Read Iban Surat Pasal Kereja Rasul 26 Bible Online

Surat Pasal Kereja Rasul 26 - Iban bible

Surat Pasal Kereja Rasul 26

¹Agripa lalu bejaku ngagai Paul, “Nuan tau bejaku ngarika diri empu.” Paul lalu ngangkatka jari iya, lalu bejaku ngarika diri empu munyi tu:

²“Raja Agripa, aku gaga amat ati laban sehari tu aku diberi peluang bejaku ngarika diri empu di mua nuan, ngelaban semua dawa orang Judah,

³laban nuan nemu semua adat asal enggau pasal semua kelikuh orang Judah ti ngasuh sida beserekang penemu. Nya alai, aku minta nuan liat ati mendingka aku.

⁴“Semua orang Judah nemu gaya pengidup aku kenyau ari aku agi bujang, begulai enggau orang ari bansa aku empu enggau di Jerusalem.

⁵ Sida endang lama udah nemu, enti sida deka besaksika pasal aku ke nyadi raban orang ke pemadu terit dalam agama kitai, lalu idup nyadi orang Parisi.

⁶Nyadi diatu aku bediri ditu kena pechara ketegal aku andal ati ke semaya ti udah digaga Allah Taala enggau aki ini kitai,

⁷semaya ti dikarapka dua belas raban bansa kitai tau ulih sida, lebuh sida bebendar nyembah Allah Taala siang malam. Ketegal pengadang nya meh aku kena dawa orang Judah, Tuan Raja.

⁸ Nama kebuah kita enda arapka Allah Taala ulih ngangkatka orang ari mati?

⁹ “Aku menya udah ngumbai diri patut ngereja mayuh macham utai kena ngelaban nama Jesus orang Nasaret.[129]

¹⁰Lalu nya meh utai ti dikereja aku di Jerusalem. Ngena kuasa ari sida tuai imam, aku ukai semina nutup bala nembiak Tuhan dalam rumah jil, tang aku mega ngundi ngelaban sida lebuh sida diberi ukum bunuh.

¹¹Aku suah udah merinsaka sida dalam semua balai gempuru, laban aku nguji mejalka sida bejaku busung; nyadi laban aku balat pedis ati ngagai sida, aku lalu begagaika sida nyentuk ngagai nengeri di menua bukai.

¹²Nya meh utai ti dalam runding aku lebuh aku bejalai ngagai Damaskus ngena kuasa enggau atur ti diberi sida tuai imam.

¹³Ba urung tengah hari, Tuan Raja, lebuh aku di rantau jalai, aku meda siti penampak manchar ari langit, ti terang agi ari mata hari, ti manchar ngelingi aku enggau ngelingi orang ke bejalai enggau aku.

¹⁴Lebuh semua kami udah rebah ke tanah, aku lalu ninga nyawa bejaku ngagai aku ngena jaku Hebrew,[130] ‘Saul, Saul! Nama kebuah nuan merinsaka Aku? Nuan semina ngemediska diri empu ngapa ngelaban aku.’

¹⁵Aku lalu bejaku, ‘Sapa Nuan, Tuan?’ Tuhan lalu nyaut, “Aku tu Jesus ke diperinsaka nuan.

¹⁶ Tang angkat nuan, lalu bediri, laban tuju Aku ke pegari di mua nuan nya ngasuh nuan bekereja ke Aku lalu besaksika pasal utai ti udah dipeda nuan pasal Aku, enggau besaksika utai ti deka dipandangka Aku ngagai nuan ila.

¹⁷Aku deka ngelepaska nuan ari bansa nuan empu, enggau ari orang bansa bukai ke alai Aku deka ngirumka nuan,

¹⁸ ngambika muka mata sida, ngambika sida nguingka diri ari pemetang ngagai penampak, enggau ari kuasa Sitan ngagai Allah Taala, ngambika dosa sida diampun, lalu sida nyadi raban orang ke dikuduska ulih pengarap sida ke Aku.’

¹⁹“Udah bekau nya, Raja Agripa, aku enda kala enda ngasika genera ti datai ari serega,

²⁰ tang madahka, keterubah iya, ngagai sida ke diau di Damaskus, lalu udah nya ngagai sida ke diau di Jerusalem, enggau di serata menua Judea, lalu mega ngagai orang bansa bukai, madahka sida enda tau enda nesal ati ke dosa sida lalu nguing ngagai Allah Taala, lalu ngereja utai ti nunjukka sida amat udah nesal ati.

²¹Nya meh kebuah orang Judah nangkap aku dalam Rumah Sembiang, lalu nguji munuh aku.

²²Tang aku disaup Allah Taala nyentuk ngagai sehari tu. Nya alai aku diatu bediri ditu besaksi ngagai semua orang ke mit enggau ke besai, nyebut utai ti udah dipadahka sida nabi enggau Moses deka nyadi:

²³ iya nya Kristus[131] endang enda tau enda kena perinsa, lalu ari Iya ke nyadi orang ke terubah-rubah angkat ari mati, Iya madahka penampak ngagai orang Judah enggau ngagai orang bansa bukai.”

²⁴Lebuh Paul agi benung bejaku ngarika diri empu munyi nya, Pestus lalu merak iya, “Paul, nuan tu gila! Nuan kelalu mayuh penemu. Nya utai ti ngasuh nuan gila!”

²⁵Tang ku Paul nyaut, “Aku ukai gila, Tuan Gabenor, tang nyebut utai ti bendar.

²⁶Raja empu nemu pasal utai nya, lalu aku bejaku enggau terang ngagai iya, laban aku nemu, nadai siti ari utai tu ti enda ditemu iya, laban utai nya ukai dikereja ba sebelah teluk.

²⁷Raja Agripa, kati nuan arapka sida nabi? Aku nemu nuan arap!”

²⁸Agripa lalu bejaku enggau Paul, “Kati nuan ngenyampat nya ngumbuk aku nyadi orang Kristian?”

²⁹Paul lalu nyaut, “Nemuka jampat, tauka enda, aku besampi ngagai Allah Taala ngambika nuan enggau semua kita bukai ke mendingka aku sehari tu, tau nyadi baka aku, tang anang ga kita ditanchang ngena rantai baka aku.”

³⁰Raja lalu angkat, lalu gabenor, Bernis, enggau semua orang ke duduk enggau sida mega angkat,

³¹lalu lebuh sida mupuk ari endur nya, sida lalu bejaku enggau pangan diri, “Orang tu nadai udah ngereja utai ti tau ngasuh iya kena ukum bunuh, tauka ditan dalam rumah jil.”

³²Agripa lalu bejaku ngagai Pestus, “Orang tu patut udah dilepaska, enti iya enda udah ngapil ngagai Raja Besai.”