Read Iban Surat Pasal Kereja Rasul 9 Bible Online

Surat Pasal Kereja Rasul 9 - Iban bible

Surat Pasal Kereja Rasul 9

¹Lebuh maya nya Saul, ke agi majak ngemba lalu munuh murid Tuhan, betemu enggau imam besai

²lalu minta surat penerang kena iya madahka pejalai diri ngagai balai gempuru di Damaskus, ngambika, enti iya bisi tetemuka lelaki tauka indu ke nitihka Jalai Tuhan, iya tau nangkap sida, lalu mai sida ngagai Jerusalem.

³Lebuh Saul benung di rantau jalai semak Damaskus, siti penampak lalu ngenyit manchar ari langit ngelingi iya.

⁴Iya rebah ke tanah, lalu ninga nyawa bejaku ngagai iya, “Saul, Saul! Nama kebuah nuan merinsaka Aku?”

⁵Iya lalu nanya, “Sapa nuan, Tuan?” Nyawa nya lalu nyaut, “Aku tu Jesus, ke diperinsaka nuan.”

⁶“Tang angkat nuan, lalu tama ngagai nengeri nya, lalu nuan deka dipadahka utai ti enda tau enda dikereja nuan.”

⁷Orang ke bejalai sama enggau Saul bediri tegir-tegir, enda bejaku, laban sida bisi ninga munyi nyawa nya bejaku, tang nadai meda orang.

⁸Saul angkat ari tanah, tang taja pen mata iya menchelak, iya nadai meda utai. Nya alai sida megai jari iya, lalu ngiring iya ngagai Damaskus.

⁹Dalam kandang tiga hari iya nadai meda utai, enda makai, enda ngirup.

¹⁰Nyadi di Damaskus bisi siku murid benama Ananias. Tuhan bejaku ngagai iya dalam genera, “Ananias!” Ananias lalu nyaut, “Tu aku, Tuhan.”

¹¹Tuhan lalu bejaku ngagai iya, “Angkat nuan, lalu bejalai ngagai jalai ti dikumbai Rurus, lalu lebuh nuan datai ba rumah Judas, tanyaka orang siku ke benama Saul, ke asal ari Tarsus. Iya diatu benung besampi,

¹²lalu iya udah begenera[52] meda orang ke benama Ananias tama, lalu ngengkahka jari ba atas iya, ngambika iya ulih meda baru.”

¹³Tang ku Ananias nyaut, “Tuhan, aku udah ninga pasal orang tu ari mayuh orang bukai, pasal iya ke udah balat merinsaka bala nembiak Nuan di Jerusalem,

¹⁴lalu iya udah datai ditu ngena kuasa ari tuai imam, deka nangkap semua orang ke ngangauka nama Nuan.”

¹⁵Tang ku Tuhan bejaku ngagai Ananias, “Mupuk meh nuan, laban iya udah dipilih Aku nyadika perengka kena Aku madahka nama Aku ngagai orang bansa bukai, ngagai raja, enggau ngagai orang Israel.

¹⁶Aku Empu deka madah ngagai iya pemalat pemerinsa ti enda tau enda ditatka iya ketegal nama Aku.”

¹⁷Ananias lalu mupuk, lalu tama rumah nya. Iya ngengkahka jari iya atas Saul, lalu bejaku. “Menyadi aku, Saul, Tuhan Jesus Kristus, ke udah pegari di mua nuan lebuh nuan di rantau jalai mansang kitu, udah ngasuh aku datai, ngambika nuan ulih meda baru, lalu dipenuhka enggau Roh Kudus.”

¹⁸ Tekala nya utai ti baka tisik ikan lalu labuh ari mata Saul, lalu iya ulih meda baru. Udah nya iya angkat lalu dibaptisa,

¹⁹lalu lebuh iya udah makai, iya lalu berasai kering baru. Saul lalu diau dua tiga hari enggau sida murid di Damaskus,

²⁰lalu tekala nya belabuh nusui pasal Jesus dalam balai gempuru. Ku iya, “Iya Anak Allah Taala.”

²¹Semua orang ke ninga iya balat alit ati. Ku sida, “Ukai enda iya tu ke udah munuh orang ke arapka Jesus di Jerusalem suba? Lalu iya udah datai ditu deka nangkap lalu mai sida ngagai bala tuai imam?”

