Read Iban Surat Pasal Kereja Rasul 14 Bible Online

Surat Pasal Kereja Rasul 14 - Iban bible

Surat Pasal Kereja Rasul 14

¹Di Ikonium seduai iya, baka selama tama ngagai balai gempuru orang Judah lalu bejaku, lalu mayuh amat orang Judah enggau orang bansa bukai arap.

²Tang orang Judah ke enda arap, ngeruga sereta ngerachun runding orang bansa bukai ngelaban orang ke arap.

³Nya alai seduai iya lama diau di Ikonium, bejaku enggau berani ngarika Tuhan, lalu Tuhan ngamatka pesan pasal pengasih Iya ngena kereja ajih enggau kereja ti nyelai ti dikereja Iya ngena seduai iya.

⁴Tang orang di nengeri nya beserekang penemu. Sekeda setanah enggau orang Judah, lalu sekeda setanah enggau rasul dua iku nya.

⁵Lalu lebuh orang bansa bukai, enggau orang Judah, enggau bala tuai sida deka nguji ngemediska seduai iya, lalu deka nuku seduai iya ngena batu,

⁶seduai iya nemu pasal nya lalu rari ngagai Listra enggau Derbe di menua Likonia, enggau ngagai menua ti ngelingi nya,

⁷lalu majakka pengawa nusui Berita Manah dia.

⁸Nyadi di Listra bisi siku lelaki ke enda ulih bejalai, ke udah lemi kenyau ari ada, lalu nadai kala bejalai.

⁹Iya mendingka Paul bejaku. Paul lalu merening ngagai iya, lalu lebuh iya meda orang nya bisi pengarap kena ngeraika,

¹⁰Paul lalu bejaku enggau nyawa ti inggar, “Bediri nuan!” Orang nya lalu engkejuk angkat, lalu belabuh bejalai.

¹¹Lebuh orang mayuh meda utai ti udah dikereja Paul, sida lalu manjung ngena jaku orang Bansa Likonia, “Bala petara udah nurun ngagai kitai baka gamal mensia!”

¹²Sida lalu ngumbai Barnabas Seus, lalu Paul dikumbai sida Hermis, laban iya orang ke bejaku ngarika seduai iya.

¹³Imam petara Seus, (rumah sembiang Seus enda jauh ari luar nengeri), lalu mai jelu sapi ti lelaki enggau sengkilung bunga ngagai pintu nengeri, laban iya enggau orang mayuh deka ngenjuk piring ngagai rasul dua iku nya.

¹⁴Tang lebuh rasul Barnabas seduai Paul ninga nya, seduai iya lalu nyarikka gari diri, lalu belanda ngagai tekang bala mayuh, lalu bejaku enggau nyawa ti inggar,

¹⁵ “Nama kebuah kita ngereja utai tu? Kami duai tu mensia baka kita, lalu kami mai Berita Manah ngagai kita, ngambika kita ngelengkaka utai ti nadai guna tu lalu nguingka diri ngagai Allah Taala ti idup, ke udah ngagai langit, tanah, tasik, enggau semua utai ti dalam sida.

¹⁶Dulu menya Iya nejuka semua bansa idup nitihka peneka ati sida empu,

¹⁷tang taja pia, Iya enda nejuka Diri nadai saksi ke utai ti manah ti dikereja Iya -- Iya meri kita ujan, ngasuh utai ti ditanam kita bebuah lebat nitihka musin, lalu ngemuaska kita ngena pemakai lalu ngemenuhka ati kita enggau pengaga.”

¹⁸Tang taja pen seduai iya bejaku munyi nya, seduai iya nyauka enda ulih nagang orang mayuh meri seduai iya piring.

¹⁹ Tang sekeda orang Judah datai ari Antiok enggau ari Ikonium, lalu nguingka ati orang mayuh. Sida lalu nuku Paul ngena batu, lalu ngirit iya pansut ari nengeri nya, laban sida ngumbai iya udah mati.

²⁰Tang lebuh sida murid begelumu ngelingi iya, iya angkat lalu pulai baru ngagai nengeri. Hari siti, iya mupuk enggau Barnabas ngagai Derbe.

²¹Lebuh seduai iya udah nusui Berita Manah ngagai orang di nengeri nya, lalu mayuh orang nyadi murid, seduai iya lalu pulai baru ngagai Listra, Ikonium, enggau ngagai Antiok.

²²Dia seduai iya ngeringka semengat sida murid, lalu meransang sida seruran tetap dalam pengarap. Ku seduai iya, “Kitai endang enda tau enda ngasaika mayuh macham penusah enti kitai deka tama ngagai Perintah Allah Taala.”

²³Lebuh seduai iya udah nuduhka orang nyadi tuai ba genap buah eklisia, seduai iya lalu nyerahka sida ngena sampi sereta bepasa ngagai Tuhan ke dikarapka sida.

²⁴Udag nya seduai iya bejalai nengah menua Pisidia, lalu datai di Pampilia.

²⁵Lebuh seduai iya udah madahka jaku Tuhan di Perga, seduai iya lalu nurun ngagai Atalia.

²⁶Ari nya seduai iya belayar ngagai Antiok, alai seduai iya ke udah diserahka ngagai ibun Allah Taala ketegal pengawa ti udah tembu dikereja seduai iya.

²⁷Lebuh seduai iya datai di Antiok, seduai iya lalu ngempuruka raban eklisia, lalu madahka semua utai ti udah dikereja Allah Taala ngena seduai iya, enggau pasal Allah Taala ke udah muka pintu pengarap ngagai orang bansa bukai.

²⁸Lalu seduai iya diau lama dia enggau bala murid.