Read Iban Surat Pasal Kereja Rasul 8 Bible Online

Surat Pasal Kereja Rasul 8 - Iban bible

Surat Pasal Kereja Rasul 8

¹ Saul rindu meda Stepen kena bunuh. Berengkah ari sehari nya raban eklisia di Jerusalem balat amat kena perinsa, lalu kelimpah ari sida rasul, semua sida pambar ngagai serata menua Judea enggau Samaria.

²Orang ke angkunka Allah Taala nguburka Stepen, lalu bekeduie nyabakka iya.

³ Tang Saul belabuh ngerusak eklisia. Iya bejalai ari rumah sebuah ngagai rumah sebuah, lalu ngirit orang ke lelaki enggau orang ke indu, lalu nutup sida dalam rumah jil.

⁴Sida ke pambar pendiau, bejalai ari endur siti ngagai endur siti, nusui Berita Manah.[44]

⁵Philip mupuk ngagai nengeri Samaria,[45] lalu nusui pasal Kristus[46] ngagai orang dia.

⁶Lalu semua orang mayuh bela keran mendingka utai ti disebut Philip, lebuh sida ninga iya sereta meda kereja ajih ti dikereja iya,

⁷laban roh ti jai manjung pansut ari mayuh orang ke dirasuk antu, lalu mayuh orang ke mati tubuh, tauka enda ulih bejalai, digeraika.

⁸Nya alai orang dalam nengeri nya balat amat gaga.

⁹Nyadi di nengeri nya bisi orang siku ke benama Simon. Iya lama udah ngereja pengawa keramat, ti ngasuh orang di Samaria balat alit ati, lalu madahka diri orang ke bekuasa.

¹⁰Semua orang di nengeri nya, orang ke kaya enggau orang ke seranta[47] bela keran mendingka iya. Ku sida, “Iya tu kuasa Allah Taala, ti dikumbai ‘Kuasa Ti Besai,’ ”

¹¹Lalu sida keran mendingka iya laban sida lama udah balat alit ati meda kereja keramat ti digaga iya.

¹²Tang lebuh sida arapka pesan ti ditusui Philip pasal Berita Manah Perintah Allah Taala, enggau pasal nama Jesus Kristus, sida lalu dibaptisa, nyengkaum lelaki enggau indu.

¹³Indah Simon empu deh arap. Lebuh iya udah dibaptisa, iya nitihka Philip, lalu iya balat alit ati lebuh iya meda kereja ti nyelai enggau kereja ajih nyadi.

¹⁴Lebuh sida rasul di Jerusalem ninga orang Samaria udah nerima jaku Allah Taala, sida lalu ngasuh Peter seduai John ngabas sida.

¹⁵Seduai iya mupuk, lalu besampika sida ngambika sida nerima Roh Kudus,

¹⁶(laban Roh Kudus apin nurun atas[48] sida; sida semina udah dibaptisa dalam nama Tuhan Jesus).

¹⁷Peter seduai John lalu ngengkahka jari atas sida, lalu sida nerima Roh Kudus.

¹⁸Lebuh Simon meda Roh Kudus bisi diberi lebuh seduai iya ngengkahka jari atas sida, iya lalu nguji meri seduai iya duit,

¹⁹ku iya, “Beri kuasa tu mega ngagai aku, ngambika orang ke alai aku ngengkahka jari, nerima Roh Kudus.”

²⁰Tang ku Peter bejaku ngagai iya, “Awakka duit nuan enggau nuan empu sama mati,[49] laban nuan ngumbai diri ulih meli pemeri Allah Taala ngena duit!

²¹ Nuan nadai bagi tauka ungkup dalam utai tu, laban ati nuan salah di mua Allah Taala.

²²Nya alai nesal nuan ke penyai nuan tu, lalu besampi ngagai Tuhan, nyangka ukur Iya ulih ngampun nuan ari runding nuan ti jai nya.

²³ Laban aku meda nuan tu penuh laban ati ti kepapas, sereta ditanchang[50] dosa.”

²⁴Simon lalu bejaku ngagai Peter seduai John, “Besampi ke aku ngagai Tuhan, ngambika utai ti disebut nuan nya enda nyadi ba aku.”

²⁵Lebuh Peter seduai John udah besaksi, lalu nusui pesan Tuhan, seduai iya pulai ngagai Jerusalem, lalu nusui Berita Manah ba mayuh bengkah genturung pendiau di Samaria.

²⁶Udah nya siku melikat Tuhan bejaku ngagai Philip, “Angkat nuan, lalu bejalai tunga ke selatan[51] ngagai jalai raya ti nuju ari Jerusalem ngagai Gasa.” (Jalai raya nya ngerenchah menua puang.)

²⁷Philip angkat lalu mupuk. Nyadi siku pemesai ari Etiopia, ke udah dipeliri, ke ngemataka sarang wang Kuin Kandas menua Etiopia, udah mansang ngagai Jerusalem deka nyembah Allah Taala.

²⁸Lalu iya diatu benung mulaika diri ngagai menua iya empu, duduk dalam kerita kuda iya, lalu macha bup nabi Isaiah.

²⁹Roh Kudus lalu bejaku ngagai Philip, “Alai nuan mansang ngagai kerita kuda nya.”

³⁰Philip lalu belanda ngagai kerita kuda nya, lalu ninga orang nya macha bup nabi Isaiah. Philip lalu nanya iya, “Kati nuan meretika utai ti dibacha nuan?”

³¹Disaut orang nya, “Baka ni ku aku ulih mereti, enti orang nadai nerangka utai nya ngagai aku?” Iya lalu ngasuh Philip niki ngagai kerita kuda nya. Philip lalu duduk ngimbai iya.

³² Tu genteran dalam Bup Kudus ti dibacha iya: “Iya baka bedus ti deka disayat, baka anak domba ti enda bemunyi lebuh iya dikukur. Iya nadai bejaku seleka.

³³Iya dikeduan, lalu enda diberi atur ti lurus. Sapa ulih bejakuka pasal peturun Iya? Laban nyawa Iya udah diambi ari dunya tu.”

³⁴Pemesai nya lalu nanya Philip, “Padahka ngagai aku, sapa orang ke dikenang nabi nya? Pasal iya empu, tauka pasal orang bukai?”

³⁵Philip lalu belabuh bejaku bepun ari ayat nya, lalu nusui ngagai iya Berita Manah pasal Jesus.

³⁶Lebuh seduai iya benung di rantau jalai, seduai iya lalu datai ba endur siti ti bisi ai, lalu ku pemesai nya bejaku, “Peda nuan, ditu bisi ai. Nama utai ti tau nagang aku dibaptisa?”

³⁷Ku Philip bejaku ngagai iya, “Enti nuan arap enggau pengabis ati nuan, nuan tau dibaptisa.” Pemesai nya lalu nyaut, “Aku arapka Jesus Kristus nya Anak Allah Taala.”

³⁸Iya lalu ngasuh kerita kuda nya ngetu, lalu seduai iya sama nurun ngagai ai nya. Philip lalu maptisa iya.

³⁹Lebuh seduai iya pansut ari ai nya, Roh Kudus lalu nabanka Philip, lalu pemesai nya nadai agi meda Philip. Iya lalu mupuk, gaga ati.

⁴⁰Tang Philip nemu diri di Asotus, lalu lebuh iya bejalai nengah menua nya, iya nusui Berita Manah dalam semua nengeri, nyentukka iya nyau datai di Siseria.