Read Iban Surat Pasal Kereja Rasul 3 Bible Online

Surat Pasal Kereja Rasul 3 - Iban bible

Surat Pasal Kereja Rasul 3

¹Nyadi sekali, lebuh Peter seduai John mansang ngagai Rumah Sembiang lebuh maya besembiang ba urung pukul tiga ngalih hari,

²siku orang ke enda ulih bejalai kenyau ari ada dibai tama. Orang ngalika iya tiap hari ba mua pintu ti dikumbai Pintu ti Manah dalam Rumah Sembiang, ngambika iya ulih minta sedekah ari orang ke tama ngagai Rumah Sembiang nya.

³Lebuh iya meda Peter seduai John baru deka tama ngagai Rumah Sembiang nya, iya lalu minta sedekah ari seduai iya.

⁴Seduai iya lalu malik ngagai iya, lalu ku Peter bejaku, “Peda nuan kami duai tu!”

⁵Orang nya lalu merening ngagai seduai iya, ngarapka diri deka bulih sedekah ari seduai iya.

⁶Tang ku Peter bejaku, “Aku nadai pirak tauka emas, tang utai ti dikemisi aku, nya meh utai ti diberi aku ngagai nuan: dalam nama Jesus Kristus orang Nasaret,[15] bediri nuan lalu bejalai!”

⁷Peter lalu megai jari kanan iya, lalu ngangkatka iya. Tekala nya kaki enggau buku-ali orang nya lalu kering.

⁸Iya engkejuk angkat, bediri, lalu bejalai, lalu tama ngagai Rumah Sembiang sama enggau Peter seduai John, ama bejalai, ama engkejuk, sereta muji Allah Taala.

⁹Semua orang bela meda iya bejalai sereta muji Allah Taala,

¹⁰lalu sida ngelala iya nya orang ke udah duduk minta sedekah ba mua Pintu ti Manah dalam Rumah Sembiang. Lalu sida balat alit ati sereta iranka utai ti udah nyadi ba iya.

¹¹Lebuh orang nya majak bepegai ba Peter seduai John, semua orang mayuh alit ati lalu belanda ngagai sida tiga ba endur ti dikumbai Serambi Solomon.

¹²Lebuh Peter meda orang mayuh datai, iya lalu bejaku ngagai sida, “Kita orang Israel, nama kebuah kita alit ati ke tu? Nama kebuah kita merening ngagai kami? Ukai kuasa kami tauka pengudus kami ti ngasuh orang tu ulih bejalai.

¹³ Allah Taala ke disembah Abraham, Isak enggau Jakop, Allah Taala ke disembah aki ini kitai, udah ngemuliaka Nembiak Iya Jesus, ke udah diserah lalu ditulak kita di mua Pilate, taja pen Pilate udah mutuska runding deka ngelepaska Iya.

¹⁴ Tang kita nulak Iya ti kudus sereta lurus, lalu kita minta siku pemunuh diserahka ngagai kita,

¹⁵lalu kita munuh Iya ti Pun pengidup. Tang Allah Taala udah ngangkatka Iya ari mati. Kami empu nyadika saksi nya.

¹⁶Ulih pengarap ke nama Iya, ulih kuasa nama Iya, orang ke enda ulih bejalai tu, ke dipeda sereta dikelala kita empu, udah nyadi kering. Pengarap iya ke Jesus ti udah ngeraika iya, baka ke dipeda semua kita.

¹⁷“Menyadi, aku nemu kita enggau bala tuai kita, udah ngereja utai nya laban kita enda nemu utai ti dikereja diri.

¹⁸Tu chara Allah Taala ngamatka semua utai ti udah disebut Iya ngena semua sida nabi, madahka Kristus[16] enda tau enda kena perinsa.

¹⁹Nya alai, nesal ati meh kita lalu pulai baru ngagai Allah Taala, ngambika dosa kita diampun,[17]

²⁰ngambika maya deka datai alai kita deka ngasaika pengering ari Tuhan, sereta ngambika Iya ngirumka Kristus[18] ngagai kita, iya nya Jesus ke udah dipilih Iya ke kita,

²¹ke enda tau enda diau di serega nyentuk ngagai maya Allah Taala udah ngaga semua utai nyadi baru magang, munyi ti udah dipadahka Iya ngena[19] bala nabi Iya ti kudus dulu kelia.

²² Ku Moses bejaku, ‘Tuhan Allah Taala kita deka milih siku nabi ke kita, ari bala kita empu, baka Iya ke udah milih aku. Kita enda tau enda mendingka semua utai ti dipadahka iya ngagai kita.

²³ Barang sapa enda mendingka nabi nya deka dibuai ari raban nembiak Allah Taala.’

²⁴Lalu semua nabi ke udah bejaku, berengkah ari Samuel, enggau nabi bukai ke datai dudi ari iya, udah mega madahka hari nya.

²⁵ Kita tu peturun sida nabi nya enggau peturun sempekat ti udah diberi Allah Taala ngagai aki ini kita, lebuh Iya bejaku ngagai Abraham, ‘Ulih peturun nuan semua mensia di dunya tu deka diberekatka.’

²⁶Lebuh Allah Taala udah ngangkatka Nembiak Iya, Iya lalu ngirumka Iya ngagai kita dulu, ngambika Iya merekatka kita lebuh Iya nguingka genap iku kita ari penyai kita.”