Read Iban Surat Pasal Kereja Rasul 27 Bible Online

Surat Pasal Kereja Rasul 27 - Iban bible

Surat Pasal Kereja Rasul 27

¹Lebuh kami udah diatur belayar ngagai menua Itali, sida lalu nyerahka Paul enggau sekeda orang tutup ti bukai ngagai Julius, siku pemesai ari regimen ti dikumbai “Regimen Raja Besai.”[132]

²Kami lalu nepan sebuah kapal ti datai ari Adramitium, ti baru deka belayar ngagai mayuh bengkah penyangkai kapal ba sebelah tebing menua Asia, lalu bekejang, disempulang Aristarkus, orang Masedonia ke datai ari Tesalonika.

³Hari siti kami sangkai di Sidon. Nyadi Julius manah amat enggau Paul, lalu ngemendarka iya betemu enggau pangan iya, ngambika sida ngintu iya.

⁴Kami bekejang ari Sidon lalu laban kami nanjak ribut, kami lalu belayar mansa Pulau Saiprus nengah endur ti kurang agi ribut.

⁵Lebuh kami udah belayar meraka tasik semak Silisia enggau Pampilia, kami datai di Mira di menua Lisia.

⁶Dia pemesai soldadu tetemuka sebuah kapal ti datai ari Aleksandria, ti deka belayar ngagai menua Itali. Iya lalu ngengkahka kami ba kapal nya.

⁷Kami belayar lubah amat dalam berapa hari, lalu nyau ka enda ulih datai semak nengeri Nidus. Lalu laban kami nanjak ribut, nya alai kami belayar belindung ba pulau Krit semak Salmoni.

⁸Kami belayar lubah amat, lalu datai ba endur siti ti dikumbai Pengkalan ti Likun, ti semak nengeri Lasea.

⁹Laban mayuh jam udah tebasau, lalu belayar pen tau mega ngasuh bebadi, laban Hari Pengampun Dosa [133] udah ngelebus, nya alai Paul ngelalau sida enggau jaku.

¹⁰Ku iya, “Tuan, asai sepi aku, pejalai kitai tu tau ngasuh kitai bebadi sereta mayuh rugi, ukai semina rugi barang enggau kapal, tang nyawa kitai mega.”

¹¹Tang pemesai soldadu bechaya agi ke juragan kapal, enggau orang ke bempu kapal nya, ari ke arapka jaku Paul.

¹²Laban penyangkai kapal nya enda manah alai ngenduh lebuh musin chelap, mayuh sida mai belayar ari endur nya, ngarapka diri ulih datai di Poeniks, lalu ngenduh dia lebuh musin chelap. Poeniks nya penyangkai kapal ti nunga ngagai selatan-barat enggau utara-barat pulau nya.

¹³Lebuh ribut ti enda balat belabuh muput ari selatan, sida ngumbai diri ulih ngereja utai ti deka dikereja sida, nya alai sida narit sauh, lalu belayar nebing pulau Krit.

¹⁴Tang enda lama udah nya kabut besai, ti dikumbai “Ribut Utara Timur” lalu mangka ari pulau Krit.

¹⁵Laban kapal kami balat dipuputka ribut nya, lalu enda ulih dikuingka ngambika nanjak ribut nya, kami lalu nejuka kapal nya anyut dibai ribut.

¹⁶Lebuh kami belindung mansa pulau siti ti mit, ti dikumbai Kauda, kami nyau ka enda ulih nanchangka perau ti dibai kapal.

¹⁷Lebuh sida udah narit perau nya ngagai kapal, sida lalu melit kapal nya erat ngena tali. Laban sida enggai ke kapal nya tepanggai ba pasir Sirtis, sida lalu ngulurka sauh lalu kapal nya anyut laban ribut.

¹⁸Kami balat amat dipangkaka kabut nya, nya alai hari siti sida belabuh muai barang ari kapal nya.

¹⁹Ba hari ti ketiga, sida muai sekeda perengka kapal.

²⁰Lebuh kami nyau lama nadai meda mata hari, tauka bintang, lalu kabut nya majak balat mangka, kami nadai ngadang diri ulih idup.

