Read Iban Surat Pasal Kereja Rasul 12 Bible Online

Surat Pasal Kereja Rasul 12 - Iban bible

Surat Pasal Kereja Rasul 12

¹Ba urung maya nya Raja Herod [63] belabuh merinsaka sekeda raban eklisia.

²Iya ngasuh orang munuh James, menyadi John, ngena pedang.

³Lebuh iya meda orang Judah rindu meda nya, iya lalu nangkap Peter. (Utai tu nyadi lebuh Gawai Roti Ti Enda Beragi.)

⁴ Lebuh iya udah nangkap Peter, iya lalu nutup Peter dalam rumah jil, lalu ngasuh empat bengkah raban soldadu nyaga iya, laban iya berunding deka nyara Peter di mua orang mayuh udah bekau Gawai Paska.

⁵Lebuh Peter benung ditutup dalam rumah jil, raban eklisia bebendar amat besampi ke iya ngagai Allah Taala.

⁶Malam sebedau Herod mai Peter ngagai orang mayuh, Peter tinduk entara dua iku soldadu, ditanchang ngena dua iti rantai. Mua pintu rumah jil nya mega dijaga soldadu.

⁷Tekala nya siku melikat Tuhan pegari, lalu penampak ti terang manchar dalam rumah jil nya. Iya nempik rusuk Peter, lalu ngerak iya. Ku melikat nya bejaku, “Angkat jampat!” Rantai nya lalu tebelengka ari rekuan[64] Peter.

⁸Melikat nya lalu bejaku ngagai iya, “Begari nuan, lalu rasukka selipar nuan.” Peter lalu ngereja nya. Melikat nya lalu bejaku ngagai iya, “Rasukka serayung nuan, lalu titihka aku.”

⁹Peter lalu pansut lalu nitihka melikat nya. Iya enda nemu sekalika utai ti nyadi ulih saup melikat nya amat tauka enda. Iya ngumbai diri begenera.

¹⁰Lebuh seduai iya udah mansa jejaga ti keterubah, enggau ti kedua, seduai iya lalu datai ba pintu besi ti nuju ngagai nengeri. Pintu nya tebuka kediri empu ke seduai iya. Seduai iya pansut lalu bejalai nengah siti jalai raya, lalu melikat nya tekala nya ninggalka iya.

¹¹Nya baru Peter sedarka diri empu, lalu ku iya bejaku, “Diatu baru aku nemu Tuhan udah ngirumka melikat Iya ngambika iya ngelepaska aku ari jari[65] Herod, enggau ari semua utai ti disadang orang Judah.”

¹²Lebuh iya nyau sedarka nya, iya lalu mansang ngagai rumah Maria, indai John ke mega dikumbai Mark, alai mayuh orang begempuru sereta besampi.

¹³Lebuh Peter nekung pintu penama, siku indu kuli ke benama Roda datai deka muka pintu nya.

¹⁴Iya ngelala munyi nyawa Peter, lalu ati balat amat gaga, datai ke iya nyau enda muka pintu nya, tang belanda ke dalam baru lalu madahka Peter bisi ba mua pintu.

¹⁵Sida lalu bejaku ngagai iya, “Gila nuan tu!” Tang iya majak madahka utai nya endang amat. Ku sida, “Nya melikat iya.”

¹⁶Lebuh utai tu benung nyadi, Peter majak nekung pintu. Lebuh sida muka pintu, sida meda iya, lalu sida balat alit ati.

¹⁷Tang Peter ngepaika jari enda ngasuh sida inggar, lalu madah ngagai sida jalai Tuhan udah mai iya pansut ari rumah jil. Lalu ku iya bejaku, “Padahka tu ngagai James, enggau ngagai orang bukai ke arap.”[66] Udah nya iya mupuk lalu bejalai ngagai endur bukai.

¹⁸Lebuh hari nyau tawas, bala soldadu lalu balat amat begau laban sida enda nemu penunga Peter.

¹⁹Lebuh Herod udah ngiga iya, lalu enda tetemuka iya, iya lalu mansik sida jejaga, lalu ngasuh sida diukum bunuh. Udah bekau nya, Herod angkat ari menua Judea ngagai Siseria, lalu diau dia.

²⁰ Nyadi Herod ringat ngagai orang Tire enggau Sidon. Nya alai sida ngaga siti raban lalu betemu enggau iya. Lebuh sida udah bejaku enggau Blastus, ke nyadi tuai nyaga istana, sida lalu mai Herod bebaik, laban menua sida bulih pemakai ari menua raja.

²¹Ba hari ti udah diletak, Herod begari ngena gari diraja, duduk ba kerusi diraja iya, lalu bejaku ngagai sida.

²²Sida lalu majak manjung, “Munyi nyawa petara! Ukai munyi nyawa mensia!”

²³Tekala nya melikat Tuhan lalu nampar Herod, laban iya enda ngemuliaka Allah Taala. Iya diempa ulat, lalu mati.

²⁴Tang jaku Allah Taala majak ngelekai lalu mayuh orang arap.

²⁵Lebuh Barnabas seduai Saul udah nembuka pengawa seduai iya, seduai iya lalu pulai ngagai [67] Jerusalem, mai John ke mega dikumbai Mark enggau seduai iya.