Read Iban Surat Pasal Kereja Rasul 4 Bible Online

Surat Pasal Kereja Rasul 4 - Iban bible

Surat Pasal Kereja Rasul 4

¹Lebuh Peter seduai John agi benung bejaku ngagai orang mayuh, sida imam, [20] enggau kepala orang ke nyaga Rumah Sembiang, enggau orang Saduki datai ngagai seduai iya,

²laban sida pedis ati ngagai seduai iya laban seduai iya ngajar orang mayuh, lalu madahka dalam Jesus bisi pengangkat ari mati.

³Nya alai sida nangkap seduai iya, lalu nutup seduai iya dalam rumah jil, nyentuk ngagai hari siti, laban hari nyau lemai.

⁴Tang mayuh orang ke ninga pesan nya, arap, lalu pemayuh tubuh sida nambah ngagai kira lima ribu iku.

⁵Hari siti, bala orang ke megai perintah, sida tuai bansa enggau sida pengajar Adat begempuru di Jerusalem

⁶sama enggau Imam Besai Anas, enggau Kaiapas, John, Aleksander, enggau sida ti bukai ke ari ruang bilik imam besai.

⁷Lebuh sida udah ngasuh Peter seduai John bediri di mua sida, sida lalu nanya, “Ngena kuasa apa tauka ngena nama sapa seduai ngereja utai tu?”

⁸Peter, ke penuh laban Roh Kudus, lalu bejaku ngagai sida, “Kita orang perintah, enggau kita ke tuai bansa:

⁹enti kami duai sehari tu ditanyaka pasal kereja ti manah ti udah dikereja ba orang ke enda ulih bejalai, pasal jalai orang tu udah digeraika,

¹⁰awakka semua kita nemu, lalu awakka semua orang Israel nemu, orang ke bediri di mua kita ditu diatu, udah digeraika ulih kuasa nama Jesus Kristus orang Nasaret,[21] ke udah diregang kita, lalu udah diangkatka Allah Taala idup baru ari mati.

¹¹ Jesus nya meh ‘batu ti ditulak kita ke tukang rumah, tang udah nyadi batu ti pemadu beguna.’

¹²Pengelepas semina ditemu dalam orang siku aja, laban nadai nama bukai di baruh langit ti diberi ngagai mensia ti ulih nyelamatka kitai.”

¹³Lebuh sida meda pemerani Peter seduai John, lalu nemu seduai iya ukai orang ke bepelajar, tang orang ke sengapa-dia, sida balat alit ati. Nya baru sida nemu seduai iya udah bekaling enggau Jesus.

¹⁴Lebuh sida meda orang ke udah digeraika bediri ngimbai seduai iya, sida nadai nemu jalai besangkalka nya.

¹⁵Nya alai sida ngasuh seduai iya pansut ari balai nya. Sida lalu berandauka pasal pekara nya enggau pangan diri.

¹⁶Ku sida, “Nama utai ti patut dikereja kita ngagai orang tu? Laban semua orang ke diau di Jerusalem bela udah meda kereja ajih ti udah dikereja ulih[22] seduai iya, lalu kitai nadai jalai besangkalka nya.

¹⁷Tang kena nagang pekara tu ngelekai ba bala orang mayuh, awakka kitai nangkan seduai iya enggau jaku, enda nyagi seduai iya bejaku ngagai sebarang orang dalam nama tu.”

¹⁸Nya alai sida lalu ngangauka Peter seduai John tama baru, lalu enda nyagi seduai iya bejaku tauka ngajar dalam nama Jesus.

¹⁹Tang ku Peter seduai John nyaut sida, “Sekalika kami, di mua Allah Taala, patut mendingka kita, lalu enda mendingka Allah Taala, awakka kita empu berunding,

²⁰laban kami enda ulih nagang diri bejakuka pasal utai ti udah dipeda enggau didinga kami.”

²¹Lebuh sida udah ngemba seduai iya baru, sida lalu ngelepaska seduai iya, laban sida nadai nemu jalai ngukum seduai iya ketegal orang mayuh, laban semua sida bela muji Allah Taala ketegal utai ti udah nyadi.

²²Laban orang ke udah digeraika ulih kereja ajih nya lebih empat puluh taun umur.

²³Lebuh Peter seduai John udah dilepaska, seduai iya lalu pulai ngagai raban sida empu, lalu madahka jaku ti udah disebut sida tuai imam, enggau bala tuai bansa, ngagai seduai iya.

²⁴ Lebuh sida ninga nya, semua sida lalu besampi enggau nyawa ti inggar ngagai Allah Taala. Ku sida, “Tuhan ti Pemadu Tinggi, ke ngaga langit, tanah, enggau tasik, enggau semua utai ti dalam sida,

²⁵ ke udah bejaku ngena Roh Kudus nengah mulut nembiak Nuan David, ‘Nama kebuah orang bansa bukai pedis ati, lalu semua bansa berundingka utai ti nadai guna?

²⁶Bala raja dunya angkat bediri, lalu orang ke megai perintah udah begempuru ngelaban Tuhan enggau ngelaban Kristus[23] Iya.’

²⁷ Laban dalam nengeri tu, iya ti bendar, Herod seduai Pontius Pilate, enggau orang bansa bukai, enggau orang Israel, udah begempuru ngelaban Nembiak[24] Nuan ti kudus, Jesus ke udah dipilih Nuan,[25]

²⁸ngambika sida ngereja utai ti endang udah dulu diletak Nuan deka nyadi.

²⁹Nya alai diatu, Tuhan, peda Nuan pemalat sida ngemba kami, lalu beri pemerani ngagai nembiak[26] nuan kena sida nusui pesan Nuan,

³⁰lebuh Nuan ngunjurka jari Nuan lalu ngeraika orang, lalu tanda ti nyelai enggau kereja ajih dikereja dalam[27] nama Jesus, nembiak[28] Nuan ti kudus.”

³¹Lebuh sida udah besampi, endur alai sida ke begempuru lalu berenyang. Semua sida lalu dipenuhka enggau Roh Kudus, lalu sida berani nusui pesan Allah Taala.

³² Semua sida ke arap sama seati, sama sepenemu, lalu nadai siku sida ngumbai utai ti dikemisi sida semina diempu sida kediri, tang semua sida bekunsika semua utai ti dikemisi sida enggau pangan diri.

³³Enggau kuasa ti besai, sida rasul besaksika pasal pengangkat Tuhan Jesus ari mati, lalu Allah Taala merekatka semua sida.

³⁴Nadai siku sida suntuk utai, laban sida ke bisi tanah tauka rumah, nyual utai nya, lalu mai

³⁵lalu ngengkahka rega utai nya semak kaki sida rasul, lalu duit nya disadung ngagai bala sida nitihka guna sida siku-siku.

³⁶Siku orang Lewi ke benama Josep, ke asal ari Saiprus, ke dikumbai bala sida rasul Barnabas (reti nya, “Anak Peransang”)

³⁷nyual tanah iya, mai duit nya, lalu ngengkahka duit nya semak kaki sida rasul.