Read Iban Surat Pasal Kereja Rasul 18 Bible Online

Surat Pasal Kereja Rasul 18 - Iban bible

Surat Pasal Kereja Rasul 18

¹Udah bekau nya, Paul angkat ari Atens, lalu mupuk ngagai Korint.

²Di Korint iya tetemuka siku orang Judah ke benama Akuila, ke asal ari Pontus, ke baru udah pulai ari Itali enggau bini iya Prisila, laban Klaudius udah muru semua orang Judah ari nengeri Rome. Paul lalu betemu enggau seduai iya,

³lalu laban jalai Paul ngidupka diri sebaka enggau jalai pengidup Akuila seduai Prisila, iya lalu diau enggau seduai iya, lalu begulai gawa. Sida begagaka langkau kain.

⁴Tiap hari Sabat Paul berandau dalam balai gempuru, nguji nguingka ati orang Judah enggau ati orang Gerika.

⁵Lebuh Silas seduai Timoti datai ari Masedonia, Paul nadai ngereja pengawa bukai tang semina madahka jaku Tuhan, besaksi ngagai orang Judah madahka Jesus nya Kristus.[100]

⁶Lebuh sida nyakal sereta ngeleseka iya, iya lalu nesai abus ari gari iya, lalu bejaku ngagai sida, “Awakka kita empu betanggungjawapka diri empu! Aku nadai penyalah! Berengkah ari diatu, aku deka bejalai ngagai orang bansa bukai.”

⁷Iya lalu angkat ari balai gempuru nya, lalu mansang ngagai rumah siku orang bansa bukai ke benama Titus Justus, ke nyembah Allah Taala. Rumah Titus Justus berimbai enggau balai gempuru.

⁸Nyadi Krispus ke nyadi tuai balai gempuru, enggau sida sebilik, arapka Tuhan, lalu mayuh orang bukai di Korint ke ninga Paul bejaku, arap lalu dibaptisa.

⁹ Nyadi sekali, lebuh malam hari, Tuhan bejaku ngagai Paul dalam genera, “Anang takut, tang majak bejaku, lalu anang nejuka orang madamka jaku nuan,

¹⁰laban Aku bisi enggau nuan, lalu nadai orang ulih terengkah jari ba nuan lalu ngemediska nuan, laban Aku mayuh nembiak dalam nengeri tu.”

¹¹Paul lalu diau dia setaun enam bulan, ngajar jaku Allah Taala ngagai orang.

¹²Tang lebuh Galio dichiri nyadi gabenor menua Akaia, orang Judah besaup ngelaban Paul, lalu mai iya ngagai kot.

¹³Ku sida, “Orang tu ngumbuk orang mayuh nyembah Allah Taala ngena jalai ti ngelanggar Adat!”

¹⁴Lebuh Paul baru deka bejaku, Galio lalu bejaku ngagai orang Judah, “Enti pekara tu pasal penyalah ngelanggar adat, aku patut mendingka dawa kita orang Judah;

¹⁵tang laban pekara tu semina bekaul enggau pasal leka jaku, enggau pasal nama orang, enggau pasal adat kita empu, awakka kita empu meh mutarka pekara tu. Aku enggai ngatur pekara tu!”

¹⁶Iya lalu muru sida ari kot.

¹⁷Semua sida[101] lalu nangkap Sostenis ke nyadi tuai balai gempuru, lalu malu iya di mua kot. Tang Galio enda bedulika nya.

¹⁸ Lebuh Paul udah lama diau dia, iya lalu meri selamat tinggal ngagai sida ke arap,[102] lalu belayar ngagai menua Siria, disempulang Prisila seduai Akuila. Di Kankria iya ngukur buk iya, laban iya udah ngaga sumpah. [103]

¹⁹Lebuh sida datai di Epesus, Paul ninggalka Prisila seduai Akuila, mansang ngagai balai gempuru lalu berandau enggau orang Judah.

²⁰Lebuh sida minta iya diau lama agi dia, iya enggai.

²¹Tang lebuh iya meri selamat tinggal ngagai sida, iya bejaku, “Aku[104] deka nemuai baru ngagai kita, enti nya peneka Allah Taala.” Udah nya iya lalu belayar ari Epesus.

²²Lebuh iya udah sangkai di Siseria, iya lalu mansang ngagai Jerusalem, meri tabi basa ngagai raban eklisia dia, lalu udah nya mupuk ngagai Antiok.

²³Lebuh iya udah lama diau di Antiok, iya angkat lalu bejalai ari endur siti ngagai endur siti di menua Galatia enggau Prigia, ngeringka semua sida murid.

²⁴Lebuh maya nya, siku orang Judah ke benama Apollos, ke asal ari Aleksandria, datai di Epesus. Apollos tu orang ke lanchar bejaku, lalu nemu amat pasal Bup Kudus.

²⁵Iya udah diajar pasal Jalai Tuhan, lalu iya ransing amat madahka sereta ngajar enggau betul pasal Jesus, taja pen iya semina nemu pasal pemaptisa John.

²⁶Iya belabuh bejaku enggau berani dalam balai gempuru. Tang lebuh Prisila seduai Akuila ninga iya, seduai iya lalu mai iya ke tisi,[105] lalu nerangka ngagai iya penemu ti betul agi pasal Jalai Allah Taala.

²⁷Lalu lebuh iya deka mupuk ngagai menua Akaia, sida ke arap[106] di Epesus meransang iya, lalu nulis sepuchuk surat ngagai sida murid di Akaia, minta sida nyambut penatai iya. Lebuh iya datai di Akaia, iya bebendar amat nulung sida ke udah arap ulih pengasih Allah Taala,

²⁸laban iya balat amat ngalahka kelikuh orang Judah lebuh sida belabanka penemu enggau iya di mua orang mayuh, lebuh iya nunjukka ari Bup Kudus, Jesus nya Kristus.[107]