Read Iban Surat Pasal Kereja Rasul 10 Bible Online

Surat Pasal Kereja Rasul 10 - Iban bible

Surat Pasal Kereja Rasul 10

¹ Nyadi di Siseria bisi orang siku benama Kornelius. Iya tu pemesai dalam siti regimen soldadu Rome ti dikumbai Regimen Itali.

²Iya enggau semua sida sebilik angkun sereta nangika Allah Taala. Iya meri mayuh sedekah enggau ati ti gerah mudah ngagai orang Judah ke seranta, lalu seruran besampi ngagai Allah Taala.

³Nyadi sekali ba urung pukul tiga ngalih hari, iya begenera meda enggau terang siku melikat Allah Taala mansang lalu bejaku ngagai iya, “Kornelius!”

⁴Kornelius balat amat takut merening ngagai melikat nya, lalu bejaku, “Nama, tuan?”[55] Melikat nya lalu nyaut, “Sampi nuan enggau sedekah nuan udah niki ngagai Allah Taala di serega, kena ngingatka nuan.

⁵Diatu asuh orang bejalai ngagai Jopa ngambi orang siku ke benama Simon Peter.

⁶Iya diau ba rumah Simon, ke tukang samak. Rumah nya ngimbai tebing tasik.”

⁷Lebuh melikat ke bejaku ngagai iya udah mupuk, Kornelius lalu ngangauka dua ulun iya, enggau siku soldadu ke angkunka Allah Taala, ari bala orang ke bekereja ke iya,

⁸lalu lebuh iya udah madah ngagai sida semua utai ti udah nyadi, iya lalu ngasuh sida mupuk ngagai Jopa.

⁹ Hari siti, kira ba urung tengah hari sida datai semak nengeri Jopa. Ba urung maya nya mega Peter niki ngagai perabung deka besampi.

¹⁰Iya berasai lapar, lalu ingin deka makai. Lebuh pemakai benung dibela, iya begenera.

¹¹Iya meda langit tebuka, lalu utai ti baka kain ti besai diulurka ngena empat iti sukut kain nya.

¹²Utai nya ngundan semua macham jelu, ular enggau burung.

¹³Peter lalu ninga munyi nyawa bejaku ngagai iya, “Angkat nuan Peter, bunuh lalu empa!”

¹⁴Tang ku Peter bejaku, “Enggai aku, Tuhan, laban aku nadai kala makai utai ti enda tuchi tauka kamah.”

¹⁵Nyawa nya lalu bejaku baru ngagai iya kedua kali, “Utai ti udah dituchi Allah Taala, anang nuan ngumbai iya enda tuchi.”

¹⁶Utai nya nyadi tiga kali. Udah nya utai nya lalu tekala nya ditarit pulai ke langit.

¹⁷Lebuh Peter agi iran ati berundingka reti genera nya, orang ke dikirumka Kornelius pen datai ba rumah nya. Sida bediri ba mua pintu penama ngagai rumah nya, nanyaka rumah Simon.

¹⁸Sida ngangau lalu nanya enti Simon ke benama Peter bisi diau dia.

¹⁹Lebuh Peter agi benung belematika reti genera nya, Roh Kudus lalu bejaku ngagai iya, “Dinga nuan, tiga [56] iku orang diatu benung ngiga nuan.

²⁰Angkat nuan lalu nurun, lalu anang kakang ati mupuk enggau sida, laban Aku udah ngirumka sida.”

²¹Peter lalu nurun betemu enggau sida, lalu bejaku, “Aku tu meh orang ke digiga kita. Nama kebuah kita datai kitu?”

²²Disaut sida, “Kornelius, siku pemesai soldadu, ke badas sereta nangika Allah Taala, lalu dibasa semua orang Judah, udah diasuh siku melikat ti kudus mesanka nuan datai ngagai rumah iya, ngambika iya ulih ningaka utai ti deka disebut nuan.”

²³Peter lalu mai sida tama, lalu bemalam enggau iya. Hari siti, iya angkat lalu mupuk enggau sida, lalu sekeda orang Jopa ke arap mega nyempulang iya

²⁴Sehari udah bekau nya sida datai di Siseria. Kornelius endang udah nganti penatai sida, lalu udah ngempuruka semua kaban belayan enggau pangan iya.

