Read Iban Surat Pasal Kereja Rasul 1 Bible Online

Surat Pasal Kereja Rasul 1 - Iban bible

Surat Pasal Kereja Rasul 1

¹ Tabi Teopilus, Dalam bup ti keterubah, Teopilus, aku nuliska pasal semua utai ti udah dikereja enggau diajar Jesus kenyau ari pun

²nyentuk ngagai hari Iya dibai niki ke serega, lebuh Iya udah meri pesan, ulih kuasa Roh Kudus, ngagai sida rasul ke udah dipilih Iya. .

³Dalam kandang empat puluh hari udah bekau Iya mati, Iya suah pegari di mua sida kena Iya nunjukka Diri amat idup. Sida meda Iya, lalu bejaku ngagai sida pasal Perintah Allah Taala.

⁴ Lebuh Iya benung diau [1] enggau sida, Iya enda nyagi sida ninggalka Jerusalem, tang nganti pemeri ti udah disemaya Apai. Ku Iya, “Tu utai ti udah didinga kita ari Aku:

⁵ John maptisa ngena ai, tang kita deka dibaptisa ngena Roh Kudus dua tiga hari tu agi.”

⁶Lebuh sida begempuru, sida lalu nanya Iya, “Tuhan, kati tu maya Nuan deka mulaika Perintah ngagai orang Israel?”

⁷Iya lalu nyaut, “Kita enda ibuh nemu maya tauka musin ti udah diletak Apai ngena hak Iya Empu.

⁸ Tang kita deka nerima kuasa lebuh Roh Kudus udah nurun atas kita, lalu kita deka nyadi saksi Aku di Jerusalem, di serata menua Judea enggau Samaria, enggau ngagai ujung dunya.”

⁹ Lebuh Iya udah nyebut nya, Iya lalu dibai niki ke serega, dipeda semua sida, lalu siti remang ngelindung Iya ari sida.

¹⁰Lebuh sida benung engkadah ke langit nengkilaka Iya mupuk, tekala nya dua iku orang ke ngena gari burak bediri ngimbai sida

¹¹lalu bejaku, “Kita orang Galili, nama kebuah kita bediri engkadah ke langit? Jesus tu, ke udah diambi ari kita lalu dibai niki ke serega, deka datai baru baka chara Iya ke mupuk ke serega, baka ke udah dipeda kita.”

¹²Sida lalu pulai ngagai Jerusalem ari Bukit Kana kira satu kilometer[2] ari nengeri nya.

¹³ Lebuh sida udah tama ngagai nengeri nya, sida lalu niki ke sadau, ti alai sida diau. Sida nya Peter, John, James, enggau Andrew, Philip enggau Thomas, Bartolomew enggau Matthew, James anak Alpius, Simon ke Bujang Berani, enggau Judas anak[3] James.

¹⁴Semua sida seruran besampi, sama enggau sida ke indu, nyengkaum Maria indai Jesus, enggau sida menyadi lelaki Jesus.

¹⁵Lebuh maya nya Peter lalu bediri ba tengah-tengah bala sida ke arap[4] (pemayuh semua sida kira seratus dua puluh iku) lalu bejaku,

¹⁶ “Menyadi, Bup Kudus enda tau enda dikamatka, ba senentang Roh Kudus ke bejaku ngena mulut David, pasal Judas ke nyadi malin ke orang ke nangkap Jesus,

¹⁷laban iya udah nyadi raban kitai, lalu udah diberi ungkup dalam pengawa tu.” (

¹⁸ Nyadi Judas udah meli sebidang tanah ngena duit ti ulih iya ngereja pengawa ti jai nya. Iya rebah ba tanah nya [5] lalu perut iya pechah, lalu semua perengka dalam iya tepambur pansut.

¹⁹Semua orang ke diau di Jerusalem bela udah ninga pasal nya, nya alai, dalam jaku sida empu, sida ngumbai tanah nya Akeldama, reti nya “Tanah Darah.”)

²⁰ “Laban endang udah ditulis dalam bup Masmur, ‘Awakka rumah iya puang, lalu awakka orang nadai diau dalam rumah nya.’ Lalu udah mega ditulis munyi tu: ‘Awakka orang bukai ngambi pengawa iya.’

²¹“Nya alai, siku orang enda tau enda enggau kitai besaksika pasal pengangkat Tuhan Jesus ari mati. Orang nya enda tau enda siku ari raban kitai ke seruran enggau kitai sekumbang kitai ke bejalai kia-kia enggau Tuhan Jesus, berengkah ari maya John ke maptisa orang, nyentuk ngagai Hari Tuhan Jesus diambi ari kitai lalu dibai niki ke serega.”

²³Nya alai sida lalu nuduhka dua iku orang: Josep, ke dikumbai Barsabas (ke mega dikumbai Justus), enggau Matias.

²⁴Sida lalu besampi, ku sida, “Tuhan, Nuan nemu ati semua orang. Tunjukka ngagai kami ni bagi seduai tu ke udah dipilih Nuan

²⁵bekereja dalam pengawa tu nyadi rasul nganti Judas, ke udah limpang lalu mupuk ngagai endur iya empu.”

²⁶Sida lalu bechabut undi ke seduai iya, lalu Matias kena pilih. Iya lalu ditambahka ngagai bala rasul ke sebelas iku nya.