Read Iban Surat Pasal Kereja Rasul 5 Bible Online

Surat Pasal Kereja Rasul 5 - Iban bible

Surat Pasal Kereja Rasul 5

¹Tang siku lelaki ke benama Ananias enggau bini iya Sapira nyual sebidang tanah.

²Ari aum seduai melaki-bini iya, iya naruh sebagi ari duit nya, mai teda duit nya lalu ngengkahka duit nya semak kaki sida rasul.

³Peter lalu nanya iya, “Ananias, nama kebuah Sitan udah ngasuh nuan bulaka Roh Kudus, lalu ngasuh nuan naruh sebagi ari rega tanah nya?

⁴Lebuh tanah nya apin dijual, tanah nya endang enggi nuan, ukai enda? Lalu lebuh tanah nya udah dijual, duit nya endang sebarang ku nuan enggau, ukai enda? Nya alai, nama kebuah nuan berunding deka ngereja utai tu dalam ati nuan? Nuan ukai ngemulaka kami,[29] tang ngemulaka Allah Taala!”

⁵ Lebuh Ananias ninga jaku nya, iya rebah lalu mati. Semua orang ke ninga pekara nya bela takut magang.

⁶Bala orang ke bujang datai, mungkus bangkai iya,[30] ngesan iya ke luar, lalu nguburka iya.

⁷Kira tiga jam udah bekau nya bini iya tama, enda nemu utai ti udah nyadi.

⁸Peter lalu nanya iya, “Padahka ngagai aku, kati tu semua rega tanah ti dijual seduai laki nuan?” Iya lalu nyaut, ‘Au. Nya meh rega iya.”

⁹Peter lalu bejaku ngagai iya, “Nama kebuah seduai besetuju deka nguji Roh Tuhan? Dinga nuan! Orang ke udah nguburka laki nuan, bisi bediri di mua pintu, lalu sida deka ngesan nuan pansut!”

¹⁰Tekala nya iya lalu rebah semak kaki Peter, lalu mati. Lebuh sida ke bujang tama lalu nemu iya udah mati, sida lalu ngesan iya ke luar, lalu nguburka iya ngimbai laki iya.

¹¹Semua raban eklisia, enggau semua orang ke ninga pasal pekara nya lalu balat amat takut.

¹²Mayuh kereja ti nyelai enggau kereja ajih dikereja sida rasul ba bala orang mayuh. Lalu semua sida ke arap begempuru ba Serambi Solomon.

¹³Nadai orang bukai berani begulai enggau sida, tang orang balat muji sida.

¹⁴Tang taja pia, orang ke arapka Tuhan lebih agi majak nambah-menambah, orang ke lelaki enggau orang ke indu,

¹⁵datai ke orang nyau mai orang ke sakit ngagai jalai raya, lalu ngalika sida ba tilam tauka ba tikai, ngambika ayuk Peter ninggang sida lebuh iya mansa.

¹⁶Mayuh amat orang mega datai begempuru ari mayuh bengkah nengeri ti ngelingi Jerusalem, mai orang ke sakit enggau orang ke dikeduan roh ti kamah[31], lalu semua sida digeraika magang.

¹⁷Imam besai lalu ngereja siti utai. Iya enggau semua orang ke enggau iya, ke kepepaska sida rasul,

¹⁸nangkap sida rasul lalu nutup sida dalam rumah jil.

¹⁹Tang malam nya siku melikat Tuhan muka pintu rumah jil nya, mai sida pansut, lalu bejaku,

²⁰“Mupuk kita, lalu bediri dalam Rumah Sembiang, lalu padahka ngagai orang mayuh semua pesan pasal pengidup tu.”[32]

²¹Lebuh sida ninga nya, sida tama ngagai Rumah Sembiang ba urung rerak tawas, lalu majak ngajar orang mayuh. Lebuh imam besai enggau orang ke enggau iya datai, sida ngempuruka semua raban Kunsil, enggau semua tuai bansa orang Israel, lalu ngasuh orang mai sida rasul ari rumah jil ngagai sida.

