Read Iban Surat Pasal Kereja Rasul 13 Bible Online

Surat Pasal Kereja Rasul 13 - Iban bible

Surat Pasal Kereja Rasul 13

¹Nyadi eklisia di Antiok bisi nabi enggau pengajar: Barnabas, Simeon ke dikumbai Niger, Lusius ari Sairin, Manain ke pangan Herod, [68] enggau Saul.

²Lebuh sida benung nyembah Tuhan sereta bepasa, Roh Kudus bejaku ngagai sida, “Pilih ke Aku Barnabas seduai Saul ke udah dikangauka Aku ngereja pengawa ti diasuh Aku kereja seduai iya.”

³Lebuh sida udah bepasa sereta besampi, sida lalu ngengkahka jari sida atas seduai iya, lalu ngasuh seduai iya mupuk.

⁴Nya alai, ari asuh Roh Kudus, Barnabas seduai Saul mupuk ngagai Seleusia, lalu ari nya seduai iya belayar ngagai pulau Saiprus.

⁵Lebuh seduai iya datai di Salamis, seduai iya lalu madahka jaku Allah Taala dalam berapa buah balai gempuru orang Judah, ditulung John Mark.

⁶Lebuh sida udah bejalai meraka pulau nya nyentuk ngagai Papos, sida betemu enggau siku manang, siku nabi ti pelesu orang Judah, ke benama Bar-Jesus.

⁷Bar-Jesus tu pangan Gabenor Sergius Paulus, orang ke pandai, ke mesanka Barnabas seduai Saul laban iya keran deka ningaka jaku Allah Taala.

⁸Tang manang Elimas (laban nya reti nama iya dalam jaku Gerika) nyakal Barnabas seduai Paul lalu nguji ngelimpangka Tuan Gabenor nya ari pengarap nya.

⁹Tang Saul, ke mega dikumbai Paul, penuh laban Roh Kudus, merening ngagai iya,

¹⁰ lalu bejaku, “Nuan anak Sitan! Nuan ke nyadi munsuh ke semua pengelurus, ke penuh laban semua macham akal enggau penyai, kati nuan enggai badu bejaku ngelaban[69] jalai Tuhan ti bendar?[70]

¹¹Nya alai diatu, dinga nuan -- jari Tuhan ngelaban nuan, lalu nuan deka buta enda lama, enda ulih meda mata hari.” Tekala nya utai ti baka ambun enggau pemetang lalu nurun atas iya, lalu iya bejalai gama-gama ngiga orang ngiring iya.

¹²Lebuh tuan gabenor meda utai nya nyadi, iya lalu arap laban iya balat alit ati ke ajar pasal Tuhan.

¹³Paul enggau orang ke bekaling enggau iya belayar ari Papos, lalu datai di Perga, di menua Pampilia. Tang John Mark ninggalka seduai iya, lalu pulai ngagai Jerusalem.

¹⁴Tang sida[71] majakka pejalai ari Perga lalu datai di Antiok di menua Pisidia. Lalu lebuh hari Sabat, seduai iya tama ngagai balai gempuru, lalu duduk.

¹⁵Lebuh Bup Adat enggau bup sida nabi udah dibacha, bala pemesai balai gempuru lalu mesanka seduai iya, ku sida, “Menyadi, enti seduai bisi jaku peransang ke orang mayuh, kami minta seduai bejaku.”

¹⁶Paul lalu bediri, ngepaika jari lalu belabuh bejaku. “Kita orang Israel, enggau semua kita bukai ke nangika Allah Taala, pendingka aku!

¹⁷ Allah Taala ke disembah orang Israel udah milih aki ini kitai, lalu ngaga sida nyadi bansa ti kering lebuh sida diau di menua Ejip, lalu ngena kuasa Iya ti besai, Iya mai[72] sida pansut ari menua nya.

¹⁸ Lalu dalam kandang empat puluh taun Iya sabar enggau [73] sida di menua puang.

¹⁹ Lalu lebuh Iya udah ngerusak tujuh bengkah bansa di menua Kanaan, Iya meri menua nya ngagai sida nyadika pesaka sida.

²⁰ Semua utai nya nyadi dalam pengelama empat ratus lima puluh taun. Udah nya Iya meri sida hakim nyentuk ngagai maya nabi Samuel.

²¹ Udah nya sida minta siku raja, lalu Allah Taala meri sida Saul anak Kis, ari raban bansa Benjamin, lalu Saul merintah empat puluh taun.

²² Lebuh Allah Taala udah muai Saul, Iya ngasuh David nyadi raja sida. Baka tu ku jaku ti disebut Allah Taala pasal David: ‘Aku nemu David anak Jesi tu orang ke ngerinduka ati Aku, ke deka ngereja semua utai ti dikedekaka Aku.’

²³Ari peturun David Allah Taala udah mai ngagai orang Israel siku Juruselamat, iya nya Jesus, munyi ti udah disemaya Iya.

²⁴ Sebedau Jesus datai, John endang udah dulu madahka pasal baptisa nesal ati ngagai semua orang Israel.

²⁵ Lalu lebuh John nyau deka nembuka pengawa iya, iya bejaku, ‘Sapa aku tu ku kita? Aku tu ukai Iya. Ukai, tang siku orang deka datai dudi ari aku. Indah muka tali selipar[74] ti ba kaki Iya deh aku enda tau.’

