Read Iban Surat Pasal Kereja Rasul 2 Bible Online

Surat Pasal Kereja Rasul 2 - Iban bible

Surat Pasal Kereja Rasul 2

¹ Lebuh hari Pentikos udah datai, semua sida begempuru ba endur siti.

²Tekala nya utai ti munyi ribut biaubalai lalu datai ari langit, lalu ngemenuhka rumah ti alai sida duduk.

³Utai ti baka daun api lalu pegari ba tengah-tengah sida, ti bechabang lalu inggap ba genap iku sida.

⁴Semua sida lalu dipenuhka enggau Roh Kudus, lalu belabuh bejaku ngena jaku orang bansa bukai nitihka penau ti diberi Roh Kudus.

⁵Nyadi di Jerusalem lebuh maya nya bisi orang Judah ke angkunka Allah Taala, ke datai ari semua menua di dunya tu.

⁶Lebuh sida ninga munyi utai nya, sida lalu begelumu, lalu semua sida tekenyit ati, laban genap iku sida bela ninga bala orang ke arap nya bejaku ngena jaku bansa sida.

⁷Sida balat alit ati sereta iran, lalu nanya, “Ukai enda semua sida ke bejaku tu orang Galili magang?

⁸Nya alai nama kebuah kitai bela ninga sida tu bejaku ngena jaku kitai empu?

⁹Kitai tu datai ari menua Partia, Media enggau Elam, Mesopotamia, Judea, enggau Kapadosia, Pontus enggau Asia,

¹⁰Prigia enggau Pampilia, Ejip enggau Libia semak Sairin, enggau temuai ari Rome, nyengkaum orang Judah enggau orang bansa bukai ke udah masuk pengarap orang Judah,

¹¹orang ari Krit enggau Arabia. Tang semua kitai bela ninga sida tu bejaku ngena jaku kitai empu, madahka pasal pemesai pengawa Allah Taala!”

¹²Semua sida balat alit ati sereta beba penemu. Ku sida bejaku enggau pangan diri, “Nama reti utai tu?”

¹³Tang sida ti bukai ngelese, ku sida “Sida tu mabuk!”

¹⁴Tang Peter, ke bediri enggau sida ke sebelas iku, lalu bejaku enggau nyawa ti inggar ngagai orang mayuh: “Kita orang Judah, enggau semua kita ke diau di Jerusalem, awakka kita nemu utai tu, lalu pendingka utai ti disebut aku.

¹⁵Iya ti bendar, orang tu ukai mabuk munyi ti disangka kita, laban jam diatu baru pukul semilan pagi.

¹⁶Tu meh utai ti udah disebut nabi Joel:

¹⁷ ‘Ba hari ti penudi, ku Allah Taala bejaku, Aku deka nuang Roh Aku ngagai semua mensia, lalu anak lelaki enggau anak indu kita deka benabi,[6] lalu anak bujang kita deka meda genera, lalu sida ke tuai deka bemimpi.

¹⁸Sigi amat. Lebuh maya nya Aku deka nuang Roh Aku ngagai bala ulun ti indu enggau bala ulun Aku ti lelaki, lalu sida deka benabi. [7]

¹⁹Lalu Aku deka ngayanka tanda ti nyelai di langit enggau kereja ti nyelai ba dunya di baruh, darah, api enggau sebun ti baka asap.

²⁰Mata hari deka piam, lalu bulan deka bebali mirah baka darah, sebedau Hari Tuhan datai hari ti besai sereta bemulia nya.

²¹Lalu barang sapa ngangauka nama Tuhan, deka diselamatka.’

²²“Kita orang Israel, dingaka jaku aku tu. Jesus orang Nasaret[8] udah dikirumka Allah Taala ngagai kita. Utai tu nyata ari kereja ajih, enggau kereja ti nyelai ti dikereja Allah Taala, ulih Jesus, ba bala kita. Kita empu nemu utai tu, laban utai tu nyadi ba bala kita.

²³ Jesus tu udah diserahka ngagai kita nitihka pelan enggau penemu Allah Taala. Kita ngeregang lalu munuh Iya ngena jari orang ke ari luar Adat.

²⁴ Tang Allah Taala udah ngangkatka Iya lebuh Iya udah ngelepaska Iya ari pemati, laban pemati nadai kuasa atas Iya.

