Read Iban Rome 5 Bible Online

Rome 5 - Iban bible

Rome 5

¹ Nya alai, laban kitai digaga lurus[18] ulih pengarap, kitai[19] diau dalam pemaik enggau Allah Taala ulih Jesus Kristus Tuhan kitai.

² Ulih Iya kitai udah ulih datai ngagai pengasih ti alai kitai bediri diatu, lalu kitai[20] deka temegahka pengadang kitai ke deka enggau bempu mulia Allah Taala.

³Lalu ukai semina nya aja, tang kitai mega deka temegahka diri ke natka pemerinsa, laban kitai nemu pemerinsa deka ngadaka ati ti tan,

⁴lalu ati ti tan deka ngadaka perangai ti manah, lalu perangai ti manah deka ngadaka pengadang,

⁵ lalu pengadang enda ngelebuka kitai, laban pengerindu Allah Taala udah dituang ke dalam ati kitai ulih Roh Kudus ke udah diberi ngagai kitai.

⁶Laban lebuh kitai agi lemi, ba maya ti patut, Kristus mati ke orang ke jai.

⁷Iya ti bendar, jarang orang deka mati ngarika orang ke lurus. Nyangka orang berani mati ngarika orang ke manah.

⁸ Tang Allah Taala udah ngayanka pengerindu Iya ke kitai, iya nya lebuh kitai agi nyadi orang ke bedosa, Kristus mati ngarika kitai!

⁹ Nya alai, laban kitai diatu udah digaga lurus[21] ulih darah Kristus, tentu lebih agi ga kitai deka diselamatka ulih Iya ari pengeringat Allah Taala!

¹⁰ Laban enti kitai, lebuh kitai agi nyadi munsuh Allah Taala, dibai bebaik enggau Iya ulih pemati Anak Iya, tentu lebih agi ga kitai deka diselamatka ulih nyawa Iya lebuh kitai udah dibai bebaik enggau Iya.

¹¹ Tang ukai semina nya aja; tang kitai mega rami gaga ati ke utai ti udah dikereja Allah Taala ulih Jesus Kristus Tuhan kitai, laban Iya udah mai kitai bebaik enggau Allah Taala.

¹² Nya alai, baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.

¹³Iya ti bendar, dosa endang udah bisi di dunya sebedau Adat diberi, tang dosa nadai kena itung laban Adat apin bisi.

¹⁴ Tang taja pia, pemati endang udah merintah kenyau ari Adam nyentuk ngagai maya Moses, nyengkaum orang ke bempu dosa ti enda sebaka enggau penyalah Adam, ti ngambarka gaya orang siku ke deka datai.

¹⁵ Tang pemeri ti diberi pechuma nya enda baka dosa Adam. Laban enti mayuh orang mati ketegal dosa orang siku nya, tentu mayuh agi ga pengasih Allah Taala enggau pemeri ti diberi pechuma deka diberi ngagai orang mayuh, ulih orang siku, iya nya Jesus Kristus.

¹⁶ Lalu pemeri ti diberi pechuma nya enda baka dosa orang siku nya. Laban atur ti diberi udah bekau dosa siti nya nyadi, mai ukum, tang pemeri ti diberi pechuma udah bekau mayuh dosa nyadi, mai pengelurus.

¹⁷Enti ketegal dosa orang siku, pemati merintah ulih orang siku nya, tentu lebih agi ga orang ke nerima pengasih enggau pengelurus ti diberi pechuma deka merintah dalam pengidup tu, ulih orang siku, iya nya Jesus Kristus.

¹⁸ Nya alai, baka dosa orang siku ti mai ukum ngagai semua mensia, baka nya mega pengawa ti lurus ti dikereja orang siku deka mai pengelurus enggau pengidup ngagai semua mensia.

¹⁹ Laban baka orang siku ke enda ngasi nya mai mayuh orang bedosa, baka nya mega mayuh orang deka digaga lurus[22] laban orang siku ngasi.

²⁰ Tang Adat datai, lalu tu ngasuh penyalah betambah; tang lebuh dosa betambah, pengasih Allah Taala betambah mayuh agi,

²¹ ngambika, baka dosa ti merintah ngena pemati, baka nya mega pengasih merintah ngena pengelurus lalu mai ngagai pengidup ti meruan belama iya, ulih Jesus Kristus Tuhan kitai.