Read Iban Surat Pasal Kereja Rasul 16 Bible Online

Surat Pasal Kereja Rasul 16 - Iban bible

Surat Pasal Kereja Rasul 16

¹Paul mega bejalai ngagai Derbe enggau ngagai Listra, alai siku murid ke benama Timoti diau. Indai iya orang Judah ke udah nyadi orang ke arap, tang apai iya orang bansa Gerika.

²Semua sida ke arap[88] di Listra enggau di Ikonium bela muji Timoti.

³Paul deka mai Timoti nyempulang iya. Iya lalu nutus Timoti, ketegal orang Judah ke diau ba sebelah menua nya, laban semua sida nemu apai Timoti endang orang bansa Gerika.

⁴Lebuh seduai iya bejalai ari nengeri siti ngagai nengeri siti, seduai iya meri pemutus aum bala rasul enggau bala tuai eklisia di Jerusalem, lalu ngasuh sida nitihka nya.

⁵Nya alai, eklisia dikeringka dalam pengarap, lalu pemayuh tubuh sida nambah-menambah tiap hari.

⁶Seduai iya bejalai nengah menua Prigia enggau Galatia, laban Roh Kudus enda nyagi seduai iya nusui pesan Tuhan di menua Asia.

⁷Lebuh seduai iya datai ba garis entara menua Misia, seduai iya nguji mansang ngagai Bitinia, tang Roh Jesus enda nyagi seduai iya.

⁸Nya alai, seduai iya lalu bejalai mansa menua Misia terus ngagai Troas.

⁹Malam nya Paul bisi genera meda siku orang Masedonia bediri minta iya datai, ku iya, “Datai ngagai menua Masedonia lalu saup kami.”

¹⁰Lebuh Paul udah meda genera nya, kami duai lalu tekala nya nguji mupuk ngagai menua Masedonia, laban kami duai nemu Allah Taala udah ngasuh kami duai nusui Berita Manah ngagai orang di menua nya.

¹¹Kami belayar terus ari Troas ngagai Samotras, lalu hari siti terus ngagai Neapolis,

¹²lalu ari nya ngagai Pilipi, indu nengeri pelilih menua Masedonia, ti kena pegai perintah Rome. Kami duai diau di nengeri nya dua tiga hari.

¹³Lebuh hari Sabat, kami duai pansut ari nengeri nya ngagai tebing sungai, laban kami duai ngadang endur nya bisi palan alai orang Judah begempuru besampi. Kami duai nudukka diri dia, lalu bejaku ngagai sida indu ke begempuru dia.

¹⁴Siku indu ke benama Lidia, ke nyembah Allah Taala, mendingka kami duai. Iya datai ari nengeri Tiatira, lalu iya bejualka kain ungu. Tuhan muka ati iya, ngasuh iya keran deka mendingka utai ti disebut Paul.

¹⁵Lebuh Lidia enggau semua sida sebilik udah dibaptisa, iya lalu ngumbuk kami duai ku iya, “Enti seduai ngira aku tetap ati ngagai Tuhan, aram diau dalam rumah aku.” Kami duai alah diumbuk iya.

¹⁶Nyadi sekali, lebuh kami duai mansang ngagai siti palan alai besampi, kami duai betemu enggau siku indu ke ulun ke agi biak umur, ke dirasuk antu ti ngasuh iya nemu nujum. Indu nya bulih mayuh amat duit ari pengawa nujum nya ke orang ke bempu iya.

¹⁷Lebuh iya nitihka Paul enggau bala kami, iya manjung, “Orang tu nembiak Allah Taala ti Pemadu Tinggi, ke madahka jalai pengelepas ngagai kita!”[89]

¹⁸Berapa hari iya majak ngereja nya. Tang Paul, ke nyau ringat laban indu nya, mutar lalu bejaku ngagai roh nya, “Dalam nama Jesus Kristus, Aku muru nuan pansut ari iya!” Roh nya lalu tekala nya pansut ari indu nya.

¹⁹Tang lebuh orang ke bempu indu nya nemu diri nadai agi jalai bulih duit, sida lalu nangkap Paul seduai Silas, lalu ngirit seduai iya ngagai pasar, ngagai orang ke megai perintah.

