Read Iban Surat Pasal Kereja Rasul 17 Bible Online

Surat Pasal Kereja Rasul 17 - Iban bible

Surat Pasal Kereja Rasul 17

¹Lebuh Paul seduai Silas udah bejalai nengah menua Ampipolis enggau menua Apolonia, seduai iya lalu datai di Tesalonika, ti bisi sebuah balai gempuru orang Judah.

²Baka ti selalu dikereja iya, Paul lalu tama ngagai balai gempuru nya lalu dalam tiga hari Sabat beturut-turut, iya betalat enggau sida ari Bup Kudus,

³madah sereta nerangka Kristus[92] endang enda tau enda kena perinsa, lalu angkat idup baru ari mati. Ku Paul bejaku, “Jesus ke dipadahka aku ngagai kita nya meh Kristus.”[93]

⁴Sekeda sida arap, lalu nitihka Paul seduai Silas, lalu baka nya mega mayuh amat orang bansa Gerika ke angkunka Allah Taala lalu udah masuk pengarap orang Judah, enggau mayuh indu ke tinggi pangkat.

⁵Tang orang Judah kepapas, lalu ari saup orang ke jai ba sebelah pasar, sida ngempuruka lalu nyungkak orang dalam nengeri nya begau. Lebuh sida begigaka Paul seduai Silas, deka mai seduai iya ngagai bala mayuh, sida nyerang rumah Jason.

⁶Lebuh sida nadai tetemuka seduai iya, sida lalu ngirit Jason enggau sekeda sida ke arap[94] ngagai bala pemesai di nengeri nya. Ku sida manjung, “Orang tu udah ngaga pengachau di semua endur, lalu seduai iya udah mega datai ditu,

⁷lalu Jason udah nerima seduai iya nyadika temuai iya. Seduai iya ngelaban atur Raja Besai, madahka bisi siku agi raja ke benama Jesus.”

⁸Orang mayuh enggau bala pemesai di nengeri nya lalu irau ati ninga nya,

⁹lalu lebuh sida udah ngambi duit jamin ari Jason enggau ari sida ti bukai, sida lalu ngelepaska Paul seduai Silas.

¹⁰Malam nya sida ke arap[95] lalu nganjung Paul seduai Silas ngagai Beria, lalu lebuh seduai iya datai di Beria, seduai iya lalu mansang ngagai balai gempuru.

¹¹Nyadi orang Judah di Beria tebuka agi ati ari orang Judah ke di Tesalonika, laban sida ransing amat nerima pesan Tuhan, sereta mansik Bup Kudus tiap hari keran deka nemu enti jaku nya amat tauka enda.

¹²Nya alai mayuh sida arap, nyengkaum mayuh indu enggau lelaki bansa Gerika ke tinggi pangkat.

¹³Tang lebuh orang Judah ke di Tesalonika ninga Paul udah mega nusui jaku Allah Taala di Beria, sida lalu mansang ngagai nengeri nya mega lalu belabuh nyungkak sereta megau orang mayuh.

¹⁴Sida ke arap[96] lalu tekala nya nganjung Paul ngagai tebing tasik, tang Silas seduai Timoti tinggal di Beria.

¹⁵Orang ke nganjung Paul lalu mai iya nyentuk ngagai Atens. Lebuh sida udah nerima atur ari Paul ngasuh Silas seduai Timoti datai ngagai iya di Atens enggau naka pengelengkas, sida lalu ninggalka iya.

¹⁶Lebuh Paul benung nganti Silas seduai Timoti di Atens, ati iya balat tusah meda nengeri nya penuh laban engkeramba.

¹⁷Nya alai iya betalat enggau orang Judah dalam balai gempuru sereta enggau orang bansa bukai ke angkunka Allah Taala, enggau sebarang orang ke enggau iya betemu tiap hari ba sebelah pasar.

¹⁸Sekeda raban orang ke dikumbai Epikuria [97] enggau raban orang ke dikumbai Stoik [98] mega betemu enggau iya. Ku sekeda sida, “Nama utai ti disebut orang ke kutap-kutap tu?” Ku sida ti bukai bejaku, “Iya munyi ke bejakuka pasal petara orang menua bukai.” Sida nyebut nya laban Paul nusui pasal Jesus enggau pengangkat ari mati. [99]

¹⁹Sida lalu mai Paul ngagai balai ti dikumbai Areopagus, lalu ku sida bejaku, “Kati ulih nuan madah ngagai kami ajar ti baru ti dibai nuan tu?

²⁰Ajar tu munyi ke nyelai didinga kami, nya alai kami keran deka nemu reti nya.” (

²¹Nyadi semua orang Atens, enggau orang kampar ke diau di nengeri nya, nadai pengawa bukai tang semina madahka tauka ningaka penemu ti baru.)

²²Nya alai Paul bediri di mua raban Areopagus, lalu bejaku, “Kita orang Atens, aku meda kita tu orang ke kering amat ba agama.

²³ Laban lebuh aku bejalai nengah nengeri kita, lalu meratika utai ti disembah kita, aku tetemuka siti alta ti ditulis enggau leka jaku tu, ‘Ke petara ti enda dikelala.’ Petara ti enda dikelala kita, ke disembah kita, nya meh petara ti dipadahka aku ngagai kita.

²⁴ Allah Taala ke ngaga dunya enggau semua utai ti dalam dunya, nya meh Tuhan ke merintah serega enggau dunya, lalu Iya ukai diau dalam rumah sembiang ti digaga mensia.

²⁵ Lalu Iya pen enda mega begunaka tulung ari mensia, laban Iya Empu ke meri pengidup enggau seput, enggau semua utai bukai, ngagai semua mensia.

²⁶ Iya udah ngaga semua bansa ari siku orang, lalu Iya ngasuh sida diau di serata dunya. Iya mega ngeletak umur sida, enggau endur alai sida diau,

²⁷ ngambika sida ngiga Allah Taala, nyangka begama ngiga Iya, lalu tetemuka Iya, taja pen Iya enda jauh ari kitai siku-siku.

²⁸Laban ‘Kitai idup, engkebut, sereta diau dalam Iya’ Munyi ti disebut sekeda bala kita empu ti landik bepantun, ‘Laban kitai tu mega anak Iya.’

²⁹Nya alai, laban kitai tu anak Allah Taala, kitai enda patut ngumbai Iya baka anak patung ti ditempa ari emas tauka ari pirak, tauka ari batu ulih pengelandik enggau penau mensia.

³⁰Taja pen Allah Taala enda ngingatka pemeli kitai mensia, tang diatu Iya ngasuh semua mensia di semua endur nesal ati ke dosa sida,

³¹ laban Iya udah ngeletak siti hari alai Iya deka ngakim semua dunya ngena pengelurus, ulih orang siku ke udah dipilih Iya, lalu Iya udah ngasuh semua mensia nemu utai nya deka nyadi, lebuh Iya ngangkatka orang nya ari mati!”

³²Lebuh sida ninga Paul bejakuka pasal pengangkat ari mati, sekeda sida ngelese. Tang ku sida ti bukai bejaku, “Kami keran deka mendingka nuan baru ba pasal pekara tu.”

³³Ba senentang nya Paul lalu ninggalka sida.

³⁴Tang sekeda ari bala sida nya nitihka Paul, lalu arap, nyengkaum Dionisius, ke raban Areopagus, enggau siku indu ke benama Damaris, enggau orang bukai ke enggau sida.