai orang Judah balat amat alit ati. Ku sida, “Baka ni ku orang ke nadai kala besekula tu ngemayuh nya penemu?”

¹⁶Jesus lalu nyaut sida, “Ajar ti dibai Aku ukai enggi Aku, tang enggi Iya ke ngirumka Aku.

¹⁷Barang sapa bebendar deka ngereja peneka Allah Taala, deka nemu sekalika jaku ajar nya datai ari Allah Taala, tauka Aku bejaku ngatika Diri[42]

¹⁸Orang ke bejaku ngatika diri, semina ngemuliaka diri empu. Tang orang ke keran deka ngemuliaka Iya ke ngirumka Iya, nya meh orang ke lurus ati, lalu iya nadai utai ti bula dalam iya.

¹⁹ Ukai enda Moses ke meri kita Adat? Tang taja pia, nadai siku kita ngasika Adat. Nama kebuah kita begigaka peluang munuh Aku?”

²⁰ Orang mayuh lalu nyaut, “Nuan tu dirasuk antu! Sapa nguji munuh Nuan?”

²¹ Ku Jesus nyaut sida, “Aku ngereja siti kereja ajih, lalu semua kita balat amat alit ati.

²² Moses meri kita adat betutus (iya ti bendar, ukai Moses tang aki ini kita ke meri adat nya), lalu kita nutus orang lebuh hari Sabat.

²³ Enti orang ditutus lebuh hari Sabat, ngambika kita enda ngelanggar adat Moses, nama kebuah kita pedis ati ngagai Aku ketegal Aku ngeraika semua tubuh orang nya lebuh hari Sabat?

²⁴ Anang ngakim beduduk ba utai ti dipeda, tang ngakim ngena pengelurus.

²⁵Sekeda orang Jerusalem bejaku, “Ukai enda Iya tu orang ke deka dibunuh sida?

²⁶Lalu Iya bisi ditu, bejaku di mua orang mayuh, tang sida nadai nyebut utai ngagai Iya! Kada enda bala tuai nemu Iya endang Kristus.[43]

²⁷ Tang kitai nemu ari ni penatai Iya; tang lebuh Kristus[44] datai, nadai orang nemu ari ni penatai Iya.”

²⁸ Jesus lalu bejaku enggau nyawa ti inggar lebuh Iya ngajar dalam Rumah Sembiang, “Kita ngelala Aku, lalu kita nemu ari ni penatai Aku. Aku ukai datai ari peneka Aku Empu, tang Iya ke ngirumka Aku endang tau dikarapka, lalu kita enda ngelala Iya.

²⁹ Aku ngelala Iya, laban Aku datai ari Iya, lalu Iya udah ngirumka Aku.”

³⁰ Sida lalu nguji nangkap Iya, tang nadai siku sida terengkah jari ba Iya, laban maya Iya apin datai.

³¹ Tang taja pia, mayuh orang arapka Iya. Ku sida, “Lebuh Kristus[45] datai, kati Iya deka ngereja mayuh agi kereja ajih ari ti udah dikereja orang tu?”

³²Lebuh orang Parisi ninga orang mayuh betegut bejakuka pasal Jesus, sida tuai imam enggau orang Parisi lalu ngasuh bala pemesai nangkap Iya.

³³ Ku Jesus bejaku, “Aku semina begulai enggau kita enda lama da agi. Udah nya Aku deka mupuk ngagai Iya ti udah ngirumka Aku.

³⁴Kita deka ngiga Aku, tang kita enda tetemuka Aku. Lalu kita enda ulih datai ngagai endur alai Aku.”

³⁵ Ku bala tuai orang Judah bejaku enggau pangan diri, “Kini ke tunga Iya deka mupuk alai kitai enda tetemuka Iya? Kati Iya deka mupuk ngagai mayuh bengkah nengeri orang Gerika, alai bansa kitai ke pambar, lalu ngajar orang Gerika?

³⁶Nama reti utai ti ku Iya lebuh Iya nyebut, ‘Kita deka ngiga Aku, tang kita enda tetemuka Aku,’ enggau ‘Kita enda ulih datai ngagai endur alai Aku’?”

³⁷ Ba hari ti penudi dalam gawai nya, iya nya hari ti pemadu besai, Jesus bediri, lalu bejaku enggau nyawa ti inggar, “Awakka semua orang ke aus datai ngagai Aku,

³⁸ lalu awakka orang ke arapka Aku,[46] ngirup. Munyi ti disebut Bup Kudus, ‘Ari ati[47] orang ke arap deka pansut ai ti meri pengidup.’ ”

³⁹ Jesus bejaku ngenang pasal Roh Kudus ti deka diterima orang ke arapka Iya. Laban lebuh maya nya, Roh Kudus apin diberi, laban Jesus apin dimuliaka.

⁴⁰ Lebuh sida ninga jaku nya, sekeda sida ke dalam tekang bala mayuh nya lalu bejaku, “Iya tu amat nabi nya!”[48]

⁴¹Ku sida ti bukai, “Iya tu Kristus!”[49] Tang ku sekeda orang bukai, “Nadai patut Kristus[50] datai ari Galili?

⁴² Ukai enda Bup Kudus madahka Kristus[51] nya peturun David, lalu datai ari Betlehem, nengeri ti udah alai David diau kelia?”

⁴³Nya alai orang mayuh beserekang penemu pasal Iya.

⁴⁴ Sekeda sida deka nangkap Iya, tang nadai siku sida terengkah jari ba Iya.

⁴⁵Bala pemesai pulai baru ngagai bala tuai imam enggau orang Parisi, ke lalu nanya sida, “Nama kebuah kita enda nangkap Iya?”

⁴⁶ Ku bala pemesai nyaut, “Nadai orang udah kala bejaku baka nya!”

⁴⁷Orang Parisi lalu nyaut sida, “Kati kita empu udah mega kena tipu Iya?

⁴⁸Kati bala tuai tauka orang Parisi bisi udah arapka Iya?

⁴⁹Tang bala sida tu, ke enda nemu Adat Moses, ditinggang sumpah.”

⁵⁰ Nikodimus, ke udah betemu enggau Jesus dulu ari nya, siku ari raban sida, lalu nanya sida,

⁵¹ “Kati Adat kitai ngasuh kitai ngakim orang sebedau kitai mendingka iya lalu mansik utai ti dikereja iya?”

⁵² Sida lalu nyaut iya, “Kati nuan datai ari Galili baka Iya? Pansik dalam Bup Kudus, nya baru nuan nemu, nadai nabi deka datai ari[52] Galili.”

⁵³Sida lalu pulai,