Read Iban Surat Pasal Kereja Rasul 19 Bible Online

Surat Pasal Kereja Rasul 19 - Iban bible

Surat Pasal Kereja Rasul 19

¹Lebuh Apollos agi di Korint, Paul bejalai nengah menua atas, lalu datai di Epesus. Dia iya tetemuka sekeda murid.

²Lalu ku iya nanya sida, “Kati kita bisi nerima Roh Kudus lebuh kita arap?” “Nadai,” ku sida nyaut. “Indah ninga pasal Roh Kudus deh kami enda kala.”

³Iya lalu nanya sida, “Baptisa nama ti dikena maptisa kita?” “Baptisa John,” ku sida nyaut.

⁴ Paul lalu bejaku ngagai sida, “John maptisa ngena baptisa nesal ati, ngasuh orang Israel arapka orang siku ke deka datai dudi ari iya, iya nya, Jesus.”

⁵Lebuh sida ninga nya, sida lalu dibaptisa dalam nama Tuhan Jesus.

⁶Lebuh Paul udah ngengkahka jari iya atas sida, Roh Kudus lalu nurun atas sida. Sida lalu bejaku ngena jaku ti nyelai, lalu benabi.

⁷Pemayuh semua sida kira dua belas iku.

⁸Paul lalu tama ngagai balai gempuru, lalu dalam kandang tiga bulan iya bejaku enggau berani, lalu betalatka pasal Perintah Allah Taala.

⁹Tang lebuh sekeda sida kieh ati, lalu enggai arap, sereta bejai Jalai Tuhan di mua semua raban sida, Paul ninggalka sida, lalu mai sida murid mupuk enggau iya, lalu tiap hari [108] iya betalat enggau sida dalam balai Tiranus.

¹⁰Iya ngereja nya dua taun, datai ke semua orang ke diau di menua Asia, nyengkaum orang Judah enggau orang bansa bukai, udah bela ampit magang ninga jaku Tuhan.

¹¹Allah Taala ngereja kereja ajih ti balat nyelai ngena Paul,

¹²datai ke perecha enggau serayung ti udah negu iya dibai ngagai orang ke sakit, lalu orang nya digeraika, lalu roh ti jai pansut ari sida.

¹³Udah nya sekeda orang Judah ke bejalai kia-kia muru roh ti jai, nguji ngena nama Tuhan Jesus muru roh ti jai, ku sida, “Aku muru nuan dalam nama Jesus ti dipadahka Paul.”

¹⁴Pengawa nya dikereja tujuh iku anak lelaki imam besai orang Judah ke benama Skeba.

¹⁵Tang ku roh ti jai nya bejaku ngagai sida, “Aku ngelala Jesus, lalu aku ngelala Paul, tang sapa kita tu?”

¹⁶Orang ke dirasuk antu nya lalu nerekam sida, nangkap sida lalu ngalahka sida. Sida lalu rari telanjai-lanjai ari rumah nya sereta abis bakal.

¹⁷Lebuh pekara tu ditemu semua orang Judah enggau orang bansa bukai ke diau di Epesus, semua sida takut magang, lalu nama Tuhan dikemesaika.

¹⁸Mayuh sida ke arap datai lalu ngaku, di mua orang mayuh, kereja ti jai ti udah dikereja sida.

¹⁹Mayuh manang datai mai bup sida, lalu nunu bup nya di mua orang mayuh. Lebuh rega semua bup nya diitung, rega semua utai nya nyau deka bulih lima puluh ribu singkap duit pirak.

²⁰Nya alai jaku Tuhan balat amat ngelekai sereta mansang dalam kuasa.

²¹Lebuh utai nya udah nyadi, Paul lalu berunding, ari iring Roh Kudus, deka bejalai nengah menua Masedonia enggau menua Akaia, mansang ngagai Jerusalem. Ku iya bejaku, “Lebuh aku udah nemuai kia, aku enda tau enda mega nemuai ngagai Rome.”

