Read Iban Surat Pasal Kereja Rasul 6 Bible Online

Surat Pasal Kereja Rasul 6 - Iban bible

Surat Pasal Kereja Rasul 6

¹Lebuh maya nya menya, lebuh bala murid nyau majak nambah-menambah, orang Judah ke bejaku ngena jaku Gerika[35] mutap ngelaban orang Hebrew, laban indu balu sida enda dikibuhka orang lebuh orang nyadung pemakai tiap hari.

²Sida rasul ke dua belas lalu ngempuruka semua orang ke arap,[36] lalu bejaku ngagai sida, “Kami enda patut ngelengkaka pengawa nusui jaku Allah Taala, lalu meri orang makai.

³Nya alai, menyadi, pilih ari bala kita empu tujuh iku orang ke manah perangai, ke penuh laban Roh Kudus sereta bepenemu-dalam, ke tau diasuh kitai ngereja pengawa tu,

⁴lalu kami empu deka ngemeranka pengawa besampi enggau nusui Berita Manah.”

⁵Utai ti disebut sida ngelantangka ati semua sida, lalu sida milih Stepen ke penuh laban pengarap enggau Roh Kudus, sama enggau Philip, Prokorus, Nikanor, Timon, Parmenas enggau Nikolaus, siku orang bansa bukai ke datai ari Antiok ke udah masuk pengarap orang Judah.

⁶Sida lalu ngasuh orang nya bediri di mua sida rasul, ke besampi lalu ngengkahka jari atas sida.

⁷Jaku Allah Taala majak ngelekai. Pemayuh murid lalu balat amat majak nambah-menambah di Jerusalem, lalu mayuh amat mega sida imam nerima pengarap nya.

⁸Stepen, ke penuh laban berekat[37] enggau kuasa, ngereja mayuh kereja ajih enggau kereja ti nyelai ba orang mayuh.

⁹Udah nya sekeda orang ari raban Balai Gempuru Orang Ke Udah Dilepaska [38] enggau orang Judah ke datai ari menua Sairin, ari Aleksandria, enggau ari menua Silisia enggau Asia, belabuh betalat enggau Stepen.

¹⁰Tang sida enda ulih ngelaban penemu-dalam enggau kuasa Roh Kudus ti dikena iya bejaku.

¹¹Sida lalu belalai nyungkak orang nyebut, “Kami udah ninga iya bejaku busung ngelaban Moses, enggau ngelaban Allah Taala!”

¹²Lalu sida nyungkak orang mayuh, enggau sida tuai bansa, enggau sida pengajar Adat. Sida lalu nangkap Stepen lalu mai iya ngagai Kunsil.

¹³Sida ngasuh orang besaksi bula ngelaban iya, munyi tu, “Orang tu enda ngetu-ngetu bejaku ngelaban endur ti kudus tu, enggau ngelaban Adat,

¹⁴laban kami udah ninga iya madahka Jesus orang Nasaret[39] deka ngerusak[40] endur tu, lalu ngubah semua adat asal ti diberi Moses ngagai kitai!”

¹⁵Semua orang ke duduk dalam Kunsil nya bela merening magang ngagai Stepen, lalu sida meda mua iya baka mua melikat.