Read Iban Rome 16 Bible Online

Rome 16 - Iban bible

Rome 16

¹Aku ngasuh kita bekelala enggau menyadi indu kitai, Poebe, ke bekereja nyadi dikon[69] ke eklisia di Kenkria,

²ngambika kita nyambut iya dalam nama Tuhan, baka ti patut dikereja ke nembiak Tuhan, lalu nulung iya enggau sebarang utai ti dipeguna iya ari kita, laban iya udah nulung mayuh orang, nyengkaum nulung aku empu.

³ Aku ngirumka tabi basa ngagai Prisila seduai Akuila, ke sama bekereja enggau aku ke Jesus Kristus,

⁴ke udah berambunka nyawa ketegal aku. Aku enggau semua eklisia orang bansa bukai bela meri terima kasih ngagai seduai iya.

⁵ Aku ngirumka tabi basa ngagai raban eklisia ke begempuru dalam rumah seduai iya. Aku meri tabi basa ngagai pangan aku Epinetus, orang ke terubah-rubah arapka Kristus di menua Asia.

⁶Aku ngirumka tabi basa ngagai Maria, ke udah bebendar amat bekereja ba bala kita.

⁷Aku ngirumka tabi basa ngagai Andronikus seduai Junia,[70] ti kaban belayan aku empu, lalu udah sama kena jil enggau aku. Seduai tu orang ke dikelala sida rasul, lalu seduai iya dulu agi ari aku nyadi orang Kristian.

⁸Aku ngirumka tabi basa ngagai Ampliatus, pangan ke dikerinduka aku dalam Tuhan.

⁹Aku meri tabi basa mega ngagai Urbanus, ke sama gawa enggau kitai ke Kristus, enggau ngagai Stakis pangan ke dikerinduka aku.

¹⁰Tabi basa mega ngagai Apeles, ke udah ditemu taluk ke Kristus. Aku mega ngirumka tabi basa ngagai bala sida Aristobulus sebilik.

¹¹Tabi basa mega ngagai Herodion, ke sama sebansa enggau aku empu, enggau ngagai orang Kristian ke dalam ruang bilik Narsisus.

¹²Aku ngirumka tabi basa ngagai Tripina seduai Triposa, ke bekereja ke Tuhan, enggau ngagai Persis, pangan ke dikerinduka aku, ke udah bebendar bekereja ke Tuhan.

¹³ Aku ngirumka tabi basa ngagai Rupus ke landik bekereja ke Tuhan, enggau ngagai indai iya ke seruran ngintu aku baka ke ngintu anak iya empu.

¹⁴Aku mega ngirumka tabi basa ngagai Asinkritus, Plegon, Hermes, Patrobas, Hermas, enggau semua orang Kristian ke begulai enggau sida.

¹⁵Tabi basa mega ngagai Pilologus enggau Julia, ngagai Nereus enggau menyadi indu iya, ngagai Olimpas enggau ngagai semua nembiak Tuhan ke begulai enggau sida.

¹⁶ Beri tabi pengerindu ngagai pangan diri. Semua eklisia Kristus bela ngirumka tabi basa ngagai kita.

¹⁷ Menyadi, aku minta kita bejaga ari orang ke mai penyerekang lalu mechahka gerija, ke ngelaban ajar ti udah diajar ngagai kita. Anang begulai enggau sida!

¹⁸Laban orang ke baka nya ukai bekereja ke Kristus Tuhan kitai, tang bekereja nitihka pengingin sida empu. Ngena jaku ti manis enggau jaku kelangkung sida nipu orang ke enda nemu berunding.

¹⁹ Laban taja pen semua orang udah bela ninga kita udah ngasi, datai ke ati aku empu nyau gaga ati ketegal kita, aku dekaka kita nyadi orang ke bepenemu-dalam ba pasal utai ti badas, sereta diau tuchi ba pasal utai ti jai;

²⁰ nya baru Allah Taala, ke pun pemaik, deka ngeredakka Sitan di baruh kaki kita enda lama da agi. Awakka pengasih Tuhan Jesus meruan enggau kita.[71]

²¹ Timoti, ke sama bekereja enggau aku, ngirumka tabi basa ngagai kita, lalu pia mega Lusius, Jason, enggau Sosipater, ke kaban belayan aku.

²²Aku, Tertius, ke nyadi tukang tulis ke surat tu, ngirumka tabi basa ngagai kita dalam Tuhan.

²³ Gaius, ke bempu rumah ti alai aku diau enggau alai raban eklisia begempuru, ngirumka tabi basa ngagai kita. Erastus, ke nyadi tukang wang ke nengeri tu, enggau menyadi kitai Kuartus, ngirumka tabi basa ngagai kita.

²⁴Awakka pengasih Jesus Kristus Tuhan kitai meruan enggau kita semua. Amin.

²⁵Aram kitai ngemuliaka Allah Taala ke ulih ngeringka kita, nitihka Berita Manah ti ditusui aku enggau nitihka ajar Jesus Kristus, nitihka pemandang pasal misteri ti lama udah dilalaika dulu kelia

²⁶tang diatu, ari asuh Allah Taala ti meruan belama iya, udah diayanka, lalu ulih jaku ti ditulis sida nabi, dipadahka ngagai semua orang bansa bukai ngambika semua orang tau arap lalu ngasi.[72]

²⁷Ngagai Allah Taala ti siku aja, ke nemu semua utai, beri meh mulia belama-lama iya, ulih Jesus Kristus! Amin.[73]