Read Iban Rome 1 Bible Online

Rome 1 - Iban bible

Rome 1

¹ Surat ari Paul, ulun[1] Jesus Kristus, ke dikangauka nyadi rasul, lalu dipilih[2] nusui Berita Manah Allah Taala,

²ti udah disemaya Allah Taala dulu kelia nengah sida nabi Iya, dalam Bup Kudus,

³iya nya Berita Manah pasal Anak Iya, ke ada nyadi mensia ari peturun David;

⁴lalu dikumbai Anak Allah Taala ulih Roh[3] pengudus, laban pengangkat Jesus Kristus Tuhan kitai ari mati.

⁵ Ulih Iya, Allah Taala udah meri kami[4] pengasih enggau pengawa nyadi rasul mai semua orang bansa bukai arap sereta ngasika nama Iya,

⁶nyengkaum kita ke dikangauka nyadi nembiak Jesus Kristus.

⁷ Ngagai semua kita ke dikerinduka Allah Taala di Rome, ke udah dikangauka nyadi nembiak Tuhan: Awakka Allah Taala ti Apai kitai enggau Tuhan Jesus Kristus meri kita pengasih enggau pemaik.

⁸Tang aku enda tau enda dulu meri terima kasih ngagai Allah Taala aku dalam nama Jesus Kristus, ke semua bala kita, laban pengarap kita benung ditusui di serata dunya.

⁹Laban Allah Taala, ke dipetuaika aku enggau pengabis ati aku lebuh aku nusui Berita Manah pasal Anak Iya, nemu aku endang enda ngetu ingatka kita dalam sampi aku,

¹⁰ minta Allah Taala, ari peneka Iya Empu, ngasuh aku ulih nemuai ngagai kita,

¹¹laban aku balat lelengauka kita, ngambika aku ulih bekunsika berekat Roh enggau kita, kena ngeringka kita.

¹²Utai ti ku aku nya, ngambika kitai sama diperansang ulih pengarap pangan diri, iya nya pengarap kita, enggau pengarap aku.

¹³ Aku dekaka kita nemu, menyadi, aku suah udah deka nemuai ngagai kita ngambika aku ulih mai orang ari bala kita arap, baka ti udah dikereja aku ba orang bansa bukai. Tang aku seruran bisi utai nanggul.

¹⁴ Aku bisi tanggungjawap atas semua orang, orang ke udah mansang, enggau orang ke apin mansang, orang ke bisi pelajar, enggau orang ke nadai pelajar.

¹⁵Nya kebuah aku keran mega deka nusui Berita Manah ngagai kita ke diau di Rome.

¹⁶ Laban aku enda malu ke Berita Manah, laban nya kuasa Allah Taala kena nyelamatka genap iku orang ke arap, keterubah orang Judah, lalu mega orang bansa bukai.

¹⁷ Laban Berita Manah mandangka chara Allah Taala ngasuh orang bebaik enggau Iya, iya nya nengah pengarap kenyau ari pun datai ke ujung.[5] Munyi ti ditulis, “Orang ke lurus deka idup ngena pengarap.[6]

¹⁸ Laban pengeringat Allah Taala dipandangka ari serega ngelaban semua dosa enggau penyai mensia ti nagang sida nemu pemendar.

¹⁹Laban utai ti patut ditemu sida pasal Allah Taala, endang nyata ba sida, laban Allah Taala udah ngayanka utai nya ngagai sida.

²⁰ Kenyau ari penumbuh dunya, kuasa Allah Taala ti meruan belama iya enggau kualiti Iya ti enda ulih dipeda, udah ditemu sereta dipeda mensia ari utai ti digaga Iya. Nya alai sida nadai kebuah enda nemu;

²¹ laban taja pen sida nemu Allah Taala, tang sida enda ngemesaika Iya nyadika Allah Taala sida, tauka meri terima kasih ngagai Iya, tang sida berundingka utai ti nadai guna, lalu runding sida mapap sereta penuh laban pemetang.

²²Sida ngumbai diri bepenemu-dalam, tang sida beli,

²³ lalu sida nyilih mulia Allah Taala ti idup belama iya,[7] enggau engkeramba ti digaga neladan gamal mensia ti enda ulih idup belama iya, tauka neladan gamal burung, tauka jelu, tauka ular.

²⁴Nya alai, Allah Taala nejuka sida ngereja ulah ti kamah ti dikinginka sida, ngambika sida ngamahka tubuh diri enggau pangan diri,

²⁵laban sida nyilih pemendar pasal Allah Taala enggau pemula, lalu nyembah sereta betuaika utai ti digaga Allah Taala, ukai nyembah Allah Taala Empu ke ngaga semua utai lalu patut dipuji belama iya! Amin.

²⁶Nya kebuah Allah Taala nejuka sida nurutka pengingin sida ti jai. Indu beleman enggau indu;

²⁷lalu baka nya mega lelaki enggai beleman enggau indu. Lelaki tetengukka lelaki, lalu sida enda nemu malu beleman enggau orang ke sama lelaki baka sida empu, lalu sida nerima ukum ba tubuh sida empu ketegal penyalah sida.

²⁸Nyadi laban sida ngumbai diri tau enda ibuh nemu Allah Taala, nya alai Iya nejuka sida diperintah runding ti jai, ngambika sida ngereja utai ti enda patut dikereja sida.

²⁹Sida penuh laban genap macham penyalah, penyai, pengamu, ati ti begedika orang. Sida kepapas, munuh orang, belaya, ngelakar, bedendam, bejakuka orang,

³⁰bejai orang, begedika Allah Taala, nadai nemu bebasaka orang, sumbung, temegah, ngaga penyai, ngelaban apai indai,

³¹beli, enda tetap ati, nadai nemu berundingka orang, nadai nemu kasihka orang.

³²Sida nemu adat Allah Taala endang madahka orang ke ngereja utai nya patut dibunuh, tang sida ukai semina ngereja utai nya aja, tang sida mega meransang orang bukai ngereja utai nya.