Read Iban Rome 11 Bible Online

Rome 11 - Iban bible

Rome 11

¹ Nya alai aku nanya: Kati Allah Taala udah nulak nembiak Iya? Enda! Aku empu tu orang Israel, peturun Abraham, ari raban bansa Benjamin.

² Allah Taala enda nulak nembiak Iya, ke udah dipilih Iya kenyau ari pun. Kati kita enda nemu utai ti disebut Bup Kudus pasal Elijah, pasal iya ke bebendar besampi ngagai Allah Taala ngelaban orang Israel? Ku iya:

³ “Tuhan, sida udah munuh bala nabi Nuan, sida udah ngeruntuhka alta Nuan. Semina aku siku aja agi tinggal, lalu sida nguji munuh aku.”

⁴ Tang nama saut Allah Taala ngagai iya? “Aku udah ngalau ke Aku Empu tujuh ribu iku orang ke nadai udah besugang ngagai Baal.”

⁵ Nya alai baka nya mega diatu: semina mimit aja orang agi tinggal, ke udah dipilih ulih pengasih.

⁶ Tang enti sida udah dipilih ulih pengasih, reti nya sida ukai dipilih beduduk ba pengawa ti dikereja sida, laban enti sida dipilih beduduk ba pengawa ti dikereja sida, reti nya pengasih ukai pengasih.

⁷ Nama deh? Orang Israel nadai bulih utai ti digiga sida. Orang ke dipilih Allah Taala bulih utai nya, tang sida ti bukai kieh,

⁸ munyi ti ditulis, “Allah Taala udah meri sida roh luput, mata ti enda meda enggau pending ti enda ninga, nyentuk ngagai sehari tu.”

⁹ Lalu ku David nyebut, “Awakka mija[49] sida nyadika panjuk, nyadika perangkap, enggau nyadika ukum sida.

¹⁰Awakka mata sida buta, ngambika sida enda ulih meda. Lalu awakka sida bungkuk belama iya.”

¹¹ Nya alai aku nanya: kati sida udah tesangkut ngambika sida enda ulih angkat agi? Ukai! Tang ari penyalah sida, pengelepas udah datai ngagai orang bansa bukai, ngambika orang Israel kepapas.

¹²Enti penyalah orang Israel udah mai berekat ti besai ngagai dunya, lalu penyeranta sida dalam roh, udah mai berekat ti besai ngagai orang bansa bukai, tentu besai agi ga berekat deka datai lebuh semua orang Israel dibai magang ngagai Tuhan!

¹³ Aku diatu bejaku ngagai kita ke orang bansa bukai. Seagi-agi aku nyadi rasul ke orang bansa bukai, aku deka temegahka pengawa aku,

¹⁴ ngambika bansa aku empu kepapas, lalu ari nya, nyelamatka sekeda sida.

¹⁵ Laban enti ari sida ke ditulak, semua dunya dibai bebaik enggau Allah Taala, namaka utai ti deka nyadi, lebuh semua sida diterima magang? Tentu pengidup ke orang ke mati!

¹⁶Enti roti ti keterubah nya kudus, semua tuku roti nya mega kudus. Lalu enti urat kayu nya kudus, dan kayu nya mega kudus.

¹⁷Tang enti sekeda dan kayu kana nya ditetak, lalu kita ke dan kayu kana ti tumbuh-diri dalam babas, dikawinka ngagai batang kana nya, ba endur alai dan nya, lalu bulih pengidup ari kayu nya,

¹⁸anang temegahka diri ti udah ngambi endur sida. Enti kita temegah, kingatka tu: ukai kita ke meri urat makai, tang urat ti meri kita makai.

¹⁹Tang kita nyangka deka nyebut, “Dan nya udah ditetak ngambika aku ulih dikawinka ngagai batang kana nya.”

²⁰ Nya amat. Sida udah dibuai laban sida enda arap, tang kita mengkang ba endur kita, laban kita arap. Nya alai anang sumbung ketegal nya, tang semina nangi aja.

²¹Laban enti Allah Taala enda ngalau dan ti asal, Iya pen enda mega ngalau kita.

²²Nya alai, peratika penelap enggau penerit Allah Taala. Iya terit enggau orang ke udah rebah, tang Iya nelap enggau kita, enti kita meruan dalam penelap Iya. Tang enti kita enda, kita deka mega dibuai ari batang.

²³Lalu enti orang Israel ngelengkaka ati sida ti enda arap, sida deka dikawinka baru ngagai endur asal sida, laban Allah Taala bisi kuasa ngawinka sida baru.

²⁴Laban enti kita udah ditetak ari kayu kana ti tumbuh-diri dalam babas, lalu dikawinka ngagai batang kayu kana ti ditanam, ti enda patut ulih nyadi, tentu nyamai agi dan asal dikawinka baru ngagai batang asal sida.

²⁵ Aku enggai ke kita enda nemu misteri tu, menyadi, ngambika kita enda sumbung: sekeda orang Israel deka mengkang kieh datai ke semua orang bansa bukai udah sampal magang datai ngagai Allah Taala.

²⁶ Nya alai semua orang Israel deka diselamatka magang, munyi ti udah ditulis, “Juruselamat deka datai ari Sion Iya deka muai semua penyai ari peturun Jakop.

²⁷ Tu meh sempekat Aku enggau sida lebuh Aku muai dosa sida.”

²⁸Ba pasal Berita Manah, orang Israel nyadi munsuh Allah Taala, ke penguntung kita. Tang ba pasal nyadi orang ke dipilih Allah Taala, sida iya dikerinduka Allah Taala, ketegal aki ini sida.

²⁹Laban pemeri enggau kangau Allah Taala enda ulih diubah.

³⁰Baka kita ke enda ngasi dulu menya, tang diatu kita udah bulih pengasih laban sida enda ngasi,

³¹baka nya mega sida diatu enda ngasi, ngambika ulih pengasih ti udah diayanka ngagai kita, sida mega tau nerima pengasih.

³²Laban Allah Taala udah ngasuh semua mensia enda ngasi, ngambika Iya ulih ngayanka pengasih ngagai semua.

³³ Naka meh pemesai pengaya Allah Taala! Naka meh pemintar enggau penalam penemu Iya! Nadai orang tetemuka atur enggau jalai Iya!

³⁴ “Laban sapa nemu runding Tuhan? Sapa ulih ngajar Iya?

³⁵ “Sapa udah kala meri Iya utai, datai ke Iya nyau enda tau enda mayar utai nya?”

³⁶ Laban semua utai endang datai ari Iya, digaga ulih Iya, nyadika enggi Iya. Puji meh Iya belama iya! Amin.