Read Iban Surat Pasal Kereja Rasul 15 Bible Online

Surat Pasal Kereja Rasul 15 - Iban bible

Surat Pasal Kereja Rasul 15

¹ Tang sekeda orang datai ari Judea lalu ngajar bala menyadi, ku sida, “Enti kita enda ditutus nitihka adat asal Moses, kita enda ulih diselamatka.”

²Lalu lebuh Paul seduai Barnabas udah bebendar bekelikuh ngelaban sida pasal pekara nya, Paul seduai Barnabas, enggau sekeda orang bukai lalu diasuh mupuk ngagai Jerusalem ngambika sida berandauka pasal pekara tu enggau sida rasul enggau tuai eklisia.

³Nya alai raban eklisia lalu ngasuh sida mupuk, lalu lebuh sida bejalai nengah menua Poenisia enggau Samaria, sida madahka pasal orang bansa bukai ke udah nguingka diri ngagai Allah Taala, lalu semua sida ke arap[80] gaga amat ati ninga nya.

⁴Lebuh sida datai di Jerusalem, sida disambut raban eklisia enggau sida rasul enggau sida tuai eklisia. Sida lalu madahka pasal semua utai ti udah dikereja Allah Taala ngena sida.

⁵Tang sekeda orang ke arap, ke ari raban orang Parisi, bediri lalu bejaku, “Orang bansa bukai enda tau enda ditutus, lalu diasuh nitihka Adat Moses.”

⁶Sida rasul enggau sida tuai eklisia lalu bejuraika pekara nya.

⁷ Lebuh sida udah lama belabanka penemu pasal pekara nya, Peter lalu bediri, lalu bejaku ngagai sida, ku iya, “Menyadi, kita nemu, suba Allah Taala udah milih aku ari bala kita, ngasuh aku nusui Berita Manah ngagai orang bansa bukai, ngambika sida ulih ninga, lalu arap.

⁸ Lalu Allah Taala, ke nemu ati semua mensia, udah besaksi ngagai sida, lebuh Iya meri Roh Kudus ngagai sida, baka ti udah dikereja Iya ngagai kitai,

⁹lalu lebuh Iya udah nuchi ati sida ngena pengarap, Iya nadai ngagai sida lain ari kitai.

¹⁰Nya alai diatu, nama kebuah kita nguji Allah Taala, ngengkahka tangkun ti berat ba rekung sida murid, tangkun ti enda ulih disan aki ini kitai tauka kitai empu?

¹¹Ukai baka nya, tang kitai arapka diri deka diselamatka ulih pengasih Tuhan Jesus, baka sida.”

¹²Semua orang ke begempuru dia lalu nadai engkeretik siku, lebuh sida mendingka Barnabas seduai Paul nusui pasal semua kereja ajih enggau kereja ti nyelai ti udah dikereja Allah Taala ngena seduai iya ba orang bansa bukai.

¹³Lebuh seduai iya udah badu bejaku, James lalu nyaut, “Menyadi, pendingka aku!

¹⁴Simon udah nusui pasal jalai Allah Taala terubah nurunka pengasih Iya ngagai orang bansa bukai, lalu ngaga sekeda sida nyadi nembiak Iya.

¹⁵Tu besetuju enggau jaku sida nabi, munyi ti udah ditulis,

¹⁶ ‘Udah bekau nya, Aku deka pulai baru, lalu ngaga baru rumah David ti udah runtuh lalu ngaga iya baru ti udah nyadi tembawai, lalu nirika iya baru,

¹⁷ngambika semua bansa ngiga Tuhan, nyengkaum semua orang bansa bukai ke udah dikangauka nyadi nembiak Aku. Ku Tuhan bejaku ke udah madahka utai tu

¹⁸kenyau ari dulu kelia.’

