Read Iban Surat Pasal Kereja Rasul 20 Bible Online

Surat Pasal Kereja Rasul 20 - Iban bible

Surat Pasal Kereja Rasul 20

¹Lebuh orang nyau udah badu agi begau, Paul lalu mesanka sida murid, lalu lebuh iya udah meri sida jaku peransang, lalu meri selamat tinggal, iya lalu mupuk ngagai menua Masedonia.

²Lebuh iya udah bejalai nengah menua nya lalu udah meransang sida ke arap ngena mayuh macham ajar, iya datai di menua Gerika,

³lalu diau dia tiga bulan. Lebuh iya baru deka belayar ngagai menua Siria, orang Judah bepekat ngelaban iya, nya alai iya mutuska runding deka mulaika diri nengah menua Masedonia.

⁴Iya disempulang Sopater anak Pirus, ari Beria, Aristarkus seduai Sekundus, ke datai ari Tesalonika, Gaius ari Derbe; Timoti, Tikikus enggau Tropimus ari Asia.

⁵Sida mupuk dulu ari kami, lalu nganti kami di Troas,

⁶tang kami belayar ari Pilipi udah lepas Gawai Roti Ti Enda Beragi, lalu lima hari udah bekau nya, kami betemu enggau sida di Troas, alai kami ke diau tujuh hari.

⁷Kena hari Minggu, lebuh kami begempuru deka makai, Paul berandau enggau orang mayuh laban iya deka mupuk hari siti, lalu iya majak bejaku nyentuk ngagai tengah malam.

⁸Mayuh amat lampu ditungkun di sadau alai kami ke begempuru.

⁹Siku orang bujang ke benama Eutikus, ke duduk ba jenila, lalu belabuh tinduk jenak amat lebuh Paul majak bejaku. Laban iya jenak tinduk, iya labuh ke tanah ari tingkat tiga. Lebuh sida nanggung iya, iya endang udah mati.

¹⁰Tang Paul nurun, lalu ningkapka diri atas nembiak nya, lalu merap iya. Ku Paul, “Anang irau. Iya agi idup!”

¹¹Lebuh Paul udah pulai baru ke sadau, lalu udah mechahka roti, lalu makai, iya majak berandau enggau sida, nyentuk ngagai rerak tawas. Udah nya iya lalu mupuk.

¹²Sida mai Eutikus ke idup nya pulai ke rumah, lalu ati sida lantang amat.

¹³Kami lalu bejalai dulu ngagai kapal, lalu belayar ngagai Asos, laban kami deka mai Paul nepan kapal nya dia, nitihka atur iya, laban iya deka mansang ngagai endur nya ngena jalai darat.

¹⁴Lebuh iya betemu enggau kami di Asos, kami lalu mai iya nepan kapal nya, lalu mupuk ngagai Mitilin.

¹⁵Kami belayar ari Mitilin, lalu hari siti kami datai di Chios. Sehari udah bekau nya, kami datai di Samos, lalu sehari udah bengkau nya,[111] kami datai di Miletus.

¹⁶Laban Paul udah berunding deka belayar mansa Epesus, ngambika iya enda ngerindang diri di menua Asia, laban iya begaut deka ngenataika diri di Jerusalem kena hari Pentikos, enti ulih.

¹⁷Ari Miletus Paul ngirumka siti pesan ngagai Epesus, minta bala tuai eklisia betemu enggau iya.

¹⁸Lebuh sida betemu enggau iya, iya lalu bejaku enggau sida, “Kita empu nemu gaya pengidup aku, sekumbang aku ti diau begulai enggau kita, berengkah ari maya aku ke terubah datai di menua Asia,

¹⁹bekereja ke Tuhan enggau ati ti baruh, sereta enggau ai mata, natka penusah ti nuntung aku ari pekat orang Judah.

²⁰Aku nadai kala nyurutka diri ari pengawa madahka pesan Tuhan ke penguntung kita, sereta ngajar kita di mua orang mayuh ari rumah sebuah ngagai rumah sebuah,

²¹lebuh aku besaksi ngagai orang Judah enggau ngagai orang bansa bukai pasal nesal ati ke dosa, enggau pasal arap ke Jesus Tuhan kitai.

²²Nyadi diatu, laban aku tu nyadi orang tangkap Roh Kudus, aku deka mansang ngagai Jerusalem, enda nemu namaka utai ti deka nyadi ba aku din.

²³Aku semina nemu, ari padah Roh Kudus, aku deka ditutup dalam rumah jil, lalu dituntung mayuh macham penusah dalam genap buah nengeri.

²⁴ Tang aku enda sayauka nyawa diri, asal ga aku ulih nembuka pejalai aku enggau pengawa ti udah diasuh Tuhan Jesus kereja aku, iya nya, besaksika Berita Manah pasal pengasih Allah Taala.

²⁵“Lalu diatu aku nemu, nadai siku kita, ke udah alai aku nusui pasal Perintah Allah Taala, ulih meda aku agi.

²⁶Nya alai aku madah ngagai kita sehari tu, aku enda betanggungjawapka nyawa kita,

²⁷laban aku nadai kala enggai madah ngagai kita semua juluk ati Allah Taala.

²⁸Nya alai, jaga diri empu, enggau semua raban eklisia ke udah diasuh Roh Kudus ibun kita, ngibun eklisia Allah Taala, [112] ke udah ditebus Iya ngena darah Anak Iya Empu. [113]

²⁹Aku nemu, lebuh aku udah mupuk, ukui kampung ti mangah deka tama ngagai bala kita, lalu munuh[114] kita.[115]

³⁰Lalu sekeda orang ari raban kita empu, deka madahka utai ti bula, ngambika murid tesat lalu nitihka sida.

³¹Nya alai, bejaga, lalu kingatka aku ke udah, dalam kandang tiga taun, enggau ai mata, enda ngetu-ngetu siang malam meri kita jaku tangkan.

³²Nyadi diatu, aku nyerahka kita ngagai Allah Taala, enggau ngagai pesan pasal pengasih Iya, pesan ti ulih ngemansangka kita, lalu meri kita pesaka sama enggau semua orang ke udah dikuduska.

³³Aku nadai kala ingin ke pirak tauka emas, tauka gari orang.

³⁴Kita empu nemu, jari aku tu ti dikena aku gawa ngidupka diri, sereta nyangkung pangan ke bekaling enggau aku.

³⁵Dalam semua utai nya, aku udah meri kita teladan, ngambika ari kitai ke bebendar bekereja, kita ulih nulung nyukung orang ke lemi, laban kitai ingatka jaku Tuhan Jesus, laban Iya Empu ke nyebut, ‘Beberekat agi orang ke meri, ari orang ke nerima.’ ”

³⁶Lebuh iya udah badu bejaku, iya besugang enggau semua sida, lalu besampi.

³⁷Semua sida lalu nyabak magang lebuh sida merap lalu nyium iya

³⁸enggau ati ti pemadu sinu, kelebih agi laban iya udah madahka sida nadai agi meda iya. Sida lalu nganjung iya ngagai kapal.