Read Iban Surat Pasal Kereja Rasul 11 Bible Online

Surat Pasal Kereja Rasul 11 - Iban bible

Surat Pasal Kereja Rasul 11

¹Sida rasul enggau orang ke arap[58] di menua Judea ninga pasal orang bansa bukai udah mega nerima jaku Allah Taala.

²Nya alai lebuh Peter mansang ngagai Jerusalem, orang Judah ke udah ditutus ngutuk iya.

³Ku sida, “Nama kebuah nuan nemuai ngagai orang ke enda ditutus lalu makai enggau sida?”

⁴ Peter lalu nerangka ngagai sida, berengkah ari pun. Ku iya,

⁵“Lebuh aku besampi di nengeri Jopa, aku begenera. Dalam genera nya aku meda siti utai nurun ari langit, baka kain ti besai, ti diulurka ari langit ngena empat iti sukut iya, lalu datai semak aku.

⁶Lebuh aku nilik ke dalam, aku tepedaka jelu tupi, enggau jelu babas, ular enggau burung dalam kain nya.

⁷Aku mega ninga nyawa bejaku ngagai aku, ‘Angkat, Peter, bunuh lalu empa!’

⁸Tang ku aku nyaut, ‘Enggai aku, Tuhan; laban nadai utai ti enda tuchi, tauka kamah, udah kala tama nyawa aku.’

⁹Tang nyawa nya lalu nyaut kedua kali ari langit, ‘Utai ti udah dituchi Allah Taala, anang nuan ngumbai iya enda tuchi.’

¹⁰Utai nya nyadi tiga kali. Udah nya, utai nya lalu ditarit pulai baru ke langit.

¹¹Ba urung maya nya orang tiga iku ke dikirumka ngagai aku ari Sesarea datai ba rumah ti alai kami [59] diau.

¹²Roh Kudus ngasuh aku bejalai enggau sida enggau enda bepilih mata.[60] Sida enam iku ke arap mega nyempulang aku, lalu kami tama ngagai rumah orang nya.

¹³Orang nya lalu madahka ngagai kami pasal iyai ke meda siku melikat bediri dalam rumah iya lalu bejaku, ‘Asuh orang mansang ngagai Jopa, ngambi Simon ke dikumbai Peter.

¹⁴Iya deka madahka pesan ngagai nuan ti deka nyelamatka nuan enggau semua kita sebilik.’

¹⁵Lebuh aku belabuh bejaku, Roh Kudus nurun atas sida, baka ti nyadi ba kitai ba pun iya suba.

¹⁶ Aku lalu teingatka jaku Tuhan, jalai Iya bejaku, ‘John maptisa ngena ai, tang kita deka dibaptisa ngena Roh Kudus.’

¹⁷Nya alai, enti Allah Taala meri sida pemeri baka ti diberi Iya ngagai kitai lebuh kitai arapka Tuhan Jesus Kristus, baka ni ku aku ulih nagang Allah Taala?”

¹⁸Lebuh sida ninga nya, sida lalu badu agi ngutuk iya. Sida lalu muji Allah Taala, ku sida, “Allah Taala udah mega meri ngagai orang bansa bukai peluang nesal ati lalu idup!”

¹⁹ Sekeda sida ke pambar pendiau ketegal kena perinsa udah bekau Stepen dibunuh, bejalai nyentuk ngagai Poenisia, Saiprus, enggau Antiok, nusui pesan, tang semina ngagai orang Judah aja.

²⁰Tang sekeda ari bala sida nya orang ke datai ari Saiprus enggau ari Sairin. Lebuh sida datai di Antiok, sida mega nusui Berita Manah pasal Tuhan Jesus Kristus ngagai orang bansa bukai. [61]

²¹Kuasa Tuhan bisi enggau sida, lalu mayuh orang arap lalu nguingka diri ngagai Tuhan.

²²Berita pasal tu bisi didinga eklisia di Jerusalem. Sida lalu ngasuh Barnabas ke Antiok.

²³Lebuh iya datai di Antiok, lalu meda berekat Allah Taala, iya gaga amat ati, lalu iya meransang semua sida meruan tetap ati ngagai Tuhan enggau pengabis ati sida,

²⁴laban iya orang ke manah, ke penuh laban Roh Kudus enggau pengarap. Mayuh amat orang dibai ngagai Tuhan.

²⁵Udah nya Barnabas mupuk ngagai Tarsus, ngiga Saul.

²⁶Lebuh iya udah tetemuka Saul, iya lalu mai Saul ngagai Antiok. Seduai iya betemu enggau raban eklisia, sereta ngajar mayuh orang setaun penuh. Antiok nya meh endur alai bala murid terubah dikumbai Kristian.

²⁷Ba urung maya nya, sida nabi bisi datai ari Jerusalem ngagai Antiok.

²⁸ Siku ari sida, ke benama Agabus, bediri lalu bejaku ulih kuasa Roh Kudus, madahka lapar pungkang deka nyadi di serata dunya. (Utai nya nyadi lebuh Klaudius nyadi Raja Besai.)

²⁹Sida murid lalu meri pemutus penemu deka ngasuh genap iku orang ngirumka tulung, nitihka penyampau ti ulih diberi sida siku-siku, ngagai sida ke arap[62] di Judea.

³⁰Sida lalu ngereja nya, lalu ngasuh Barnabas seduai Saul mai tulung nya ngagai bala tuai eklisia.