Read Iban Rome 13 Bible Online

Rome 13 - Iban bible

Rome 13

¹ Awakka semua orang nunduk ngagai perintah ti megai menua; laban perintah nadai tau bisi enti enda ari Allah Taala, lalu perintah ti bisi nya didudukka Allah Taala.

²Nya alai barang sapa ngelaban perintah, ngelaban utai ti udah didudukka Allah Taala, lalu orang ke ngelaban perintah deka diukum.

³ Laban orang ke megai perintah ukai ngenakutka orang ke manah ulah, tang ngenakutka orang ke jai. Kati kita enggai ke diri takutka orang ke megai perintah? Enti pia, kereja utai ti badas. Nya baru kita deka nerima puji,

⁴ laban orang ke megai perintah nya ulun Allah Taala, bekereja ke penguntung kita. Tang enti kita ngereja penyalah, kita patut takut, laban iya ukai bisi kuasa[53] ngapa. Iya ulun Allah Taala ke bejalaika ukum[54] Allah Taala ba orang ke ngereja penyalah.

⁵Nya alai, kita enda tau enda nunduk ngagai perintah, ukai semina laban kita deka nyeliahka pengeringat Allah Taala, tang laban kita beresi ati.

⁶ Nya mega kebuah kita mayar chukai, laban orang ke megai perintah bekereja ke Allah Taala, bejalaika pengawa nya.

⁷Bayar ngagai sida utai ti patut dibayar kita. Bayar chukai ngagai orang ke patut alai kita mayar chukai, duit pupu ngagai orang ke patut alai kita mayar duit pupu, lalu beri basa ngagai orang ke patut dibasa kita.

⁸ Anang berutang ba orang, kelimpah ari berutang pengerindu ba pangan diri, laban orang ke rinduka pangan diri, udah ngamatka Adat.

⁹ Pesan ti nyebut, “Anang butang; anang munuh orang; anang ngenchuri; anang inginka utai orang,” enggau semua pesan bukai, tau disimpul ngena jaku tu, “Rinduka pangan diri baka nuan ke rinduka diri empu.”

¹⁰ Pengerindu enda ngemediska orang. Nya alai pengerindu ngamatka Adat.

¹¹ Kelimpah ari nya, kita nemu, tu meh maya alai kita enda tau enda dani. Laban pengelepas diatu nyau datai semak agi ngagai kitai ari lebuh kita ke terubah arap suba.

¹² Hari nyau udah jauh malam, lalu nyau deka siang. Nya alai aram kitai muai semua pengawa pemetang, lalu ngerasukka senyata penampak;

¹³ aram kitai diau menyana baka ke diau lebuh siang hari, ukai berami enda beiga-iga, ukai mabuk, ukai ngereja ulah ti kamah, ukai jai ulah, ukai belaya, ukai kepapas.

¹⁴ Tang rasukka Tuhan Jesus Kristus, lalu anang berundingka jalai ngemuaska pengingin dosa.