Read Iban Rome 12 Bible Online

Rome 12 - Iban bible

Rome 12

¹ Nya alai, menyadi, ulih pengasih Allah Taala, aku minta kita nyerahka tubuh kita nyadi piring ti idup, ti kudus, ti dikerinduka Allah Taala. Nya meh jalai kita patut nyembah Iya.

² Anang nitihka chara dunya, tang awakka Allah Taala ngubah chara kita berunding, ngambika kita nemu peneka Iya--iya nya utai ti badas, ti ngerinduka ati Iya, ti pemadu menyana.

³Laban ulih pengasih ti diberi Allah Taala ngagai aku, aku bejaku ngagai genap iku kita: anang ngumbai diri pama agi ari ti patut, tang enggau ati ti baruh, peresa diri empu nitihka pemesai pengarap ti diberi Allah Taala ngagai kita siku-siku.

⁴ Laban baka tubuh kitai ti mayuh perengka, lalu pengawa ti dikereja sida siti-siti endang enda sebaka,

⁵ baka nya mega kitai; taja pen kitai tu mayuh, tang kitai tu nyadi siti tubuh dalam Kristus, seraban enggau pangan diri.

⁶ Kitai bisi pemeri ti enda sebaka, tang nitihka pengasih ti udah diberi ngagai kitai. Enti kitai bisi pemeri kena benabi,[50] awakka kitai benabi nitihka pemesai pengarap kitai;

⁷enti kitai bisi pemeri mela orang, awakka kitai mela orang; enti kitai bisi pemeri ngajar orang, awakka kitai ngajar orang;

⁸enti kitai bisi pemeri meransang orang, awakka kitai meransang orang; enti kitai bisi pemeri ngenjuk utai ngagai orang, awakka kitai ngenjuk utai ngagai orang enggau ati ti gerah mudah; enti kitai bisi pemeri nulung orang, awakka kitai nulung orang enggau ati ti ransing; enti kitai bisi pemeri ngayanka pengasih ngagai orang, awakka kitai ngereja nya enggau ati ti gaga.

⁹Rindu enggau pengabis ati; begedika penyai; bepegai teguh ba utai ti badas;

¹⁰rinduka pangan diri enggau ati ti angkun laban kita diri menyadi enggau pangan diri; awakka kita berebut ngayanka basa ngagai pangan diri.

¹¹Anang lembau, seruran rajin nitihka Roh Kudus, bekereja ke Tuhan.

¹² Gaga ati ke pengadang kita, liat ati natka pemerinsa, majak besampi.

¹³Beri utai ngagai nembiak Tuhan ke suntuk, lalu sambut temuai ngagai rumah kita.

¹⁴ Berekatka orang ke merinsaka kita; berekatka sida, anang nyumpah sida.

¹⁵ Rami gaga enggau orang ke rami gaga, nyabak enggau orang ke nyabak.

¹⁶ Diau bepangan enggau diri sama diri; anang ngeninggika diri, tang begulai enggau orang ke baruh ati;[51] anang sumbung.[52]

¹⁷ Anang malas penyai ngena penyai, tang kereja utai ti ngena dipeda semua orang.

¹⁸ Enti ulih, seagi-agi utai nya bepanggai ba kita, diau bebaik enggau semua orang.

¹⁹ Menyadi, anang malas, tang awakka Allah Taala ngayanka pengeringat Iya; laban endang udah ditulis, “Aku ke malas, Aku deka mayar, ku Tuhan bejaku.”

²⁰ Anang. “Enti munsuh kita lapar, beri iya makai. Enti iya aus, beri iya ngirup, laban lebuh kita ngereja nya, kita nugungka bara api ba puchuk pala iya.”

²¹Anang alah laban penyai, tang alahka penyai ngena pemadas.