Read Iban Rome 14 Bible Online

Rome 14 - Iban bible

Rome 14

¹ Sambut orang ke lemi pengarap, tang ukai laban kita deka bekelikuhka pasal runding sida.

²Sekeda orang ngumbai diri tau makai sebarang utai, tang orang ke lemi pengarap semina makai sayur aja.

³ Orang ke makai sebarang utai, enda tau mechat orang ke enda, lalu orang ke enda makai sebarang utai, enda tau ngakim[55] orang ke makai sebarang utai, laban Allah Taala udah nerima orang nya.

⁴Sapa kita nya, alai kita berani ngakim[56] ulun orang bukai? Tuan sida empu ke deka mutuska penemu sekalika orang nya rebah tauka bediri. Lalu iya deka bediri, laban Tuhan[57] ulih ngasuh iya bediri.

⁵ Sekeda orang ngumbai hari siti besai agi ari hari ti bukai, lalu orang bukai ngumbai semua hari sebaka magang. Genap iku kitai patut mutuska penemu pasal nya ke diri empu.

⁶Orang ke ngintu hari nya, ngereja nya kena iya ngemesaika Tuhan. Orang ke makai utai,[58] ngereja nya kena iya ngemesaika Tuhan, laban iya meri terima kasih ngagai Allah Taala; lalu orang ke enggai makai, ngereja nya kena iya ngemesaika Tuhan, lalu meri terima kasih ngagai Allah Taala.

⁷ Kitai ukai idup ke diri empu, lalu kitai ukai mati ke diri empu.

⁸ Enti kitai idup, kitai idup ke Tuhan, lalu enti kitai mati, kitai mati ke Tuhan. Nya alai, nemuka kitai idup tauka mati, kitai endang enggi Tuhan.

⁹Nya kebuah Kristus mati lalu angkat idup baru, ngambika Iya nyadi Tuhan ke orang ke idup enggau ke orang ke mati.

¹⁰ Nama kebuah kita ngakim[59] orang bukai?[60] Lalu nama kebuah kita mechat menyadi kita? Laban semua kitai deka bediri di mua Allah Taala, lalu diakim Iya.

¹¹ Laban endang udah ditulis, “Laban Aku endang idup, ku Tuhan bejaku, genap iku orang deka besugang di mua Aku, lalu genap iku orang[61] deka muji Allah Taala.”

¹²Nya alai, genap iku kitai deka madahka pasal diri empu ngagai Allah Taala.

¹³ Nya alai, aram kitai badu agi ngakim[62] pangan diri, tang mutus ati enggai sekali-kali ngereja utai ti tau ngasuh orang bukai tesangkut tauka bedosa.

¹⁴Laban aku diau dalam Tuhan Jesus, aku nemu, nadai pemakai [63] ti enda tuchi. Tang pemakai nya nyadi enda tuchi ke orang, enti orang nya ngumbai iya enda tuchi.

¹⁵ Enti menyadi nuan enda nyamai ati ketegal utai ti diempa nuan, reti nya nuan ukai ngereja utai nya beduduk ba pengerindu. Anang nejuka utai ti diempa nuan ngerusak orang, laban Kristus udah mati ngarika iya.

¹⁶ Nya alai, anang nejuka utai ti dikumbai nuan manah, dipejai orang.

¹⁷Laban Perintah Allah Taala ukai pasal pemakai enggau utai ti diirup, tang pasal pengelurus, pemaik enggau pengaga dalam Roh Kudus.

¹⁸Orang ke bekereja ke Kristus baka nya dikerinduka Allah Taala, sereta dikerinduka mensia.

¹⁹ Nya alai, aram kitai ngereja utai ti mai pemaik, enggau utai ti tau ngeringka pangan diri.

²⁰ Anang ngerusak utai ti udah dikereja Allah Taala ketegal pemakai. Semua pemakai[64] tuchi magang, tang kitai salah enti kitai ngereja utai ti tau ngasuh orang bukai bedosa.

²¹ Kitai ngereja utai ti ngena enti kitai enda makai dagin, tauka enda ngirup wain, tauka enda ngereja utai ti tau ngasuh menyadi kita bedosa.

²² Utai ti dikarapka kita ba pasal pekara tu, nya semina entara kita enggau Allah Taala. Beberekat meh orang ke enda besalah[65] diri empu, lebuh sida ngereja utai ti ngena ba ati sida empu!

²³Tang orang ke kakang ati deka diukum enti sida makai, laban sida ukai ngereja nya ari pengarap, laban semua utai ti ukai datai ari pengarap, nya dosa magang.