Read Iban Surat Pasal Kereja Rasul 21 Bible Online

Surat Pasal Kereja Rasul 21 - Iban bible

Surat Pasal Kereja Rasul 21

¹Lebuh kami udah ninggalka sida, lalu bekejang, kami lalu belayar terus ngagai Kos, lalu hari siti ngagai Rodes, lalu ari nya ngagai Patara. [116]

²Lebuh kami tetemuka sebuah kapal ti deka belayar ngagai Poenisia, kami lalu nepan kapal nya, lalu bekejang.

³Lebuh kami meda pulau Saiprus, kami lalu belayar muak ari selatan pulau nya nuju ngagai menua Siria, lalu sangkai di Tire, laban kapal deka munggah barang dia.

⁴Kami lalu ngiga sida murid, lalu kami diau dia tujuh hari. Nitihka iring Roh Kudus, sida nagang Paul mupuk ngagai Jerusalem.

⁵Lebuh timpuh kami diau dia nyau abis, kami angkat lalu majakka pejalai kami. Semua sida, sama enggau bini anak sida, nganjung kami pansut ari nengeri. Kami besugang ba tebing tasik lalu besampi, l

⁶lalu meri selamat tinggal ngagai pangan diri. Udah nya kami lalu nepan kapal; sida lalu pulai.

⁷Lebuh kami udah belayar ari Tire, kami datai di Tolemais. Dia kami betemu enggau sida ke arap, lalu diau enggau sida sehari.

⁸ Hari siti kami mupuk, lalu datai di Siseria. Kami datai ba rumah Philip ke Penginjil, siku ari sida ke tujuh iku, lalu diau enggau iya.

⁹Iya bisi empat iku anak indu ke apin belaki,[117] ke bisi pemeri benabi.

¹⁰ Lebuh kami diau dia dua tiga hari, siku nabi ke benama Agabus datai ari Judea.

¹¹Iya datai ngagai kami, ngambi belulang Paul, lalu nanchang kaki jari iya empu ngena belulang nya, lalu bejaku, “Tu utai ti disebut Roh Kudus, ‘Baka tu ku orang Judah di Jerusalem deka nanchang orang ke bempu belulang tu, lalu nyerahka iya ngagai orang bansa bukai.”

¹²Lebuh kami ninga nya, kami enggau sida ti bukai lalu nguji nagang Paul mupuk ngagai Jerusalem.

¹³Paul lalu nyaut, “Nama kebuah kita nyabak lalu ngenusahka ati aku? Aku ukai semina sedia deka ditanchang jil di Jerusalem, tang sedia deka mati din ketegal nama Tuhan Jesus.”

¹⁴Lebuh iya enggai dikuingka kami, kami lalu badu agi bejaku, kelimpah ari ke nyebut “Awakka peneka Tuhan nyadi.”

¹⁵Udah bekau nya, kami besikap, lalu mupuk ngagai Jerusalem.

¹⁶Sekeda sida murid ke ari Siseria mega bejalai enggau kami, lalu mai kami ngagai rumah Mnason ke asal ari Saiprus, ke lama udah arap, lalu kami diau enggau iya.

¹⁷Lebuh kami datai di Jerusalem, sida menyadi gaga amat nyambut penatai kami.

¹⁸Hari siti Paul mupuk enggau kami deka betemu enggau James. Semua tuai eklisia bisi dia magang.

¹⁹Lebuh Paul udah meri tabi basa ngagai sida, iya lalu nusui enggau silik semua utai ti udah dikereja Allah Taala ngagai orang bansa bukai, ngena pengawa ti dikereja Paul.

²⁰Lebuh sida ninga nya, sida lalu muji Allah Taala. Lalu ku sida bejaku ngagai Paul, “Dinga nuan tu, menyadi! Ditu beribu ribu iku orang Judah ke arap, lalu semua sida nya bela angkun magang ke Adat.

²¹Sida udah dipadahka pasal nuan ke udah ngajar semua orang Judah ke diau begulai enggau orang bansa bukai, ngasuh sida ngelengkaka Adat Moses, lalu nuan madahka sida enda ibuh nutus anak sida, tauka nitihka adat asal kitai.

²²Nya alai, nama utai ti patut dikereja kitai? Laban sida tetap deka nemu nuan udah datai ditu.

²³ Nya alai, kereja aja utai ti diasuh kami. Nyadi kitai bisi empat iku orang ke udah besumpah.