²²Tang Saul majak mansang dalam kuasa, datai ke orang Judah ke diau di Damaskus nyau enda ulih mantah iya agi lebuh iya besaksi madahka Jesus nya Kristus.[53]

²³ Nyau kelama udah bekau nya, orang Judah lalu bepekat deka munuh iya,

²⁴tang Saul nemu sida bepekat ngelaban iya. Sida nengkilaka mua pintu nengeri siang malam, deka munuh iya,

²⁵tang bala murid iya mai iya lebuh malam hari, lalu ngulurka iya ngena bakul ari lubang ti ba dinding kuta.

²⁶Lebuh Saul udah datai di Jerusalem, iya nguji ngulaika diri enggau bala sida murid. Tang sida takutka iya, laban sida enda arapka iya amat udah nyadi murid.

²⁷Tang Barnabas ngambi iya, lalu mai iya betemu enggau sida rasul, lalu madah ngagai sida pasal iya ke meda Tuhan lebuh iya di rantau jalai, pasal Tuhan ke udah bejaku ngagai iya, enggau pasal iya ke berani nusui Berita Manah di Damaskus dalam nama Jesus.

²⁸Nya alai Saul diau enggau sida, lalu bejalai di serata nengeri Jerusalem, lalu bejaku enggau ati ti berani dalam nama Tuhan.

²⁹Iya bejaku lalu betalat enggau orang Judah ke bejaku ngena jaku Gerika,[54] tang sida nguji munuh iya.

³⁰Lebuh sida ke arap nemu nya, sida lalu mai iya ngagai Siseria, lalu ngasuh iya mupuk ngagai Tarsus.

³¹Nya alai raban eklisia di serata menua Judea, Galili, enggau Samaria nadai agi pengachau sereta mansang dalam pengarap. Sida nangika Tuhan lalu ulih saup Roh Kudus, raban sida majak nambah-menambah.

³²Nyadi lebuh Peter bejalai kia-kia ngagai semua orang ke arap, iya mega nemuai ngagai bala nembiak Tuhan ke diau di Lida.

³³Dia iya betemu enggau orang siku ke benama Anias, ke sakit bajung lapan belas taun, lalu nadai kala angkat ari peninduk iya.

³⁴Peter lalu bejaku ngagai iya, “Anias, Jesus Kristus ngeraika nuan. Angkat nuan, lalu kemas peninduk nuan.” Tekala nya Anias lalu angkat.

³⁵Semua orang ke diau di Lida enggau di Saron bela meda Anias, lalu sida nguingka diri ngagai Tuhan.

³⁶Nyadi di Jopa bisi siku murid, ke benama Tabita. (Dalam jaku Gerika nama iya Dorkas, reti nya “Kijang.”) Iya endang seruran ngereja utai ti manah, sereta nulung orang ke seranta.

³⁷Lebuh maya nya, iya sakit, lalu mati. Lebuh sida udah meri iya mandi, sida lalu ngalika iya di sadau.

³⁸Laban Lida enda jauh ari Jopa, sida murid di Joppa ke ninga Peter bisi di Lida lalu ngasuh dua iku orang mansang ngagai Peter, minta iya datai, “Datai enggau jampat ngagai kami.”

³⁹Peter angkat, lalu mupuk enggau seduai iya. Lebuh iya datai, sida lalu mai iya ke sadau. Semua indu ke balu bediri ngimbai Peter, nyabak sereta mandangka semua baju enggau serayung ti udah digaga Dorkas lebuh iya agi begulai enggau sida.

⁴⁰Peter lalu ngasuh semua sida pansut. Udah nya iya besugang, lalu besampi. Iya lalu nguing nunga ngagai bangkai Dorkas, lalu bejaku, “Tabita, angkat nuan!” Tabita lalu menchelakka mata, tepedaka Peter, lalu duduk.

⁴¹Peter lalu nyurungka jari ngagai iya, lalu nulung iya angkat. Udah nya Peter lalu ngangauka bala nembiak Tuhan, enggau sida indu ke balu, lalu mandangka iya amat idup.

⁴²Berita pasal nya ngelekai di serata nengeri Jopa, lalu mayuh orang arapka Tuhan.

⁴³Peter lalu diau lama di Jopa, ba rumah siku tukang samak ke benama Simon.