Read Iban Rome 3 Bible Online

Rome 3 - Iban bible

Rome 3

¹Enti pia, nama penguntung ke orang Judah? Tauka, nama guna betutus?

² Mayuh penguntung! Kesatu, orang Judah udah diberi pesan Allah Taala.

³Tang kati enti sekeda orang Judah enda tetap ati? Kati nya tau ngasuh Allah Taala enda tetap ati?

⁴ Enda! Taja pen semua mensia bula, tang Allah Taala enda bula, munyi ti ditulis, “Ngambika Nuan ditemu lurus lebuh Nuan bejaku, lalu menang lebuh Nuan diakim.”[9]

⁵ Tang enti penyai kitai nunjukka pengelurus Allah Taala, baka ni ku jalai kitai bejaku? Kati kitai tau ngumbai Allah Taala enda lurus laban Iya ringat ngagai kitai? (Aku bejaku ngena chara mensia.)

⁶Enda tau! Laban enti Iya enda lurus, baka ni ku Iya ulih ngakim dunya?

⁷Tang enti pemula aku ngasuh pemendar pasal Allah Taala nyata agi, ke mulia nama Iya, nama kebuah aku agi dikumbai bedosa?

⁸ Lalu nama kebuah enda nyebut -- sekeda orang betenah ngumbai kami bisi nyebut tu -- “Aram kitai ngereja penyai ngambika pemadas datai”? Awakka sida diukum.

⁹ Nama deh? Kati kitai manah agi?[10] Enda! Laban aku udah madah, orang Judah enggau orang bansa bukai endang di baruh kuasa dosa,[11]

¹⁰ munyi ti udah ditulis: “Nadai siku ke lurus, siku pen nadai.

¹¹nadai siku ke mereti, nadai siku ke ngiga Allah Taala.

¹²Semua bela udah limpang magang. Semua sida nadai guna magang. Nadai siku ke ngereja utai ti badas, siku pen nadai.

¹³ Nyawa sida merangap baka lubang kubur ti enda ditutup. Sida nipu orang ngena dilah sida. Rachun liur ular ti bisa di baruh bibir mulut sida.

¹⁴ Nyawa sida penuh laban jaku sumpah enggau pemenchi.

¹⁵ Sida jampat deka munuh.

¹⁶Sida ngerusak sereta ngemerinsa,

¹⁷lalu sida nadai nemu jalai pemaik.

¹⁸ Sida enda nangika Allah Taala.”

¹⁹ Diatu baru kitai nemu, semua utai ti disebut Adat endang ditujuka magang ngagai orang ke di baruh Adat, ngambika semua mulut badu agi bejaku, lalu semua dunya diakim Allah Taala.

²⁰ Laban nadai siku ke lurus di mua Allah Taala ketegal nitihka Adat, laban Adat semina ngasuh kitai nemu pasal dosa.

²¹ Tang diatu pengelurus Allah Taala udah dipandangka, ari luar Adat, lalu Adat enggau sida nabi besaksika pasal pengelurus nya.

²² Pengelurus ti ari Allah Taala nya datai ulih pengarap ke Jesus Kristus,[12] ngagai semua orang ke arap. Laban semua mensia nadai bida ari pangan diri,

²³ laban semua bela udah bedosa magang lalu jauh ari mulia Allah Taala.

²⁴ Diatu sida digaga lurus[13] ulih pengasih ti diberi Iya pechuma, lebuh sida ditebus Jesus Kristus.

²⁵Allah Taala nyerahka Iya nyadika genselan kena muai dosa, ulih darah Iya, ti diterima ngena pengarap. Allah Taala ngereja nya kena Iya mandangka pengelurus Iya, laban ulih pengeliat ati Iya, Iya enda ngukum dosa ti udah dikereja dulu ari nya.

²⁶Iya ngereja nya diatu kena Iya nunjukka Diri amat lurus, lalu ngaga orang ke arapka Jesus Kristus,[14] nyadi lurus.

²⁷Enti pia, nama utai dikemegahka kitai? Nadai! Laban kitai ngasika Adat? Ukai, tang laban adat pengarap.

²⁸ Laban kitai nemu, orang digaga lurus[15] ulih pengarap, ukai laban iya ngasika Adat.

²⁹ Kati Allah Taala nya semina ke orang Judah aja? Kati Iya ukai Allah Taala ke orang bansa bukai mega? Iya mega Allah Taala ke orang bansa bukai,

³⁰ laban Allah Taala semina siku aja, lalu Iya deka ngaga orang Judah enggau orang bansa bukai lurus, ulih pengarap siti nya aja.

³¹ Enti pia, kati kitai muai Adat laban kitai bisi pengarap tu? Enda! Kitai ngeringka Adat.