²²Tang lebuh sida polis ke nyaga Rumah Sembiang mansang ngagai rumah jil, sida nadai nemu sida rasul dalam rumah jil nya; nya alai sida lalu pulai baru ngagai Kunsil lalu madahka nya,

²³“Kami nemu semua pintu ba rumah jil nya dikunchi magang, lalu semua jejaga bediri ba mua pintu, tang lebuh kami muka pintu, kami nadai nemu orang di dalam!”

²⁴Lebuh pemesai ke nyaga Rumah Sembiang, enggau sida tuai imam ninga nya, sida beba runding lebuh sida berundingka utai ti udah nyadi.

²⁵Udah nya siku orang datai lalu madah ngagai sida, “Dinga kita, orang ke ditutup kita dalam rumah jil diatu bediri dalam Rumah Sembiang, ngajar orang mayuh!”

²⁶Pemesai nya lalu mupuk enggau bala polis ke nyaga Rumah Sembiang, lalu mai sida rasul, tang enda enggau chara ti kasar, laban sida takutka diri dituku orang mayuh ngena batu.

²⁷Lebuh sida udah mai sida rasul, sida lalu ngasuh sida rasul bediri di mua raban Kunsil. Imam besai lalu nanya sida.

²⁸ Ku iya, “Kami udah meri atur ti terit, enda nyagi kita ngajar dalam nama tu, tang diatu kita udah ngisi Jerusalem ngena ajar kita, lalu kita keras deka ngasuh kami betanggungjawapka pemati Iya!”

²⁹Tang ku Peter enggau sida rasul bukai nyaut, “Kami enda tau enda ngasika Allah Taala, ukai ngasika mensia.

³⁰ Allah Taala aki ini kitai udah ngangkatka Jesus ari mati, ke udah dibunuh kita ba kayu regang.

³¹Allah Taala udah ngangkatka Iya muak ari kanan Iya nyadi Kepala enggau Juruselamat, ngambika Iya ulih meri orang Israel peluang nesal ati lalu dosa sida diampun.

³²Lalu kami empu nyadi saksi ke utai nya, lalu baka nya mega Roh Kudus ke udah diberi Allah Taala ngagai orang ke ngasika Iya.”

³³Lebuh sida ninga nya, sida balat amat pedis ati, lalu deka munuh sida rasul.

³⁴Tang siku orang Parisi ke benama Gamaliel ke dalam Kunsil nya, ke nyadi pengajar Adat sereta dibasa orang mayuh, bediri lalu ngasuh orang mai sida rasul pansut enda lama.

³⁵Udah nya iya lalu bejaku ngagai raban Kunsil, “Kita orang Israel, perundingka enggau manah utai ti deka dikereja kita ngagai orang tu.

³⁶Laban dulu suba Tadeus angkat ngelaban, ngumbai diri orang ke besai, lalu kira empat ratus iku orang nitihka iya. Tang iya dibunuh, lalu semua orang ke nitihka iya pambar lalu lesap.

³⁷Udah nya Judas ari Galili angkat ngelaban lebuh maya ngitung tubuh, lalu mai orang enggau iya. Iya mega dibunuh, lalu semua orang ke nitihka iya pambar magang.

³⁸Nya alai, ba pekara ke diatu, aku madah ngagai kita, anang ngereja sebarang utai ngagai sida. Awakka sida pia aja! Laban enti pelan tauka pengawa tu datai ari mensia, iya deka puntan.

³⁹ Tang enti utai tu datai ari Allah Taala, kita enda ulih ngalahka sida, lalu kita deka ditemu ngelaban Allah Taala!” Sida lalu besetuju enggau penemu Gamaliel.

⁴⁰Lebuh sida udah ngasuh sida rasul tama, sida lalu ngasuh sida disipat. Udah nya sida enda nyagi sida bejaku dalam nama Jesus, lalu ngelepaska sida.

⁴¹Lebuh sida rasul angkat ari balai Kunsil, sida lalu rami gaga ati ke diri ke udah dikira patut kena perinsa ketegal nama Jesus.

⁴²Lalu tiap hari, dalam Rumah Sembiang enggau dalam rumah sida empu,[33] sida enda ngetu-ngetu ngajar sereta madahka Jesus nya Kristus.[34]