Read Iban John 9 Bible Online

John 9 - Iban bible

John 9

¹Lebuh Jesus benung bejalai, Iya tepedaka orang siku ke buta kenyau ari ada.

² Sida murid Iya lalu nanya Iya, “Pengajar,[60] dosa sapa ti ngasuh iya ada buta? Dosa iya empu, tauka dosa apai indai iya?”

³ Disaut Jesus, “Iya ke buta nya ukai laban dosa iya tauka dosa apai indai iya, tang ngambika kereja Allah Taala dipandangka ba iya.

⁴ Kitai[61] enda tau enda ngereja pengawa Iya ke ngirumka Aku, kala lebuh hari agi siang. Lebuh hari nyau malam, nadai orang ulih gawa.

⁵ Seagi-agi Aku di dunya tu, Aku nyadika penampak dunya.”

⁶ Lebuh Iya udah nyebut nya, Iya ngeludah ngagai tanah lalu ngaga tanah liat ngena liur Iya, lalu ngunsutka tanah liat nya ba mata orang nya,

⁷ lalu bejaku ngagai iya, “Mupuk nuan, lalu basu mua nuan ba Letung Siloam.” (Reti ‘Siloam’ nya “Dikirumka”.) Orang nya mupuk, masu mua diri, lalu pulai baru sereta ulih meda.

⁸Bala pangan iya enggau orang ke udah meda iya minta sedekah sebedau nya, nanya, “Ukai enda iya tu ke selalu duduk minta sedekah?”

⁹Ku sekeda sida bejaku, “Iya meh nya.” Tang ku sida ti bukai, “Ukai, tang iya baka gamal orang nya.” Tang orang nya empu majak nyebut, “Aku meh tu.”

¹⁰Tang sida majak lalu nanya iya, “Enti pia, baka ni ku nuan diatu ulih meda?”

¹¹Disaut iya, “Orang ke benama Jesus ngaga tanah liat, lalu ngunsutka tanah liat nya ba mata aku, lalu bejaku ngagai aku, ‘Mupuk nuan ngagai letung Siloam, lalu basu mua nuan’. Aku lalu mupuk, masu mua aku, lalu aku ulih meda.”

¹²Ku sida nanya iya, “Dini alai Iya?” Iya lalu nyaut, “Entah, enda aku nemu.”

¹³Sida lalu mai orang ke udah buta nya ngagai orang Parisi.

¹⁴Nyadi Jesus udah ngaga tanah liat lalu ngeraika orang nya kena hari Sabat.

¹⁵Orang Parisi mega nanya orang nya, baka ni ku iya ulih meda. Ku iya madah ngagai sida, “Iya ngengkahka tanah liat ba mata aku. Aku empungas mua aku, lalu diatu aku ulih meda.”

¹⁶ Sekeda orang Parisi lalu bejaku, “Orang nya ukai ari Allah Taala, laban Iya enda ngasika adat hari Sabat.” Tang ku sida ti bukai bejaku, “Baka ni ku orang ke bedosa ulih ngereja kereja ajih baka nya?” Sida lalu beserekang penemu enggau pangan diri.

¹⁷Nya alai sida lalu nanya orang nya baru, “Nama penemu nuan pasal orang nya? Mata nuan ke udah digeraika Iya.” Iya lalu nyaut, “Iya nabi.”

¹⁸Bala tuai orang Judah enda arapka orang nya amat udah buta lalu diatu ulih meda. Sida lalu ngangauka apai indai orang ke nyau ulih meda nya,

¹⁹lalu nanya seduai iya, “Kati tu anak seduai, ke dipadahka seduai ada buta? Baka ni ku iya ulih meda diatu?”

²⁰Disaut apai indai iya, “Kami nemu iya endang anak kami duai, lalu kami nemu iya endang ada buta,

²¹tang kami enda nemu baka ni ku iya diatu ulih meda, lalu kami pen enda mega nemu sapa ke ngasuh iya ulih meda. Tanya iya empu. Iya udah besai tuai. Iya nemu nyaut kediri empu!”

²² Apai indai iya nyebut nya laban seduai iya takutka tuai orang Judah, laban bala tuai udah besetuju deka muai ari balai gempuru barang sapa madahka diri arapka Jesus nya Kristus.[62]

²³Nya kebuah apai indai iya nyebut, “Iya udah besai tuai. Tanya iya empu!”

²⁴Sida lalu ngangauka orang ke buta nya kedua kali, lalu bejaku ngagai iya, “Nuan enda tau enda besumpah di mua Allah Taala, deka madahka utai ti bendar![63] Kami nemu orang nya orang ke bedosa.”

²⁵Iya lalu nyaut, “Aku enda nemu enti Iya nya orang ke bedosa, tang Aku nemu, aku udah buta, tang diatu aku ulih meda.”

²⁶Ku sida bejaku ngagai iya, “Nama utai ti dikereja Iya ngagai nuan? Baka ni ku Iya ngasuh nuan ulih meda?”

²⁷Iya lalu nyaut sida, “Aku udah madahka nya ngagai kita, tang kita enggai mending. Nama kebuah kita keran deka ninga nya baru? Kati kita deka nyadi murid Iya?”

²⁸ Sida lalu ngeleseka iya, ku sida, “Nuan tu murid Iya. Kami murid Moses.

²⁹Kami nemu Allah Taala udah bejaku ngagai Moses. Tang pasal orang tu, indah penatai Iya deh kami enda nemu!”

³⁰Orang nya lalu nyaut, “Nyelai amat nya! Kita enda nemu ari ni penatai Iya, tang Iya udah ngasuh aku ulih meda!

³¹Kitai nemu Allah Taala enda mendingka orang ke bedosa, tang mendingka orang ke nyembah Iya lalu ngasika peneka Iya.

³²Kenyau ari penumbuh dunya, nadai kitai udah kala ninga orang ngasuh orang ke buta kenyau ari ada, ulih meda.

³³Enti orang tu ukai ari Allah Taala, Iya enda ulih ngereja utai.”

³⁴Sida lalu nyaut iya, “Nuan tu bedosa kenyau ari ada. Kati nuan nguji ngajar kami?” Sida lalu muai iya ari balai gempuru.[64]

³⁵Jesus ninga sida udah muai iya, lalu lebuh Jesus udah tetemuka iya, Iya lalu nanya orang nya, “Kati nuan arapka Anak Mensia?” [65]

³⁶Iya lalu nyaut, “Sapa orang nya, Tuan?[66] Padahka ngagai aku ngambika aku arapka Iya!”

³⁷Jesus lalu bejaku ngagai iya, “Nuan udah meda Iya. Iya ke bejaku enggau nuan diatu meh Iya.”

³⁸ Orang nya lalu bejaku, “Aku arap, Tuhan!”[67] Iya lalu nyembah Jesus.

³⁹ Jesus lalu bejaku, “Aku datai ngagai dunya laban Aku deka ngakim, ngambika orang ke buta, meda, lalu orang ke meda, buta.”

⁴⁰Sekeda orang Parisi ke semak Iya ninga nya, lalu bejaku ngagai Iya, “Kati kami tu buta?”

⁴¹ Ku lalu Jesus bejaku ngagai sida, “Enti kita buta, kita tentu enda bedosa. Tang laban kita ngumbai diri ulih meda, dosa kita mengkang.”