²⁰Lalu lebuh sida udah mai seduai iya ngagai bala hakim, sida lalu bejaku, “Seduai tu orang Judah, lalu seduai iya ngaga pengachau di nengeri kitai tu,

²¹ngajar adat ti enda tau diterima tauka dititihka kitai orang Rome.”

²² Bala orang mayuh lalu ngamuk Paul seduai Silas, lalu sida hakim ngasuh orang ngeruntun gari ari tubuh seduai iya, lalu ngasuh seduai iya disipat.

²³Lebuh sida udah balat amat nyipat seduai iya, sida lalu nutup seduai iya dalam rumah jil, lalu ngasuh jejaga rumah jil nya nyaga seduai iya enggau naka ulih.

²⁴Lebuh jejaga rumah jil nya udah nerima atur nya, iya lalu nutup seduai iya dalam bilik jil ti di dalam amat, lalu nganchin kaki seduai iya ngena kanchin kayu.

²⁵Kira ba urung tengah malam, Paul seduai Silas besampi sereta belagu muji Allah Taala, lalu orang jil ti bukai mendingka seduai iya.

²⁶Tanah lalu ngenyit berenyang balat amat, datai ke pugu rumah jil nya nyau begusak. Semua pintu lalu tebuka tekala nya, lalu rantai tebelengka ari semua orang jil.

²⁷Lebuh jejaga rumah jil nya dani, lalu meda pintu rumah jil nyau abis tebuka, iya lalu nyintak pedang deka munuh diri, laban iya ngumbai orang jil udah rari.

²⁸Tang Paul ngangau enggau nyawa ti inggar, “Anang ngemediska diri, laban semua kami bisi ditu magang!”

²⁹Jejaga rumah jil nya lalu ngasuh orang mai api, belanda tama, lalu getar-getar nyungkurka diri semak kaki Paul seduai Silas.

³⁰Udah nya iya mai seduai iya pansut, lalu bejaku, “Tuan, nama utai ti enda tau enda dikereja aku, ngambika aku diselamatka?”

³¹Ku Paul seduai Silas nyaut, “Arapka Tuhan Jesus, lalu nuan deka diselamatka--nuan enggau semua kita sebilik.”

³²Seduai iya lalu madahka jaku Tuhan[90] ngagai iya, enggau ngagai semua orang ke dalam rumah iya.

³³Iya lalu mai seduai iya tekala nya lalu nuchi bakal seduai iya. Udah nya iya enggau semua sida sebilik lalu dibaptisa tekala nya.

³⁴Udah nya iya mai Paul seduai Silas ngagai rumah iya empu, lalu meri seduai iya makai. Iya enggau sida sebilik gaga amat ati, laban sida diatu udah arapka Allah Taala.

³⁵Tang pagi hari siti, sida hakim lalu bejaku enggau orang polis, ku sida, “Lepaska orang nya.”

³⁶Jejaga jil nya lalu madahka jaku nya ngagai Paul. Ku iya, “Sida hakim udah ngasuh seduai dilepaska. Nya alai pansut seduai, lalu mupuk enggau selamat.”

³⁷Tang ku Paul nyaut, “Sida udah nyipat kami duai di mua orang mayuh, taja pen kami duai apin diukum. Kami tu peranak Rome, lalu sida udah nutup kami duai dalam rumah jil. Patut tauka enda sida diatu ngelepaska kami ngena chara belalai? Enggai nyadi baka nya! Awakka sida hakim empu datai lalu mai kami duai pansut.”

³⁸Polis nya lalu madahka jaku nya ngagai sida hakim, lalu sida takut lebuh sida ninga Paul seduai Silas nya peranak Rome.

³⁹Nya alai sida datai lalu minta ampun ngagai seduai iya. Udah nya sida mai seduai iya pansut ari rumah jil, lalu ngasuh seduai iya angkat ari nengeri nya.

⁴⁰Lebuh Paul seduai Silas udah pansut ari rumah jil, seduai iya lalu mupuk ngagai rumah Lidia. Lebuh seduai iya udah betemu enggau lalu udah meransang sida ke arap,[91] seduai iya lalu mupuk.