Read Iban Surat Pasal Kereja Rasul 22 Bible Online

Surat Pasal Kereja Rasul 22 - Iban bible

Surat Pasal Kereja Rasul 22

¹“Bala menyadi, bala apai, pendingka aku bejaku ngarika diri empu di mua kita!”

²Lebuh sida ninga iya bejaku ngagai sida ngena jaku Hebrew,[121] sida lalu enda engkeretik. Ku Paul,

³ “Aku tu orang Judah, ada di Tarsus di menua Silisia, tang nyadi orang ke besai tuai di nengeri tu lalu diajar Gamaliel enggau terit nitihka Adat aki ini kitai, lalu aku angkunka Allah Taala baka semua kita bukai sehari tu.

⁴ Aku udah merinsaka orang ke nitihka Jalai Tuhan datai ke sida mati, nanchang orang ke lelaki enggau ke indu, lalu nutup sida dalam rumah jil,

⁵lalu imam besai enggau semua raban Kunsil ulih besaksika pasal aku. Aku udah nerima ari sida surat ti ditulis sida ngagai orang Judah ke diau di Damaskus, lalu aku mansang ngagai nengeri nya deka nanchang orang ke diau dia, lalu mai sida pulai ngagai Jerusalem, ngambika sida diukum.

⁶“Lebuh aku benung di rantau jalai semak ngagai Damaskus, kira ba urung tengah hari, siti penampak lalu ngenyit manchar ari langit ngelingi aku.

⁷Aku lalu rebah ke tanah, lalu ninga nyawa bejaku ngagai aku, ‘Saul, Saul! Nama kebuah nuan merinsaka Aku?’

⁸Aku lalu nyaut, ‘Sapa Nuan, Tuan?’ Iya lalu bejaku ngagai aku, ‘Aku tu Jesus orang Nasaret[122] ke diperinsaka nuan.’

⁹Nyadi orang ke bejalai enggau aku bisi meda penampak nya, tang nadai ninga nyawa nya bejaku ngagai aku.

¹⁰Aku lalu nanya, ‘Nama utai ti patut dikereja aku, Tuhan?’ Tuhan lalu bejaku ngagai aku, ‘Angkat nuan lalu mupuk ngagai Damaskus. Dia nuan deka dipadahka semua utai ti udah diasuh kereja nuan.’

¹¹Lebuh aku enda ulih meda utai ketegal penerang penampak nya, orang ke enggau aku lalu megai jari aku lalu ngiring aku ngagai Damaskus.

¹²“Di nengeri nya bisi orang siku benama Ananias, ke angkunka Adat, sereta dibasa semua orang Judah ke diau dia.

¹³Iya datai ngagai aku, bediri ngimbai aku, lalu bejaku, ‘Menyadi, Saul, awakka nuan ulih meda baru!’ Tekala nya aku lalu ulih meda. Aku lalu meda iya.

¹⁴Iya lalu bejaku, ‘Allah Taala aki ini kitai udah milih nuan, ngambika nuan nemu peneka Iya, lalu meda Iya ti Lurus, lalu ninga nyawa Iya Empu,

¹⁵laban nuan deka nyadika saksi Iya ngagai semua dunya[123] pasal utai ti udah dipeda enggau didinga nuan.

¹⁶Nya alai, anang betangguh. Angkat nuan, lalu dibaptisa, ngambika dosa nuan dibuai, lalu besampi dalam nama Iya.’

¹⁷“Lebuh aku udah pulai ngagai Jerusalem, lalu lebuh aku benung besampi dalam Rumah Sembiang, aku begenera

¹⁸meda Tuhan bejaku ngagai aku. Ku Iya, ‘Angkat jampat lalu mupuk nuan ari Jerusalem, laban sida enggai nerima jaku saksi nuan pasal Aku.’

¹⁹Aku lalu nyaut, ‘Tuhan, sida empu nemu aku udah bejalai ari balai gempuru sebuah ngagai balai gempuru sebuah, nangkap lalu malu sida ke arapka Nuan.

²⁰ Lalu lebuh saksi Nuan Stepen dibunuh, aku bisi bediri semak nya, rindu meda pengawa orang ke munuh iya, lalu ngemataka baju sida.’

²¹Tuhan lalu bejaku ngagai aku, ‘Mupuk nuan, laban Aku deka ngasuh nuan bejalai jauh ngagai orang bansa bukai.’ ”

²²Ngagai ba senentang tu, sida agi mendingka Paul. Tang udah nya, sida lalu belabuh manjung, ku sida, “Bunuh iya! Bunuh iya! Iya enda patut idup!”

²³Lebuh sida manjung, sereta ngesaika serayung sida, lalu ngerabuka amau[124] ngagai angin,

²⁴kepala soldadu lalu ngasuh Paul dibai ngagai berek, lalu ngasuh iya disipat, deka mansik kebuah orang Judah manjung baka nya ngelaban iya.

²⁵Tang lebuh sida udah nanchang iya ngena tali,[125] Paul lalu bejaku ngagai siku pemesai soldadu ke bediri semak dia, “Kati kita tau nyipat orang ke peranak Rome, ke nadai udah diukum?”

²⁶Lebuh pemesai soldadu nya ninga nya, iya lalu mansang ngagai kepala soldadu, lalu bejaku ngagai iya, “Nama utai ti deka dikereja nuan? Orang tu peranak Rome!”

²⁷Kepala soldadu nya lalu mansang ngagai Paul, lalu nanya iya, “Padahka ngagai aku, kati nuan peranak Rome?” Paul lalu nyaut, “Au.”

²⁸Kepala soldadu nya lalu nyaut, “Mar amat rega aku meli pangkat nyadi peranak Rome.” Ku Paul bejaku, “Aku nyadi peranak Rome ari ada.”

²⁹Tekala nya orang ke deka mansik iya lalu nyurutka diri ari iya, lalu kepala soldadu mega takut lebuh iya nemu Paul nya peranak Rome, lalu iya udah nanchang Paul.

³⁰Laban iya ingin deka nemu kebuah orang Judah bedawaka Paul, hari siti iya lalu ngelepaska Paul, lalu ngasuh sida tuai imam enggau semua raban Kunsil begempuru. Iya lalu mai Paul tama lalu ngasuh iya bediri di mua sida.