²¹Laban sida lama udah enda makai, nya alai Paul mansang ngagai sida, lalu bejaku. “Kita patut udah mendingka aku, lalu enda bekejang ari Krit. Nya baru pengerusak enggau pengerugi tu ulih diseliahka.

²²Tang anang takut, laban nadai siku kita deka mati. Semina kapal aja deka rusak,

²³laban malam tadi siku melikat Allah Taala, iya nya Allah Taala ke dipetuaika sereta disembah aku, bisi bediri ngimbai aku,

²⁴lalu bejaku, ‘Anang takut, Paul. Nuan enda tau enda bediri di mua Raja Besai. Lalu Allah Taala deka nyelamatka semua orang ke belayar enggau nuan.’

²⁵Nya alai, anang takut, laban aku arapka Allah Taala deka ngereja utai munyi ti udah dipadahka Iya ngagai aku.

²⁶Tang kitai deka tepanggai ba tebing pulau siti.”

²⁷Ba malam ti keempat belas, lebuh kami anyut nengah Tasik Adria, kira ba urung tengah malam, sida kelasi ngumbai kami datai semak tebing.

²⁸Nya alai sida lalu ngabas penalam ai, lalu nemu penalam ai nya kira empat puluh meter. Enda lama udah nya sida ngabas penalam ai nya baru, lalu nemu penalam ai nya tiga puluh meter.

²⁹Laban sida takut enggai ke kapal nya terempas ba batu, nya alai sida ngulurka empat iti sauh ari kemudi kapal nya, lalu besampi nganti hari siang.

³⁰Tang lebuh sida kelasi nguji ngerarika diri ari kapal nya, lalu udah ngulurka perau ngagai tasik, lalu ngaga diri baka ke deka ngulurka sauh ari luan kapal nya,

³¹Paul lalu bejaku ngagai pemesai enggau ngagai bala soldadu. Ku iya, “Enti sida kelasi nya ninggalka kapal tu, kita enda ulih idup.”

³²Sida soldadu lalu netak tali perau nya, lalu nejuka perau nya labuh.

³³Sebedau dini hari, Paul lalu ngansak sida makai. Ku iya, “Tu keempat belas hari kita udah abis irau ati lalu nadai makai utai.

³⁴Nya alai aku ngasuh kita makai utai, ngambika kita ulih ngidupka diri. Selambar pen nadai meh buk kita deka lenyau ari pala kita.”

³⁵Lebuh Paul udah nyebut nya, iya ngambi roti, meri terima kasih ngagai Allah Taala di mua semua sida, mechahka roti nya, lalu belabuh makai.

³⁶Semua sida lalu berasai diperansang magang, lalu sida empu mega makai.

³⁷(Pemayuh kami ke dalam kapal nya 276 iku. [134])

³⁸Lebuh sida udah kenyang magang, sida lalu muai semua gandum ke tasik ngambika kapal nya lempung agi.

³⁹Pagi hari nya, sida enda ngelala menua nya, tang sida tepedaka siti teluk ti bisi tebing pasir. Sida lalu bekira deka ngelanggarka kapal nya ngagai tebing pasir nya, enti sida ulih.

⁴⁰Nya alai sida netak tali sauh, lalu ninggalka sauh nya di tasik, muka tali ti dikena nanchang tumpang kapal nya, nuatka layar ti ba luan kapal nya lalu nuju ngagai tebing.

⁴¹Tang kapal nya telanggarka betin, lalu tepanggai. Luan kapal nya lekat enda beguyat, lalu kemudi pechah dipangkaka gelumbang.

⁴²Bala soldadu lalu bekira deka munuh semua orang tutup, enggai ke sida nyemerai ke tebing lalu rari.

⁴³Tang pemesai soldadu ingin deka ngidupka Paul. Nya alai iya nagang sida munuh orang tutup. Iya lalu ngasuh semua orang ke tau nyemerai, terejun ari kapal nya, lalu nyemerai ke tebing.

⁴⁴Sida ti bukai nitih ka sida, sekeda belatung ngena papan, tauka ngena perengka ari kapal nya. Nya meh jalai semua sida datai enggau likun ba tebing.