²⁵ Laban David udah bejakuka pasal Iya munyi tu: ‘Aku seruran meda Tuhan di mua aku. Laban Iya muak ari kanan aku, nya alai aku enda takut.

²⁶Nya alai ati aku gaga lalu dilah aku rami gaga, lalu aku deka diau dalam pengadang,

²⁷laban Nuan enda ninggalka aku dalam dunya pemati,[9] tauka nejuka Nembiak Nuan Ti Kudus, but.

²⁸Nuan udah nunjukka jalai pengidup ngagai aku. Nuan deka seruran enggau aku lalu ati aku deka penuh laban pengaga.’

²⁹“Menyadi, awakka aku bejaku enggau terang ngagai kita pasal aki kitai David. Iya udah mati lalu udah dikuburka, lalu kubur iya agi bisi ditu nyentuk ngagai diatu.

³⁰ Laban iya endang nabi, iya nemu Allah Taala udah ngaga semaya ngena sumpah enggau iya madahka Diri deka ngasuh siku ari peturun iya nyadi raja.

³¹ Laban David nemu utai tu deka nyadi, nya alai iya bejakuka pasal pengangkat Kristus[10] ari mati. Ku iya, ‘Iya enda ditinggalka di dunya pemati,[11] lalu tubuh Iya pen enda mega but.’

³²Jesus tu ke udah diangkatka Allah Taala ari mati, lalu semua kami tu nyadika saksi nya.

³³Iya udah diangkatka muak ari kanan Allah Taala lalu lebuh Iya udah nerima Roh Kudus ti udah disemaya Apai, Iya nuang Roh Kudus nya ngagai kami, baka ti dipeda enggau didinga kita.

³⁴ Laban ukai David ke niki ke serega. Tang David empu nyebut: ‘Ku Tuhan bejaku ngagai Tuhan aku: Duduk muak ari kanan Aku

³⁵datai ke Aku udah ngaga munsuh Nuan nyadika pelasar kaki Nuan.’

³⁶“Nya alai, awakka semua orang Israel nemu enggau terang: Jesus ke udah diregang kita, udah digaga Allah Taala nyadi Tuhan enggau Kristus!”[12]

³⁷Lebuh orang mayuh ninga nya, ati sida balat tusah. Sida lalu bejaku ngagai Peter enggau ngagai sida rasul ti bukai, “Menyadi, nama utai ti patut dikereja kami?”

³⁸Ku Peter bejaku ngagai sida, “Nesal ati ke dosa kita, genap iku kita, lalu dibaptisa dalam nama Jesus Kristus, ngambika dosa kita diampun, lalu kita deka nerima Roh Kudus nyadika pemeri ti diberi Allah Taala.

³⁹ Semaya nya diberi ngagai kita, enggau ngagai anak kita, enggau ngagai semua orang ke jauh, iya nya semua orang ke dikangauka Tuhan Allah Taala kitai ngagai Iya.”

⁴⁰Peter besaksi ngagai sida ngena mayuh jaku bukai, lalu meransang sida. Ku iya, “Lepaska diri ari rebak ti jai tu!”

⁴¹Sida ke arapka pesan iya, lalu dibaptisa. Kira tiga ribu iku orang ditambahka ngagai bala sida sehari nya.

⁴²Sida angkun belajar ari sida rasul, begempuru enggau sida, makai roti, sereta besampi.

⁴³Genap iku orang bela nangi laban mayuh kereja ajih enggau kereja ti nyelai dikereja sida rasul.

⁴⁴ Semua orang ke arap begulai enggau pangan diri lalu bekunsika pemisi sida enggau pangan diri.

⁴⁵Sida nyual reta tengkira sida, lalu nyadung[13] duit ti ulih sida ari nya ngagai semua bala sida, nitihka guna sida siku-siku.

⁴⁶Tiap hari sida begempuru dalam Rumah Sembiang. Sida makai roti dalam rumah sida. [14] Sida beserumpu makai lalu bekunsika pemakai enggau ati ti gerah mudah sereta gaga,

⁴⁷muji Allah Taala sereta dikerinduka semua orang. Lalu tiap hari Tuhan nambahka orang ke diselamatka ngagai bala sida.