¹⁹Nya alai, aku udah mutuska runding, kitai enda patut ngenusahka orang bansa bukai ke nguingka diri ngagai Allah Taala,

²⁰ tang kitai patut nulis ngagai sida, madahka sida enda tau makai utai ti kamah laban engkeramba, enda tau ngereja ulah ti kamah, enda tau makai jelu ti udah mati dichekal, lalu enda tau makai darah.

²¹Laban Adat Moses, kenyau ari berapa serak, lama udah dipadahka dalam semua nengeri, lalu dibacha tiap-tiap hari Sabat dalam balai gempuru.”

²²Udah nya, sida rasul enggau bala tuai eklisia, disukung semua raban eklisia, lalu berunding deka milih orang ari raban sida lalu ngasuh orang nya bejalai ngagai Antiok nyempulang Paul seduai Barnabas. Sida lalu milih Judas (ke dikumbai Barsabas) seduai Silas, dua iku tuai orang ke arap,

²³mai surat tu: “Menyadi, kami ke rasul enggau tuai eklisia, ngirumka tabi basa ngagai semua bala kita ke orang bansa bukai, ke diau di Antiok di menua Siria enggau di Silisia.

²⁴Kami bisi udah ninga sekeda orang ari bala kami, tang ukai ari asuh kami, bisi udah nyebut utai ti ngenusahka ati kita

²⁵nya alai semua kami udah besetuju deka milih pengari[81] lalu ngasuh sida nemuai ngagai kita, nyereta Barnabas seduai Paul, menyadi ti dikerinduka kitai,

²⁶ke udah berambunka nyawa ketegal Jesus Kristus Tuhan kitai.

²⁷Nya alai, kami udah ngasuh Judas seduai Silas nemuai ngagai kita, lalu seduai iya deka madah ngagai kita mua mata utai ti ditulis kami dalam surat tu.

²⁸Laban dalam runding Roh Kudus enggau dalam runding kami, kami enda patut nating kita enggau utai bukai, kelimpah ari atur tu, iya nya:

²⁹anang makai pemakai ti udah diberi ngagai engkeramba, anang makai darah, anang makai jelu ti mati dichekal, anang ngereja ulah ti kamah. Enti kita enda ngereja utai nya, nya manah amat. Selamat tinggal.”

³⁰Nya alai sida lalu diasuh mupuk lalu mansang ngagai Antiok. Lebuh sida udah ngempuruka semua orang ke arap, sida lalu nyuaka surat nya ngagai sida.

³¹Lebuh raban eklisia[82] macha surat nya, sida gaga amat ati ninga jaku peransang nya.

³²Judas seduai Silas, ke sama-sama nabi, bejaku lama ngagai sida meransang lalu ngeringka sida ke arap.[83]

³³Lebuh seduai iya udah lama diau dia, sida ke arap[84] lalu ngirumka seduai iya pulai baru enggau selamat ngagai orang ke udah ngirumka seduai iya.[85]

³⁵Tang Paul seduai Barnabas mengkang di Antiok, begulai enggau mayuh orang bukai, ngajar sereta madahka jaku Tuhan.

³⁶Apin tentu lama udah bekau nya, Paul lalu nyebut ngagai Barnabas, “Aram tua pulai baru lalu nemuai ngagai sida ke arap[86] dalam semua nengeri ti udah alai tua nusui jaku Tuhan, deka nemu pasal pemansang sida.”

³⁷Nyadi Barnabas keran deka mai John Mark enggau seduai iya,

³⁸ tang Paul berunding enggai mai John Mark enggau seduai iya, laban John Mark udah ninggalka seduai iya di Pampilia, lalu enda enggau seduai iya ngereja pengawa nya.

³⁹Seduai iya balat amat beserekang penemu, datai ke seduai iya nyau beserara ari pangan diri. Barnabas mai Mark enggau iya, lalu belayar ngagai Saiprus,

⁴⁰tang Paul milih Silas lalu mupuk, udah bekau sida ke arap[87] nyerahka iya ngagai pengasih Tuhan.

⁴¹Paul lalu bejalai nengah menua Siria enggau menua Silisia, ngeringka eklisia.