²⁵Lebuh Peter datai, Kornelius lalu ngambat iya, besugang lalu nyembah iya.

²⁶Tang Peter ngasuh iya angkat, ku iya bejaku, “Angkat. Aku pen mensia baka nuan.”

²⁷Lebuh iya bejaku enggau Kornilius, iya tama lalu nemu mayuh orang udah begempuru dia.

²⁸Iya lalu bejaku ngagai sida, “Kita empu nemu, orang Judah endang enda tau begulai enggau, tauka nemuai ngagai orang bansa bukai, tang Allah Taala udah nunjukka ngagai aku, aku enda tau ngumbai orang enda tuchi tauka enda beresi.

²⁹Nya alai, lebuh nuan mesanka aku, aku lalu datai, nadai nulak nya mimit. Nya alai, kati tau aku nanya ngagai nuan, kebuah nuan mesanka aku?”

³⁰Disaut Kornelius, “Empat hari tu ti udah, betul-betul ba jam diatu, ba pukul tiga ngalih hari, aku besampi [57] dalam rumah aku. Siku orang ke ngena gari ti beperenching burak ngenyit bediri di mua aku.

³¹Ku iya bejaku, ‘Kornelius! Sampi nuan udah didinga Allah Taala, lalu sedekah ti diberi nuan udah dikingatka Allah Taala.

³²Nya alai asuh orang mupuk diatu ngagai Jopa lalu nanyaka orang siku ke benama Simon ti dikumbai Peter. Iya diau ba rumah Simon ke tukang samak, ngimbai tebing tasik.’

³³Nya alai aku lalu tekala nya mesanka nuan, lalu nuan udah manah amat datai kitu. Nyadi semua bala kami bisi ditu magang di mua Allah Taala, deka mendingka utai ti udah diasuh Tuhan sebut nuan.”

³⁴ Peter lalu belabuh bejaku ngagai sida: “Aku nemu Allah Taala endang amat enda bepilih mata,

³⁵tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.

³⁶Kita nemu pesan ti dikirumka Iya ngagai orang Israel, ti ngajar pemaik ulih Jesus Kristus, ke nyadi Tuhan ke semua mensia.

³⁷Pesan nya udah ngelekai di serata menua Judea, berengkah ari Galili, udah bekau John ke madahka pasal baptisa,

³⁸pasal Allah Taala ke nata Jesus orang Nasaret ngena Roh Kudus enggau kuasa, pasal Jesus ke bejalai ngagai mayuh bengkah endur ngereja pengawa ti manah, lalu ngeraika semua orang ke dirasuk antu, laban Allah Taala bisi enggau Iya.

³⁹Kami udah meda semua utai ti udah dikereja Iya di menua Judea enggau di Jerusalem. Udah nya sida munuh Iya ba kayu regang.

⁴⁰Tang Allah Taala ngangkatka Iya ari mati ba hari ti ketiga, lalu ngasuh Iya pegari,

⁴¹ukai ngagai semua orang, tang ngagai kami ke udah dipilih Allah Taala nyadi saksi, ke udah makai ngirup enggau Iya, udah bekau Iya ke angkat ari mati.

⁴²Iya ngasuh kami ngajar orang mayuh, lalu besaksi madahka Iya nya meh orang ke udah dichiri Allah Taala nyadi Hakim ke orang ke idup enggau ke orang ke mati.

⁴³Semua nabi bela udah besaksika pasal Iya, madahka semua orang ke arapka Iya deka diampun ari dosa sida, ulih nama Iya.”

⁴⁴Lebuh Peter agi benung bejaku, Roh Kudus lalu nurun atas semua orang ke mendingka pesan nya.

⁴⁵Orang Judah ke arap, ke datai ari Jopa enggau Peter, balat amat alit ati meda pemeri Roh Kudus udah dituang mega ngagai orang bansa bukai,

⁴⁶laban sida ninga orang nya bejaku ngena jaku ti nyelai, sereta ngemesaika Allah Taala. Peter lalu bejaku:

⁴⁷“Kati orang ulih nagang orang ke udah nerima Roh Kudus baka kitai suba, dibaptisa ngena ai?”

⁴⁸Iya lalu ngasuh sida dibaptisa dalam nama Jesus Kristus. Udah nya sida lalu minta Iya diau enggau sida dua tiga hari.