Read Iban John 8 Bible Online

John 8 - Iban bible

John 8

²Tumu pagi hari siti, Iya datai baru ba Rumah Sembiang. Semua orang datai ngagai Iya. Iya lalu duduk, lalu belabuh ngajar sida.

³Sida pengajar Adat, enggau sida orang Parisi lalu mai siku indu ke udah ditangkap butang, lalu ngasuh indu nya bediri di mua semua sida,

⁴lalu bejaku ngagai Jesus, “Pengajar, indu tu udah ditangkap butang.

⁵ Nyadi dalam Adat, Moses ngasuh kitai nuku orang ke baka tu ngena batu. Baka ni ku penemu Nuan?”

⁶Sida nyebut nya kena sida nguji Iya, ngambika sida ulih bedawaka Iya. Jesus meremi, lalu nulis ba tanah ngena tunjuk Iya.

⁷ Ninga sida ituk[53] nanya Iya, Iya bediri lalu bejaku ngagai sida, “Awakka orang ke enda kala bedosa ari bala kita, dulu nuku[54] iya ngena batu.”

⁸Iya lalu meremi baru, lalu nulis ba tanah ngena tunjuk Iya.

⁹Lebuh sida ninga nya, siku-siku sida lalu mupuk ari endur nya, berengkah ari sida ke tuai. Semina Jesus aja agi tinggal, enggau indu ke bediri di mua Iya.

¹⁰Jesus bediri lalu bejaku enggau indu nya, “Indu, ni bala sida nya tadi? Kati orang nadai udah ngukum nuan?”

¹¹Indu nya lalu nyaut, “Nadai, Tuhan.” Lalu ku Jesus bejaku, “Aku pen enda meh ngukum nuan. Mupuk meh nuan, tang anang agi bedosa.”][55]

¹² Jesus lalu bejaku baru ngagai sida, “Aku tu penampak dunya. Barang sapa nitihka Aku, enda bejalai dalam pemetang, tang deka ngembuan penampak ti meri pengidup.”

¹³ Orang Parisi lalu bejaku ngagai Iya, “Nuan besaksika pasal Diri Empu. Saksi Nuan nadai guna.”

¹⁴Disaut Jesus, “Enti sema Aku besaksika pasal Diri Empu, saksi Aku endang amat, laban Aku nemu ari ni Aku datai, enggau kini ke tunga Aku deka mupuk, tang kita enda nemu ari ni penatai Aku, tauka kini ke tunga Aku deka mupuk.

¹⁵ Kita ngakim ngena chara mensia. Aku enda ngakim orang.

¹⁶ Tang enti sema Aku ngakim orang, pemutus penemu Aku endang ngena, laban ukai semina Aku aja ke ngakim, tang Aku enggau Apai ke ngirumka Aku.

¹⁷ Utai tu endang bisi ditulis dalam Adat kita: saksi ti diguna nya saksi ari dua iku orang.

¹⁸Aku besaksika pasal Aku Empu, lalu Apai ke ngirumka Aku mega besaksika pasal Aku.”

¹⁹ Sida lalu nanya Iya, “Dini alai Apai Nuan?” Jesus lalu nyaut, “Kita enda ngelala Aku tauka Apai Aku. Enti kita ngelala Aku, kita tentu ngelala Apai Aku.”

²⁰ Jesus nyebut semua jaku nya lebuh Iya benung ngajar dalam bilik sarang wang Rumah Sembiang. Tang nadai orang nangkap Iya, laban maya Iya apin datai.

²¹ Jesus lalu bejaku baru ngagai sida, “Aku deka mupuk, lalu kita deka ngiga Aku, tang kita deka mati dalam dosa kita. Kita enda ulih datai ngagai endur ti deka digagai Aku.”

²²Bala tuai orang Judah lalu bejaku, “Kati Iya deka munuh Diri? Kati nya kebuah Iya nyebut, ‘Endur ti deka digagai Aku, enda ulih digagai kita’?”

²³ Ku Iya bejaku ngagai sida, “Kita datai ari baruh, Aku datai ari atas. Kita endang orang dunya, Aku ukai orang dunya.

²⁴ Aku udah madahka kita deka mati dalam dosa kita, laban kita deka mati dalam dosa kita enti kita enda arapka ‘Aku tu meh Aku.’ ”

²⁵Ku sida bejaku ngagai Iya, “Sapa Nuan?” Jesus lalu nyaut, “Orang ke udah dipadahka Aku ngagai kita kenyau ari pun.[56]

²⁶Aku mayuh utai ti deka disebut pasal kita, mayuh utai ti deka diukum. Tang Iya ke ngirumka Aku endang tau dikarapka, lalu Aku madah ngagai dunya utai ti udah didinga Aku ari Iya.”

²⁷Sida enda nemu Iya bejakuka pasal Apai ngagai sida.

²⁸ Nya alai ku Iya bejaku, “Lebuh kita udah nuatka Anak Mensia, nya baru kita deka nemu Aku tu meh Iya, lalu nemu Aku ukai ngereja utai nitihka peneka Aku Empu, tang semina bejaku nitihka ajar Apai.

²⁹Lalu Iya ke ngirumka Aku bisi enggau Aku. Iya nadai kala ninggalka Aku keDiri, laban Aku seruran ngereja utai ti ngerinduka ati Iya.”