²⁶ “Menyadi, kita ke peturun Abraham, enggau semua kita bukai ke nangika Allah Taala, pesan pasal pengelepas tu udah dikirumka ngagai kitai.[75]

²⁷Laban orang ke diau di Jerusalem, enggau bala tuai sida enda ngelala Iya, tauka enda meretika jaku sida nabi ti dibacha tiap-tiap hari Sabat, sida ngamatka jaku sida nabi lebuh sida ngukum Iya.

²⁸ Taja pen sida nadai tetemuka kebuah nuduhka Iya diukum bunuh, tang sida minta Pilate ngasuh Iya dibunuh.

²⁹ Lebuh sida udah ngereja semua utai ti udah ditulis pasal Iya, sida nurunka Iya ari regang,[76] lalu ngalika Iya dalam kubur.

³⁰Tang Allah Taala ngangkatka Iya ari mati,

³¹ lalu Iya pegari berapa hari di mua orang ke udah bejalai enggau Iya ari Galili ngagai Jerusalem, lalu diatu sida nya nyadika saksi Iya ngagai orang Israel.

³²Lalu kami madahka ngagai kita Berita Manah pasal utai ti udah disemaya Allah Taala ngagai aki ini kitai.

³³ Iya udah ngamatka semaya ke kitai ti peturun sida, lebuh Iya ngangkatka Jesus ari mati, munyi ti udah ditulis dalam masmur ti kedua, ‘Nuan tu Anak Aku. Sehari tu Aku udah nyadi Apai Nuan.’

³⁴ Nyadi ba pasal Allah Taala ti ngangkatka Jesus ari mati ngambika Iya enda but, Allah Taala udah bejaku munyi tu, ‘Aku deka meri ngagai Nuan semaya ti disebut ngagai David.’

³⁵ Nya alai dalam masmur ti bukai Allah Taala mega nyebut, ‘Nuan enggai nejuka Nembiak Nuan Ti Kudus but.’

³⁶Laban David, lebuh iya udah bekereja nitihka peneka Allah Taala dalam rebak iya empu, iya mati,[77] lalu dikuburka ngimbai sida aki ini iya, lalu iya but.

³⁷Tang Jesus ke diangkatka Allah Taala ari mati, enda but.

³⁸Nya alai, menyadi, awakka semua kita nemu, ulih Jesus pesan pasal pengampun dosa dipadahka ngagai kita,

³⁹Ulih Jesus, semua orang ke arap dilepaska ari semua dosa ti enda ulih dibuai ngena Adat Moses.

⁴⁰Nya alai bejaga kita, ngambika utai ti disebut sida nabi, enda nyadi ba kita:[78]

⁴¹ ‘Dingaka tu ulih kita, kita ke ngeleseka Allah Taala! Awakka kita balat alit ati, lalu mati! Laban Aku ngereja utai lebuh maya kita, utai ti enda dikarapka kita, taja pen orang nerangka utai nya ngagai kita!’ ”

⁴²Lebuh Paul seduai Barnabas pansut ari balai gempuru nya, orang mayuh minta seduai iya bejakuka pasal utai nya baru lebuh hari Sabat ti deka datai.

⁴³Lebuh orang mayuh udah mupuk ari balai gempuru nya, mayuh orang Judah, enggau orang bansa bukai ke angkunka Allah Taala sereta udah masuk pengarap orang Judah, nitihka Paul seduai Barnabas, lalu seduai iya meransang sida majak tetap ati idup dalam pengasih Allah Taala.

⁴⁴Lebuh hari Sabat ti nangkanka nya, nyauka semua orang ke dalam nengeri nya datai mendingka jaku Tuhan.[79]

⁴⁵Tang lebuh orang Judah meda pemayuh orang, sida kepapas. Sida lalu ngelese sereta nyakal jaku Paul.

⁴⁶Paul seduai Barnabas bejaku enggau berani. Ku seduai iya, “Jaku Allah Taala endang enda tau enda disebut dulu ngagai kita. Tang laban kita nulak jaku nya, lalu kita ngira diri enda patut nerima pengidup ti meruan belama iya, kami diatu deka nguingka diri ngagai orang bansa bukai.

⁴⁷ Laban tu pesan ti udah diberi Tuhan ngagai kami, ‘Aku udah ngaga seduai nyadi penampak ke orang bansa bukai, ngambika seduai mai pengelepas nyentuk ngagai ujung dunya.’ ”

⁴⁸Lebuh orang bansa bukai ninga nya, sida gaga ati, lalu muji jaku Allah Taala, lalu sida ke udah dipilih nerima pengidup ti meruan belama iya, arap.

⁴⁹Jaku Tuhan lalu ngelekai ngagai semua endur di menua nya.

⁵⁰Tang orang Judah ngeruga ati orang indu ke tinggi pangkat ke angkunka Allah Taala, enggau sida lelaki ke tinggi pangkat di nengeri nya, lalu nyungkak sida merinsaka Paul seduai Barnabas, lalu muru seduai iya ari menua sida.

⁵¹ Nya alai Paul seduai Barnabas nesai abus ari kaki seduai iya, kena ngelaban sida, lalu mupuk ngagai Ikonium.

⁵²Sida murid lalu gaga amat ati, sereta penuh laban Roh Kudus.