Read Iban Surat Pasal Kereja Rasul 25 Bible Online

Surat Pasal Kereja Rasul 25 - Iban bible

Surat Pasal Kereja Rasul 25

¹Tiga hari udah bekau Pestus datai di menua nya, iya lalu mansang ari Siseria ngagai Jerusalem.

²Sida tuai imam, enggau bala tuai orang Judah lalu mantaika dawa ti dikena sida ngelaban Paul. Lalu sida minta Pestus

³ngasuh orang mai Paul ngagai Jerusalem, laban sida deka ngipa lalu munuh iya di rantau jalai.

⁴Pestus lalu nyaut, madahka Paul agi ditanka dalam rumah jil di Siseria, lalu Pestus empu deka mansang kin enda lama da agi.

⁵“ Nya alai,” ku iya bejaku, “awakka bala tuai kita mupuk enggau aku ngagai Siseria, lalu enti orang nya bisi udah ngereja penyalah, awakka sida bedawaka iya.”

⁶Lebuh iya udah diau enggau sida lapan ngagai sepuluh hari, iya lalu mupuk ngagai Siseria. Hari siti iya lalu duduk ba penuduk hakim, lalu ngasuh orang mai Paul tama.

⁷Lebuh Paul datai, bala orang Judah ke udah datai ari Jerusalem, bediri ngelingi iya, mantaika dawa ti berat ngelaban iya. Tang sida enda ulih nunjukka pengamat dawa nya.

⁸Paul lalu bejaku ngarika diri empu. Ku iya, “Aku nadai kala ngelanggar Adat orang Judah tauka ngelaban Rumah Sembiang, tauka ngelaban Raja Besai.”

⁹Tang Pestus minta diri dikerinduka orang Judah, nya alai iya nanya Paul, “Kati nuan deka mupuk ngagai Jerusalem lalu kena pechara din ba pasal semua pekara tu di mua aku empu?”

¹⁰Paul lalu nyaut, “Aku diatu bediri dalam kot Raja Besai, alai aku ke endang patut kena pechara. Lalu nuan empu nemu, aku nadai kala ngereja utai ti salah ngagai orang Judah.

¹¹Nya alai, enti aku bisi udah ngereja penyalah lalu udah ngereja utai ti tau ngasuh aku patut kena ukum bunuh, aku ukai minta diri enda diukum mati. Tang enti sida nadai kebuah bedawaka aku, nadai orang ulih nyerahka aku ngagai sida. Aku ngapil ngagai Raja Besai.”

¹²Lebuh Pestus udah berunding enggau bala penyanding penemu iya, iya lalu nyaut, “Nuan udah ngapil ngagai Raja Besai. Ngagai Raja Besai meh nuan deka mupuk.”

¹³Dua tiga hari udah bekau nya, Raja Agripa enggau Bernis datai di Siseria, deka ngelaluka penatai Pestus.

¹⁴Lebuh Raja Agripa enggau Bernis diau dia dua tiga hari, Pestus lalu mantaika pekara Paul di mua raja. Ku iya, “Aku bisi siku orang tutup ke udah ditinggalka Peliks.

¹⁵Lebuh aku di Jerusalem, sida tuai imam enggau bala tuai orang Judah madahka pasal iya ngagai aku, minta aku ngukum iya.

¹⁶Aku madah ngagai sida, kami orang Rome nadai adat nyerahka orang ke kena dawa, sebedau iya betemu betunga mua enggau orang ke bedawaka iya, lalu apin diberi peluang bejaku ngarika diri empu ngelaban dawa nya.

¹⁷Nya alai, lebuh sida datai ditu suba, aku enda betangguh tang hari siti duduk ba penuduk hakim, lalu ngasuh orang mai iya tama.

¹⁸Lebuh bala orang ke bedawaka iya bediri, sida nadai madahka iya bisi udah ngereja penyalah baka ke disangka aku.

¹⁹Tang sida semina bekelikuh enggau iya pasal agama sida empu, enggau pasal orang siku ke benama Jesus, ke udah mati, tang Paul majak madahka orang nya idup.

²⁰Laban aku enda nemu baka ni ku chara mansik pekara nya, nya alai aku lalu nanya iya enti iya deka mupuk ngagai Jerusalem, lalu dipecharaka din ba semua pekara nya.

²¹Tang lebuh Paul udah ngapil minta diri mengkang ditan dalam rumah jil, lalu minta pekara nya diatur Raja Besai, aku lalu ngasuh iya ditan nyentuk ngagai maya aku ulih ngirumka iya ngagai Raja Besai.”

²²Ku Agripa bejaku enggau Pestus, “Aku bisi ati deka mendingka orang nya.” Pestus lalu nyaut iya, “Pagila nuan deka mendingka iya.”

²³Hari siti Agripa seduai Bernis lalu datai enggau chukup gaya, lalu tama ngagai balai, disempulang sida tuai soldadu, enggau orang ke tinggi pangkat dalam nengeri nya. Pestus lalu ngasuh orang mai Paul tama.

²⁴Ku Pestus bejaku, “Raja Agripa, enggau semua kita ke bisi enggau kami ditu diatu, tu meh orang ke didawaka semua orang Judah ngagai aku, ukai semina ditu tang mega di Jerusalem, lalu manjung madahka iya enda tau ditejuka idup agi.

²⁵Tang aku nadai nemu iya bisi udah ngereja utai ti tau ngasuh iya diukum bunuh. Lalu lebuh iya ngapil ngagai Raja Besai, aku lalu mutuska runding deka ngirumka iya.

²⁶Tang aku nadai utai nyemetak ti tau ditulis aku pasal iya ngagai Raja Besai. Nya kebuah aku mai iya kitu ngagai semua kita, kelebih agi ngagai nuan Raja Agripa, ngambika lebuh kitai udah meresa iya, aku bisi utai ditulis--

²⁷laban ba penemu aku, enda manah enti aku ngirumka orang jil, tang enda madahka dawa ti dikena ngelaban iya.”