Read Iban Surat Pasal Kereja Rasul 28 Bible Online

Surat Pasal Kereja Rasul 28 - Iban bible

Surat Pasal Kereja Rasul 28

¹Lebuh semua kami udah datai ba tebing, nya baru kami nemu pulau nya dikumbai Malta.

²Orang ba pulau nya manah amat enggau kami. Laban hari nyau belabuh ujan sereta chelap, sida lalu nungkun api lalu ngelaluka penatai semua kami.

³Paul ngeraup tugung rangkang, lalu lebuh iya nabakka kayu nya ngagai api, siku ular pansut ari tugung rangkang nya laban angat, mantuk lalu lekat ba jari iya.

⁴Lebuh orang ba pulau nya meda ular nya kating-kating lekat ba jari Paul, sida lalu bejaku enggau pangan diri, “Orang tu tentu pemunuh. Taja pen iya enda mati di tasik, tang petara enggai nejuka iya idup.”

⁵Tang Paul ngetikka ular nya ngagai api, lalu nadai apa nama laban ular nya.

⁶Sida ngumbai tubuh iya deka sup, tauka iya ngenyit rebah lalu mati, tang lebuh sida udah lama nganti, lalu nadai meda utai ti nyelai nyadi ba iya, sida lalu ngubah runding diri, lalu ngumbai iya petara.

⁷Enda jauh ari endur nya bisi tanah ti diempu Publius, ke nyadi tuai ba pulau nya. Iya ngelaluka penatai kami, lalu ngintu kami tiga hari.

⁸Nyadi apai Publius gali sakit chelap angat sereta pedis perut. Paul mansang ngagai iya lalu besampi, ngengkahka jari iya atas apai Publius, lalu ngeraika iya.

⁹Lebuh utai nya udah nyadi, semua orang ke sakit ba pulau nya, datai lalu digeraika magang.

¹⁰Sida balat amat masa kami, lalu lebuh kami deka belayar, sida mai ngagai kapal nya semua utai ti dipeguna kami.

¹¹Tiga bulan udah bekau nya kami lalu belayar ngena sebuah kapal ti datai ari Aleksandria, ti dikumbai “Menyadi Lelaki Ti Besapit,” ti udah ngenduh ba pulau nya lebuh musin chelap nya.

¹²Kami sangkai di Sairakuse, lalu diau dia tiga hari.

¹³Ari nya kami lalu majak belayar, lalu datai di Regium. Hari siti ribut belabuh muput ari selatan, lalu ba hari ti kedua kami datai di Puteoli.

¹⁴Dia kami tetemuka sekeda sida ke arap,[135] lalu kami dibai diau enggau sida tujuh hari. Udah nya kami datai di Rome.

¹⁵Lebuh sida ke arap[136] di Rome ninga pasal kami, sida datai nyentuk ngagai Pasar Apius enggau Tiga Buah Rumah Numpang, deka ngambat kami. Lebuh Paul meda sida, iya meri terima kasih ngagai Allah Taala, lalu berasai diperansang.

¹⁶Lebuh kami datai di Rome, Paul disagi diau kediri, dijaga siku soldadu.

¹⁷Tiga hari udah bekau kami datai, Paul lalu ngempuruka bala tuai orang Judah di nengeri nya. Lebuh sida udah begempuru magang, iya lalu bejaku ngagai sida, “Menyadi, taja pen aku nadai ngereja utai ngelaban bansa kitai, tauka ngelaban adat asal aki ini kitai, tang aku udah ditangkap di Jerusalem, lalu diserahka ngagai orang Rome.

¹⁸Lebuh sida udah tembu mansik aku, sida berunding deka ngelepaska aku, laban sida nadai nemu kebuah alai aku patut kena ukum bunuh.

¹⁹ Tang lebuh orang Judah nyakal penemu nya, aku lalu ngasaika diri enda tau enda ngapil ngagai Raja Besai, taja pen aku nadai ati deka bedawaka bansa kitai.

²⁰Nya meh kebuah aku minta diri betemu lalu bejaku enggau kita, laban aku ditanchang ngena rantai baka tu, ketegal pengadang kitai orang Israel.”

²¹Sida lalu nyaut iya, “Kami nadai udah nerima surat ari Judea pasal nuan, lalu bala kitai ke datai ditu pen nadai mega madahka berita, tauka bejaku jai pasal nuan.

²²Tang kami keran deka ningaka penemu nuan, laban kami nemu, semua orang di semua endur bela bejaku ngelaban raban tu.”

²³Lebuh sida udah nimpuh hari alai betemu enggau Paul, sida datai ngagai endur alai iya ke diau. Iya lalu nerangka pekara nya ngagai sida kenyau ari pagi nyentuk ngagai lemai, besaksika pasal Perintah Allah Taala, lalu nguji nguingka sida ngagai Jesus ngena jaku ari Adat Moses enggau ngena jaku sida nabi.

²⁴Sekeda sida arapka utai ti disebut iya, tang sida ti bukai enggai arap.

²⁵Nya sida enda besetuju enggau pangan diri. Lebuh sida mupuk, Paul lalu nyebut jaku tu: “Betul amat utai ti disebut Roh Kudus lebuh Iya bejaku ngena nabi Isaiah ngagai sida aki ini kitai,

²⁶ ‘Bejalai ngagai orang tu, lalu sebut, Kita amat mending, tang enda mereti, lalu kita amat merening, tang enda meda,

²⁷laban orang tu enda tajam runding, lalu pending sida bengal, lalu sida udah nutup mata sida, ngambika sida enda meda ngena mata sida, lalu ninga ngena pending sida, lalu mereti ngena ati sida, lalu nguing ngagai Aku, lalu Aku ngeraika sida.’

²⁸ Nya alai, awakka kita nemu, pesan pasal pengelepas Allah Taala udah dikirumka ngagai orang bansa bukai. Sida deka mending!”

²⁹Lebuh Paul udah nyebut nya, orang Judah angkat ari endur nya, lalu bekelikuh balat amat enggau pangan diri.

³⁰Paul diau dua taun ba endur ti disua iya empu, lalu iya ngelaluka semua orang ke datai ngagai iya,

³¹lalu nusui pasal Perintah Allah Taala, lalu ngajar pasal Tuhan Jesus Kristus enggau nadai belalai, sereta nadai utai nekul.