²²Nya alai iya ngirumka dua iku penulung iya, Timoti seduai Erastus, ngagai Masedonia, lalu iya empu diau lama mimit di menua Asia.

²³Ba urung maya nya pengachau balat amat nyadi ketegal Jalai Tuhan.

²⁴Siku tukang temaga ke benama Demetrius, ke begagaka engkeramba rumah sembiang ke petara Artemis ari pirak, meri penguntung ti besai ngagai tukang ke bekereja begagaka utai nya.

²⁵Iya ngempuruka sida, enggau orang bukai ke sebaka pengawa enggau sida, lalu bejaku ngagai sida, “Kita nemu, kitai bulih pengaya ari pengawa dagang kitai tu.

²⁶Lalu kita mega meda sereta ninga, ukai semina di Epesus tang nyau ka di serata semua menua Asia, orang ke benama Paul tu udah mujuk sereta nguingka mayuh orang arapka jaku iya lebuh iya madahka petara ti digaga ngena jari nya ukai petara.

²⁷Nya alai, dagang kitai tau jai nama, lalu rumah sembiang petara Artemis ti besai tu tau pulai nadai guna agi, lalu iya ke disembah semua orang di Asia enggau di serata dunya, nadai agi dibasa orang!”

²⁸Lebuh sida ninga nya, sida lalu pedis ati, lalu manjung, “Besai meh Artemis orang Epesus!”

²⁹Semua orang dalam nengeri nya lalu begau magang. Sida lalu belanda ngagai siti balai di nengeri nya, ngirit Gaius seduai Aristarkus, dua iku orang Masedonia ke sama bejalai enggau Paul.

³⁰Paul bisi amat ati deka mansang ngagai tekang bala mayuh, tang sida murid enda nyagi iya;

³¹indah sekeda orang perintah di menua nya, ke endang pangan Paul empu, deh ngirumka pesan ngagai iya, minta iya enda mansang ngagai balai nya.

³²Nyadi semua orang ke begempuru ba balai nya nyau bekerauh begau. Sekeda nyebut tu, lalu sekeda nyebut nya, laban mayuh sida enda nemu kebuah sida begempuru.

³³Sekeda orang Judah ngejuka Aleksander mansang ke mua, lalu madah ngagai iya utai ti patut disebut iya. Aleksander lalu ngepaika jari, minta orang badu agi ragak ngambika iya ulih bejaku ngarika diri di mua orang mayuh.

³⁴Tang lebuh sida ngelala iya nya orang Judah, semua sida lalu manjung kira dua jam, ku sida, “Besai meh Artemis orang Epesus!”

³⁵Tang lebuh kerani nengeri [109] udah ngasuh orang badu agi ragak, iya lalu bejaku, “Orang Epesus, semua orang nemu nengeri Epesus endang bisi rumah sembiang ke petara Artemis ti besai, enggau pasal anak patung ti labuh ari langit.

³⁶Laban utai nya enda ulih disangkal, kita patut diau diri, lalu enda ngereja utai ti enda menuku.

³⁷Kita udah mai orang tu kitu, taja pen sida nadai ngerumpak rumah sembiang tauka ngeleseka petara kitai.[110]

³⁸Nya alai, enti Demetrius enggau bala orang ke gawa ke iya deka bedawaka sapa-sapa, bilik kot endang seruran tebuka, lalu kitai bisi hakim. Awakka sida bedawaka pangan diri dia.

³⁹Enti kita bisi utai bukai ti keran deka ditemu kita, utai patut diputarka lebuh orang mayuh begempuru.

⁴⁰Laban kitai tau dikumbai orang salah ngaga pengachau sehari tu, laban kitai nadai kebuah begau baka tu.”

⁴¹Lebuh iya udah nyebut nya, iya lalu ngasuh orang mayuh pulai.