Read Iban Rome 6 Bible Online

Rome 6 - Iban bible

Rome 6

¹ Nya alai, baka ni ku jalai kitai bejaku? Kati kitai majak bedosa, ngambika pengasih nambah-menambah?

² Enda! Baka ni ku kitai ke udah mati ke dosa, tau majak diau dalam dosa?

³ Kati kita enda nemu, semua kitai ke udah dibaptisa ke dalam[23] Jesus Kristus, udah mega dibaptisa ke dalam pemati Iya?

⁴ Nya alai, kitai udah dikuburka sama enggau Iya laban kitai udah dibaptisa ke dalam pemati Iya, ngambika baka Kristus ke diangkatka ari pemati ulih mulia Apai, baka nya mega kitai deka idup dalam pengidup ti baru.

⁵ Laban enti kitai udah begempung enggau Iya dalam pemati Iya, kitai tetap mega deka begempung enggau Iya dalam pengangkat Iya ari mati.

⁶ Kitai nemu, pendiau kitai ti lama udah diregang sama enggau Iya, ngambika tubuh ti bedosa dirusak, lalu kitai enda agi nyadi ulun dosa.

⁷ Laban barang sapa mati, dilepaska ari dosa.

⁸ Tang enti kitai udah mati enggau Kristus, kitai mega arapka diri deka idup enggau Iya.

⁹ Kitai nemu, Kristus ke diangkatka ari mati, enda agi mati. Pemati nadai agi kuasa atas Iya.

¹⁰Pemati ti ditatka Iya nya pemati ke dosa, sekali aja, tang pengidup ti diasaika Iya diatu nya pengidup Iya ke Allah Taala.

¹¹ Nya alai kita enda tau enda ngumbai diri mati ke dosa, lalu idup ke Allah Taala dalam Jesus Kristus.

¹²Nya alai, anang nejuka dosa merintah tubuh kita, ti ngasuh kita ngasika pengingin tubuh.

¹³ Anang agi nyerahka tubuh kita ngagai dosa, nyadika senyata[24] kena ngereja penyai, tang serahka diri ngagai Allah Taala baka orang ke udah dibai ari pemati ngagai pengidup, lalu serahka tubuh kita ngagai Allah Taala nyadika senyata[25] kena ngereja pengelurus.

¹⁴ Laban dosa nadai agi merintah[26] kita, laban kita ukai di baruh Adat, tang di baruh pengasih.

¹⁵ Nama deh? Kati patut kitai bedosa laban kitai ukai di baruh Adat, tang di baruh pengasih? Enda tau sekali-kali!

¹⁶ Kati kita enda nemu, enti kita nyerahka diri ngagai orang ngambika kita ngasika iya baka ulun, kita nyadi ulun orang ke dikasika kita, nemuka kita nyadi ulun dosa ti mai ngagai pemati, tauka ngasika Allah Taala ti mai ngagai pengelurus?

¹⁷Tang terima kasih ngagai Allah Taala, laban taja pen kita suba udah nyadi ulun dosa, tang kita, enggau pengabis ati kita, udah ngasika ajar ti bendar ti udah diberi ngagai kita,

¹⁸ lalu laban kita udah dilepaska ari dosa, kita diatu udah nyadi ulun pengelurus.

¹⁹ Aku bejaku ngena penemu mensia, laban kita lemi. Laban baka kita suba ke udah nyerahka tubuh kita nyadika ulun pengamah, sereta majak balat-sebalat nyadika ulun penyai, baka nya mega kita diatu enda tau enda nyerahka tubuh kita nyadika ulun pengelurus, ngambika kita nyadi kudus.

²⁰ Lebuh kita nyadi ulun dosa, kita enda diperintah pengelurus.

²¹ Tang nama penguntung kita suba, lebuh kita ngereja utai ti dikemaluka kita diatu? Semua utai nya ngujung ngagai pemati magang!

²²Tang laban kita diatu udah dilepaska ari dosa, lalu nyadi ulun Allah Taala, penguntung kita nya pengudus, ti ngujung ngagai pengidup ti meruan belama iya.

²³ Laban upah dosa nya pemati, tang pemeri ti diberi Allah Taala pechuma nya pengidup ti meruan belama iya dalam Jesus Kristus Tuhan kitai.