²⁴Bai sida tu lalu tuchi diri empu sama enggau sida, lalu bayar ungkus sida ke ngukur buk sida,[118] ngambika semua orang nemu, utai ti udah ditusui orang pasal nuan endang nadai pengamat mimit. Nya baru sida deka nemu nuan endang amat bepegai ba Adat.

²⁵ Tang ba pasal orang bansa bukai ke udah arap, kitai udah ngirumka siti surat madahka pemutus aum kitai, madahka sida enda tau makai pemakai ti udah diberi ngagai engkeramba, tauka makai darah, tauka makai jelu ti mati dichekal,[119] lalu enda tau ngereja ulah ti kamah.”

²⁶Paul lalu mai orang empat iku nya enggau iya, lalu hari siti lebuh iya udah nuchi diri sama enggau sida, sida lalu tama ngagai Rumah Sembiang, deka nimpuh maya sida deka nembuka pengawa nuchi diri lalu ngenjuk piring ke tiap iku sida.

²⁷Lebuh timpuh tujuh hari nya nyau deka abis, sekeda orang Judah ke datai ari Asia bisi tepedaka Paul dalam Rumah Sembiang. Sida lalu megau orang mayuh, lalu nangkap Paul

²⁸enggau panjung, “Orang Israel! Tulung! Tu orang ke ngajar di semua endur ngelaban orang Israel, ngelaban Adat, enggau ngelaban Rumah Sembiang tu. Nambahka nya, iya udah mai orang bansa bukai ngagai Rumah Sembiang lalu udah ngamahka endur ti kudus tu!” (

²⁹ Sida nyebut nya laban sida udah tepedaka Tropimus ke datai ari Epesus begulai enggau Paul dalam nengeri nya, lalu sida melabaka Paul udah bisi mai iya ngagai Rumah Sembiang.)

³⁰Semua orang dalam nengeri nya lalu begau magang lalu belanda lalu nangkap Paul, lalu ngirit iya pansut ari Rumah Sembiang. Pintu Rumah Sembiang lalu tekala nya ditutup.

³¹Lebuh sida nguji munuh iya, orang lalu madah ngagai tuai soldadu orang Rome pasal orang ke kachau di serata nengeri Jerusalem.

³²Tekala nya kepala soldadu nya lalu mai pemesai enggau bala soldadu, lalu belanda ngagai tekang bala mayuh. Lebuh orang mayuh meda kepala soldadu enggau bala soldadu datai, sida lalu badu agi malu Paul.

³³Kepala soldadu nya lalu mansang ngagai Paul, nangkap iya, lalu ngasuh iya ditanchang ngena rantai. Iya lalu nanyaka sapa orang ke ditangkap iya nya, enggau utai ti udah dikereja iya.

³⁴Sekeda orang dalam bala mayuh manjung nyebut utai sebengkah, lalu sida ti bukai nyebut utai bukai. Nyadi laban kepala soldadu nya enda nemu utai ti ku sida, laban orang kelalu inggar, iya lalu ngasuh Paul dibai ngagai berek soldadu.

³⁵Lebuh Paul datai ba tangga berek, bala soldadu lalu ngesan Paul, laban bala orang mayuh balat amat deka ngamuk iya.

³⁶Bala orang mayuh ke nitihka sida majak manjung, “Bunuh iya!”

³⁷Lebuh bala soldadu baru deka mai Paul tama ngagai berek, Paul lalu bejaku enggau kepala soldadu, “Kati tau aku nyebut siti utai ngagai nuan?” Kepala soldadu nya lalu nanya, “Kati nuan nemu jaku Gerika?

³⁸Enti pia, kati nuan tu ukai orang Ejip ke apin lama tu ti udah nguji mai orang ngelaban perintah lalu nguluka empat ribu iku bala penyamun ngagai menua puang?”

³⁹Paul lalu nyaut, “Aku tu orang Judah, ari Tarsus di menua Silisia, peranak sebuah nengeri ti besai. Aku minta nuan nyagi aku bejaku ngagai orang mayuh tu.”

⁴⁰Lebuh kepala soldadu udah meri iya pemendar bejaku, Paul lalu bediri ba tangga nya, ngepaika jari iya ngagai orang mayuh. Lebuh sida nyau jenuh, iya lalu bejaku ngagai sida ngena jaku Hebrew,[120] ku iya,