Read Iban Surat Pasal Kereja Rasul 24 Bible Online

Surat Pasal Kereja Rasul 24 - Iban bible

Surat Pasal Kereja Rasul 24

¹Lima hari udah bekau nya Imam Besai Ananias lalu datai enggau bala tuai orang Judah enggau siku lawyer ke benama Tertulus. Sida lalu mantaika dawa sida ngelaban Paul di mua gabenor.

²Lebuh Paul udah dikangauka tama, Tertulus lalu belabuh bedawaka Paul munyi tu: “Tuan ti Dipebasaka! Nuan endang lama udah mai pemaik ngagai menua kami, lalu ulih pengelandik nuan, mayuh bengkah ubah ti manah udah digaga nuan ke bansa kami.

³Kami meri terima kasih ke semua utai ti udah dikereja nuan ke kami.

⁴Tang ngambika aku enda masau jam nuan, aku minta nuan mendingka kami enda lama.

⁵Kami nemu orang tu mai pengachau, ke ngachau semua orang Judah di serata dunya, sereta nyadi tuai ke siti raban ti dikumbai Raban Orang Nasaret.[128]

⁶Iya mega bejaku jai ngelaban Rumah Sembiang. Nya alai kami nangkap iya,

⁷lalu deka ngakim iya nitihka Adat kami empu. Tang kepala soldadu ke benama Lisias datai lalu ngerampas iya ari jari kami lalu ngasuh orang ke bedawaka orang tu betemu enggau nuan.

⁸Lebuh nuan mansik orang tu, nuan deka nemu ari iya empu semua penyalah iya ti dikena kami bedawaka iya.”

⁹Orang Judah mega bedawaka iya, madahka semua utai nya endang amat magang.

¹⁰Lebuh tuan gabenor ngepaika jari ngasuh Paul bejaku, Paul lalu nyaut, “Aku gaga ati bejaku ngarika diri empu, laban aku nemu nuan endang lama udah nyadi hakim di menua tu.

¹¹Tuan empu ulih mansik utai tu. Kira dua belas hari tu ti udah aku mansang ngagai Jerusalem deka nyembah Allah Taala.

¹²Orang Judah nadai nemu aku bekelikuh enggau orang, tauka nyungkak orang mayuh ngaga pengachau, nemuka dalam balai gempuru, tauka ba sebelah nengeri.

¹³Lalu sida pen enda mega ulih nunjukka enggau terang ngagai nuan kebuah sida bedawaka aku diatu.

¹⁴Tang aku ngaku tu di mua nuan: aku nyembah Allah Taala aki ini kami nitihka Jalai Tuhan ti dikumbai sida siti raban, lalu aku arapka semua utai ti ditulis dalam Adat, tauka dalam bup sida nabi.

¹⁵Aku bisi siti pengadang baka ti diterima sida empu, iya nya semua orang ke lurus enggau ke enda lurus deka diangkatka ari mati.

¹⁶Nya kebuah aku enggau naka ulih ngintu ati diri beresi di mua Allah Taala enggau di mua mensia.

¹⁷ “Lebuh aku udah ninggalka Jerusalem dua tiga taun, aku lalu pulai baru ngagai nengeri nya, mai duit sedekah ngagai bansa aku empu, sereta meri piring.

¹⁸Lebuh aku benung ngereja nya, sida lalu nemu aku dalam Rumah Sembiang, benung nembuka pengawa aku ke nuchi diri. Nadai mayuh orang enggau aku, lalu aku mega nadai ngaga pengachau.

¹⁹Tang sekeda orang Judah ari menua Asia -- sida patut bisi ditu bedawaka aku di mua nuan, enti sida amat bisi utai kena bedawaka aku.

²⁰Tauka, awakka bala sida tu madahka penyalah aku ti ditemu sida lebuh aku bediri di mua Kunsil.

²¹ Nyangka meh sida besalah aku laban aku udah nyebut di mua sida, ‘Aku kena pechara sehari tu laban aku arapka orang ke mati deka diangkatka idup baru.’ ”

²²Tang Peliks, ke endang nemu pasal Jalai Tuhan, nutup pechara nya. Ku iya, “Lebuh kepala soldadu Lisias datai, nya baru aku meri pemutus penemu pasal pekara kita tu.”

²³Iya lalu ngasuh pemesai soldadu nyaga Paul, tang tau ngasuh Paul mindah kia-kia, lalu enda tau nagang bala pangan Paul meri iya utai ti dipeguna iya.

²⁴Kira dua tiga hari udah bekau nya, Peliks datai enggau bini iya Drusila, ke bansa orang Judah. Iya lalu mesanka Paul, lalu mendingka Paul bejakuka pasal pengarap ke Jesus Kristus.

²⁵Lebuh Paul bejakuka pasal pengelurus, pasal nagang diri, enggau pasal Hari Pechara ti deka datai, Peliks lalu takut. Ku iya, “Nuan tau mupuk diatu. Lebuh aku bisi peluang ila, aku mesanka nuan.”

²⁶Lebuh maya nya, iya ngarapka Paul deka meri iya duit. Nya kebuah iya suah mesanka Paul lalu berandau enggau iya.

²⁷Dua taun udah lepas nya, Peliks lalu diganti Porkius Pestus nyadi gabenor. Kena Peliks ngenyamaika ati orang Judah, iya nejuka Paul mengkang ditan dalam rumah jil.