³⁰ Lebuh Iya nyebut utai nya, mayuh orang arapka Iya.

³¹ Jesus lalu madah ngagai orang Judah ke udah arapka Iya, “Enti kita bepegai ba jaku Aku, kita amat murid Aku,

³² lalu kita deka nemu pemendar, lalu pemendar deka ngelepaska kita.”

³³ Sida lalu nyaut Iya, “Kami tu peturun Abraham, lalu nadai udah kala nyadi ulun orang. Nama reti, ‘Kita deka dilepaska’?”

³⁴ Ku Jesus nyaut sida, “Enggau bendar Aku madah ngagai kita, genap iku orang ke ngereja dosa, nyadi ulun dosa.

³⁵ Ulun enda diau tetap dalam rumah nya belama iya; tang anak diau dalam rumah nya belama iya.

³⁶Nya alai, enti Anak ngelepaska kita, kita amat dilepaska.

³⁷Aku nemu kita endang peturun Abraham; tang taja pia, kita ngiga peluang munuh Aku, laban kita enggai nerima jaku Aku.

³⁸Aku madahka pasal utai ti udah dipadahka Apai ngagai Aku, baka kita ke ngereja utai ti didinga kita ari apai kita.”

³⁹Ku sida nyaut Iya, “Kami anak Abraham.” Disaut Jesus, “Enti kita amat anak Abraham, kita tentu deka ngereja [57] utai ti udah dikereja Abraham,

⁴⁰tang diatu kita nguji munuh Aku, ke udah madahka utai ti bendar ti didinga Aku ari Allah Taala. Nya ukai utai ti dikereja Abraham.

⁴¹ Kita ngereja utai ti udah dikereja apai kita.” Ku sida bejaku ngagai Iya, “Kami ukai anak ampang. Kami bisi apai. Allah Taala meh Apai kami.”

⁴² Ku Jesus bejaku ngagai sida, “Enti Allah Taala amat Apai kita, kita tentu rinduka Aku, laban Aku datai ari Allah Taala, lalu diatu Aku bisi ditu. Aku ukai datai nitihka peneka ati7 Aku Empu, tang Allah Taala ke ngirumka Aku.

⁴³Nama kebuah kita enda meretika utai ti disebut Aku? Laban kita enda ulih nerima jaku Aku.

⁴⁴ Kita tu anak Sitan, lalu kita keran deka ngereja utai ti dikedekaka apai kita. Iya endang pemunuh kenyau ari pun, lalu iya endang nadai kaul enggau pemendar, laban iya nadai pemendar dalam iya. Lebuh iya nyebut utai ti bula, iya endang bejaku nitihka perangai iya empu laban iya endang pemula, lalu iya endang apai pemula.

⁴⁵Tang laban Aku madahka utai ti bendar, kita enggai arapka Aku.

⁴⁶ Sapa ari bala kita ngumbai Aku udah bedosa? Enti Aku madahka utai ti bendar, nama kebuah kita enda arapka Aku?

⁴⁷Nembiak Allah Taala ninga[58] jaku Allah Taala. Kebuah kita enda ninga jaku Allah Taala nya laban kita ukai nembiak Allah Taala.”

⁴⁸ Orang Judah lalu nyaut Iya, “Kati kami enda ngena enti kami ngumbai Nuan orang Samaria lalu Nuan dirasuk antu?”

⁴⁹Disaut Jesus, “Aku ukai dirasuk antu, tang Aku ngemesaika Apai Aku, lalu kita ngeleseka Aku.

⁵⁰Tang Aku ukai ngemesaika Diri Empu. Bisi siku ke patut dikemesaika, lalu Iya nyadi Hakim.

⁵¹Enggau bendar Aku madah ngagai kita, barang sapa ngasika jaku Aku, enda mati.”

⁵²Ku orang Judah bejaku ngagai Iya, “Diatu baru kami nemu Nuan endang amat dirasuk antu! Abraham mati, lalu baka nya mega sida nabi, lalu ku Nuan, ‘Barang sapa ngasika jaku Nuan, enda mati.’

⁵³ Kati Nuan besai agi ari apai kami Abraham, ke udah mati? Sida nabi mega mati! Sapa Nuan tu ku Nuan?”

⁵⁴Disaut Jesus, “Enti Aku ngemesaika Diri Empu, utai nya nadai guna. Apai Aku ke ngemesaika Aku, Iya ke dikumbai kita Allah Taala kita,

⁵⁵taja pen kita enda ngelala Iya. Tang Aku ngelala Iya. Enti Aku madahka Diri enda ngelala Iya, Aku bula baka kita. Tang Aku amat ngelala Iya, lalu Aku ngasika jaku Iya.

⁵⁶ Aki kita Abraham gaga ati deka meda hari Aku. Iya meda hari nya, lalu iya gaga.”

⁵⁷ Orang Judah lalu bejaku ngagai iya, “Umur Nuan deh apin bulih lima puluh taun, lalu Nuan udah meda Abraham?”[59]

⁵⁸ Ku Jesus bejaku ngagai sida, “Enggau bendar Aku madah ngagai kita, sebedau Abraham ada, Aku endang udah bisi.”

⁵⁹ Sida lalu ngambi batu deka nuku Iya, tang Jesus belalai lalu pansut ari Rumah Sembiang.